Hema Chaudhary: சூப்பர் ஸ்டார் ரஜினிகாந்தின் கல்லூரி தோழியும்.. நடிகையுமான ஹேமா சவுத்ரி மருத்துவமனையில் அனுமதி
பழம்பெரும் நடிகையும், சூப்பர் ஸ்டார் ரஜினிகாந்தின் கல்லூரி தோழியுமான ஹேமா சவுத்ரி மூளையில் ஏற்பட்ட பிரச்சனை காரணமாக மருத்துவமனையில் அனுமதிக்கப்பட்டுள்ளார்.
பழம்பெரும் கன்னட நடிகை ஹேமா சவுத்ரி, உடல்நலக்குறைவால் பாதிக்கப்பட்டு தீவிர சிகிச்சை பிரிவில் அனுமதிக்கப்பட்டுள்ளார். நடிகை ஹேமா சவுத்ரிக்கு கடந்த 2 நாட்களுக்கு முன்பு, மூளையில் ஏற்பட்ட பிரச்சனை காரணமாக மயங்கிய நிலையில் பெங்களூரு பாப்டிஸ்ட் மருத்துவமனையில் அனுமதிக்கப்பட்டார்.
தற்போது தீவிர சிகிச்சை பிரிவில் அனுமதிக்கப்பட்டுள்ள இவருக்கு... மருத்துவர்கள் தொடர்ந்து சிகிச்சை அளித்து வருகின்றனர். ஆனால் அவருடைய உடல்நிலையில் எவ்வித முன்னேற்றமும் இல்லை என கூறப்படுகிறது. மேலும் அயர்லாந்தில் உள்ள ஹேமா சவுத்ரியின் மகன், இதுகுறித்து கேள்விப்பட்டு அங்கிருந்து இந்தியா திரும்ப உள்ளதாகவும் கூறப்படுகிறது. ரசிகர்களும் தொடர்ந்து ஹேமா குணமடைய தங்களின், வாழ்த்துக்களையும், வேண்டுதல்களையும் முன்வைத்து வருகிறார்கள்.
ஹைதராபாத்தை சேர்ந்த ஹேமா சவுத்ரி, பிரபல டப்பிங் கலைஞரும் தெலுங்கு திரைப்பட நடிகையுமான பிருந்தாவன் சவுத்ரியின் மகள் ஆவார். 1976 இல் பெல்லி கனி பெல்லி என்ற தெலுங்குத் திரைப்படத்தில் ஹீரோயினாக அறிமுகமான இவர், திருமணத்திற்கு பின்னர் துணை நடிகையாக நடிக்க துவங்கினார். இதுவரை சுமார் 180 படங்களுக்கு மேல் இவர் நடித்துள்ளார். கன்னடத்தில் மட்டும் 91 படங்களில் நடித்துள்ளார். கன்னடத்தில் ஹீரோயினாகவும் குணச்சித்திர நடிகையாக ஜொலித்த இவர், தெலுங்கு, மலையாளம், தமிழ் போன்ற மொழிகளிலும் நடித்துள்ளார்.
சில கன்னட சீரியல்களிலும் நடித்துள்ள ஹேமா சௌத்ரி ஒரு சிறந்த குச்சிப்புடி நடனக் கலைஞர் ஆவார். மேலும் அவர் தனது குரு வேம்படி சின்ன சத்யத்துடன் உலகளவில் 700 க்கும் மேற்பட்ட நிகழ்ச்சிகளை வழங்கியுள்ளார். நடன திறமைக்காக பனோரமா விருதை வென்றுள்ளார். இவர், சென்னை ஃபிலிம் சிட்டியில் படிக்கும் போது சூப்பர் ஸ்டார் ரஜினிகாந்தின் வகுப்புத் தோழியாக இருந்தார் என்பது குறிப்பிடத்தக்கது.
சேனலை கிளிக் செய்து பின்தொடரவும்
