கேரள ஸ்டைல் வேர்க்கடலை சட்னி செய்வது எப்படி?

கேரள உணவுகள் என்றாலே தவியான மணமும், சுவையும் இருக்கும். அதிலும் பாரம்பரிய முறையில், தினசரி கேரளத்து வீடுகளில் செய்யப்படும் சட்னிகள் இன்னும் வித்தியாசமான சுவையில் இருக்கும். அதில் வேர்க்கடலை சட்னிக்கு எப்போதுமே தனி இடம் உண்டு. ஒருமுறை சுவைத்தால் இந்த சட்னிக்கு நீங்கள் ஃபேன் ஆகி விடுவீர்கள்.

கேரள பாணியிலான வேர்க்கடலை சட்னி:

இட்லி, தோசை, பணியாரம் போன்ற தென்னிந்திய உணவு வகைகளுடன் பரிமாற ஏற்ற ஒரு அருமையான துணை உணவு. மேலும், வேர்க்கடலையில் உடலுக்கு நன்மை பயக்கும் பல சத்துக்கள் உள்ளன.

வேர்க்கடலை சட்னிக்கு தேவையான பொருட்கள்:

வேர்க்கடலை - 1 கப்

எண்ணெய் - 1 தேக்கரண்டி

பூண்டு - 2-3 பற்கள்

காய்ந்த மிளகாய் - 2

வெங்காயம் - 1 

புளி - ஒரு சிறிய நெல்லிக்காய் அளவு

உப்பு - தேவையான அளவு

கடுகு - 1/2 தேக்கரண்டி

உளுத்தம்பருப்பு - 1/2 தேக்கரண்டி

கறிவேப்பிலை - ஒரு கொத்து

வேர்க்கடலை சட்னி செய்முறை:

முதலில் ஒரு கடாயில் வேர்க்கடலையை போட்டு மிதமான தீயில் வறுக்கவும். வேர்க்கடலை லேசாக நிறம் மாறி நல்ல வாசனை வரும் வரை வறுக்க வேண்டும். வறுத்த வேர்க்கடலையை ஆற வைத்து, கைகளால் தேய்த்து தோலை நீக்கவும்.

கடாயில் எண்ணெய் ஊற்றி சூடானவுடன் அதில் கடுகு, உளுத்தம்பருப்பு போட்டு தாளிக்கவும். பிறகு பூண்டு, காய்ந்த மிளகாய், வெங்காயம் சேர்த்து வதக்கவும். வெங்காயம் நன்றாக வதங்கி லேசாக நிறம் மாறினால் போதும். அதனுடன் உப்பு, புளி, சேர்த்து ஒரு நிமிடம் வதக்கவும்.

பின்னர் வேர்க்கடலையுடன் சேர்த்து மிக்ஸியில் போட்டு தேவையான அளவு தண்ணீர் சேர்த்து நன்றாக அரைக்கவும். சட்னி மிகவும் கெட்டியாகவோ அல்லது மிகவும் நீர்த்ததாகவோ இல்லாமல், சரியான பதத்தில் இருக்க வேண்டும். கடாயில் எண்ணெய் ஊற்றி சூடாக்கவும். அதில் கடுகு, காய்ந்த மிளகாய், கறிவேப்பிலை போட்டு தாளித்து சட்னியில் ஊற்றவும். சுவையான கேரள பாணி வேர்க்கடலை சட்னி தயார்.

கூடுதல் தகவல்கள்:

சிலர் இந்த சட்னியில் துருவிய தேங்காயும் சேர்ப்பதுண்டு. அப்படி சேர்ப்பதாக இருந்தால், வதக்கிய வெங்காயக் கலவையுடன் சிறிது துருவிய தேங்காயையும் சேர்த்து அரைக்கவும்.

காரத்திற்கு ஏற்ப காய்ந்த மிளகாயின் அளவை கூட்டவோ குறைக்கவோ செய்யலாம்.

சட்னியை அரைக்கும்போது சிறிது தண்ணீர் சேர்த்து முதலில் கொரகொரப்பாக அரைத்துவிட்டு, பிறகு தேவையான அளவு தண்ணீர் சேர்த்து மென்மையாக அரைக்கவும்.

வேர்க்கடலையின் நன்மைகள்:

-  வேர்க்கடலையில்  புரதம், நார்ச்சத்து, நல்ல கொழுப்புகள், வைட்டமின்கள் மற்றும் தாதுக்கள் நிறைந்துள்ளன. 

-  வேர்க்கடலையில் உள்ள மோனோசாச்சுரேட்டட் மற்றும் பாலிஅன்சாச்சுரேட்டட் கொழுப்புகள் கெட்ட கொழுப்பை குறைத்து இதய நோய்கள் வராமல் தடுக்க உதவுகின்றன.

-  வேர்க்கடலையில் உள்ள புரதம் மற்றும் நார்ச்சத்து பசி உணர்வை கட்டுப்படுத்தி உடல் எடையை குறைக்க உதவுகிறது.

-  வேர்க்கடலையின் குறைந்த கிளைசெமிக் குறியீடு இரத்த சர்க்கரை அளவை கட்டுப்படுத்த உதவுகிறது.

-  வேர்க்கடலையில் உள்ள மாங்கனீசு மற்றும் பாஸ்பரஸ் எலும்புகளின் ஆரோக்கியத்திற்கு உதவுகின்றன.

-  வேர்க்கடலையில் உள்ள வைட்டமின் பி1 மற்றும் நியாசின் மூளையின் செயல்பாட்டை மேம்படுத்த உதவுகின்றன.