வந்த முதல் நாளே சண்டையா..! பிக்பாஸ் கொடுத்த டாஸ்க்கால் குழம்பிப் போன போட்டியாளர்கள் - வைரலாகும் புரோமோ

பிக்பாஸ் சீசன் 6 நிகழ்ச்சி நேற்று கோலாகலமாக தொடங்கியது. வழக்கமாக 16 பேர் முதல் 18 பேர் வரை கலந்துகொண்ட இந்நிகழ்ச்சியில் நேற்று முதல் நாளே 20 போட்டியாளர்கள் கலந்துகொண்டது பலருக்கும் ஆச்சர்யமாக இருந்தது. இதில் 10 பெண் போட்டியாளர்கள், 9 ஆண் போட்டியாளர்கள் மற்றும் ஒரு திருநங்கையும் அடங்குவர்.

பிக்பாஸ் நிகழ்ச்சி ஆரம்பமானாலே பரபரப்புக்கும் விறுவிறுப்புக்கும் பஞ்சமிருக்காது. அந்த வகையில் பிக்பாஸ் 6 நிகழ்ச்சி ஆரம்பிக்கப்பட்ட முதல் நாளே போட்டியாளர்களிடையே சண்டையை மூட்டி விட்டுள்ளார் பிக்பாஸ். நேற்று போட்டியாளர்களுக்கு டாஸ்க் ஒன்று கொடுக்கப்பட்டது. 

அதில் தங்களை கவராத சக போட்டியாளர்களை தேர்ந்தெடுக்க வேண்டும் என்றும், அவ்வாறு தேர்ந்தெடுக்கப்படும் 4 போட்டியாளர்கள் இரவு முழுவதும் வீட்டின் வெளியே தான் தூங்க வேண்டும் என்றும் உத்தரவிட்டார் பிக்பாஸ். அதுமட்டுமின்றி அந்த 4 பேரும் அடுத்த வாரம் நடக்க உள்ள நாமினேஷனுக்கு நேரடியாக தேர்வு செய்யப்படுவார்கள் என்றும் அறிவித்தார். அந்த 4 பேர் யார் என்பதை தேர்ந்தெடுக்க ஒவ்வொரும் சொல்லும் காரணங்கள் என்னென்ன என்பது தற்போது வெளியாகி உள்ள புரோமோவில் இடம்பெற்று உள்ளது.