25 கோடி டிக்கெட்கள் விற்பனை.. இந்தியாவில் அதிகம் பார்க்கப்பட்ட படம் இதுதான்.. பாகுபலி, RRR-ஐ விட அதிக வசூல்..

அட்லீ பாலிவுட்டில் அறிமுகமான ஜவான் படம் மிகப்பெரிய வெற்றி படமாக அமைந்தது. ஷாருக்கான், நயன்தாரா, தீபிகா படுகோன், விஜய் சேதுபதி உள்ளிட்டோர் நடிப்பில் வெளியான இந்த இப்படம் பாக்ஸ் ஆபிஸில் ரூ.1100 கோடி வசூல் செய்தது. இதனால் கடந்த ஆண்டு அதிக வசூல் செய்த இந்திய படங்களில் ஒன்றாக மாறியது. இந்தியாவில் 4 கோடி டிக்கெட்டுகள் உட்பட உலகளவில் 5 கோடி டிக்கெட்டுகள் விற்றதாக மதிப்பிடப்பட்டுள்ளது. 

ஆனால் நீங்கள் அதிகம் பார்க்கப்பட்ட இந்தியப் படங்களைக் கருத்தில் கொள்ளும்போது, இந்த எண்ணிக்கை மிகவும் குறைவு என்று சொன்னால் உங்களால் நம்ப முடிகிறதா? ஆம். அதிகம் பார்க்கப்பட்ட இந்தியத் திரைப்படம் ஒன்று உள்ளது. இந்த படத்தின் 25 கோடி டிக்கெட்கள் விற்கப்பட்டதாம். ஆனால் ஆரம்பத்தில் இந்த படம் ஒரு தோல்வி படமாக கருதப்பட்டது. அது எந்த படம் தெரியுமா?

ரமேஷ் சிப்பி இயக்கத்தில் வெளியான ஷோலே படம் தான் அது. இந்த படம் மிகப்பெரிய இந்திய திரைப்படம் என்பதில் ஆச்சரியமில்லை. மல்டி-ஸ்டாரர் படமாக உருவான இந்த படம் இந்தியாவின் பாக்ஸ் ஆபிஸில் வசூல் சாதனை படைத்தது. மேலும் 10 ஆண்டுகளுக்கு மேலாக இந்தியாவின் அதிக வசூல் செய்த படமாக இருந்தது.

ஷோலே 1975-ல் படம் வெளியான உடன் இந்தியாவில் 15 கோடி டிக்கெட்டுகளை விற்றதாக மதிப்பிடப்பட்டுள்ளது. பல ஆண்டுகளில் மறு வெளியீடுகள் இந்த எண்ணிக்கையை 18 கோடியை நெருங்கியதாகத் தெரிகிறது. வெளிநாடுகளிலும் இப்படம் வசூல் சாதனை படைத்தது. சோவியத் ரஷ்யாவில், படத்தின் ஆரம்ப ஓட்டத்தில் 48 மில்லியன் (4.8 கோடி) டிக்கெட்டுகளும், மறு வெளியீட்டிற்குப் பிறகு 6 கோடியும் விற்றதாகக் கூறப்படுகிறது.

ஐரோப்பா மற்றும் வட அமெரிக்கா மற்றும் ஆசியா முழுவதும் இப்படம் 2 கோடிக்கும் அதிகமான டிக்கெட்டுகள் விற்பனையாகியுள்ளதாக கூறப்படுகிறது. எனவே இந்த படத்தின் 25 கோடி டிக்கெட்கள் விற்கப்பட்டதாகவும் கூறப்படுகிறது.

3 கோடி ரூபாய் பட்ஜெட்டில் எடுக்கப்பட்ட ஷோலே, அப்போதைய காலக்கட்டத்தில் இந்தியாவின் மிக விலையுயர்ந்த படம். இப்படம் வெளியான உலகம் முழுவதும் ரூ.15 கோடி வசூலித்தது. பின்னர் ரீ ரிலீஸ் செய்யப்பட்ட போது நல்ல வசூலை ஈட்டியதால் இந்த படத்தின் மொத்த வசூல் ரூ.35 கோடியாக இருந்தது.

இன்றைய பணத்தின் மதிப்பின் படி பார்த்தால் ஷோலேயின் உலகளாவிய வசூல் ரூ.2800 கோடியாக இருக்கும் என்று மதிப்பிடப்பட்டுள்ளது. இதன் இந்தியாவில் அதிக வசூல் செய்த படங்களில் ஷோலே 2-வது இடத்தில் உள்ளது. இந்த பட்டியலில் சுமார் 3600 கோடி வசூலுடன் முகல்-இ-ஆசாம் படம் முதலிடத்தில் உள்ளது.

இதன் மூலம் டங்கல் (மொத்த வசூல் ரூ. 2650 கோடி), பாகுபலி 2:  (ரூ. 2170 கோடி) உள்ளிட்ட படங்களை விட அதிகமாக வசூலித்துள்ளது. RRR, KGF 2, அனிமல் மற்றும் ஜவான் போன்ற சமீபத்திய வெற்றிகள் ஷோலே படத்தின் மொத்த வசூலில் பாதி கூட வசூலிக்கவில்லை.

1975-ம் ஆண்டு வெளியான ஷோலே படத்திற்கு முதல் நாளில் போதிய வரவேற்பு கிடைக்கவில்லை. எனவே இந்த தோல்வி  படமாக கருதப்பட்டது. அமிதாப் பச்சன், சஞ்சீவ் குமார் மற்றும் தர்மேந்திரா ஆகியோருடன் ரமேஷ் சிப்பி அவசர சந்திப்பு ஒன்றை நடத்தினார். அவர்கள் க்ளைமாக்ஸை மாற்ற நினைத்தார்கள் ஆனால் சலீம்-ஜாவேத் சில நாட்கள் காத்திருக்குமாறு அறிவுறுத்தினர். ஒரு வாரத்திற்கு படத்தின் வசூல் வேகமெடுக்க தொடங்கியது. அதன்பின்னர் இந்தியாவின் மிகப்பெரிய வெற்றி படங்களில் ஒன்றாக மாறியது என்பது குறிப்பிடத்தக்கது.