exercise tips: உடற்பயிற்சி செய்ய மூடே இல்லையா? உங்களை சுறுசுறுப்பாக்கும் 8 எளிய வழிகள்!

சில நாட்களில் காலையில் எழுந்திருக்கும் போதே "இன்னைக்கு உடற்பயிற்சி செய்யவே வேண்டாம்" என்று தோன்றும். ஆனால், ஆரோக்கியத்திற்குத் தொடர்ச்சி அவசியம். உடற்பயிற்சி செய்யவே பிடிக்காத நாட்களிலும், எளிதாக சுறுசுறுப்பாக்க உதவும் 8 எளிய வழிகளைப் பார்ப்போம்.

Image Credit : Getty

மிகச் சிறியதாகத் தொடங்குங்கள் :

இன்று ஒரு மணி நேரம் ஜிம்மில் கழிக்க வேண்டும் என்று பெரிய இலக்கு வைக்காதீர்கள். "வெறும் 5 அல்லது 10 நிமிடங்கள் மட்டும் ஏதேனும் செய்வோம்" என்று உங்களை நீங்களே சமாதானப்படுத்துங்கள். பெரும்பாலும், உடற்பயிற்சியைத் தொடங்குவதுதான் கடினமே தவிர, ஒருமுறை தொடங்கிவிட்டால் அதைத் தொடர்ந்து செய்து முடிப்பது எளிதாகிவிடும்.

Image Credit : Getty

உடற்பயிற்சியின் வரையறையை மாற்றுங்கள் :

உடற்பயிற்சி என்றால் ஜிம்மிற்குச் சென்று வெயிட் தூக்குவது அல்லது மைதானத்தில் ஓடுவது மட்டும்தான் என்று நினைக்க வேண்டாம். உங்களுக்குப் பிடித்த பாடலுக்கு நடனமாடுவது, செல்லப்பிராணிகளுடன் விளையாடுவது, அல்லது வீட்டைச் சுத்தம் செய்வது போன்ற உடல் உழைப்பு கோரும் அனைத்துமே ஒரு வகையான உடற்பயிற்சிதான்.

Image Credit : Getty

பிடித்தமானவற்றைத் தேர்ந்தெடுங்கள் :

உங்களுக்கு ஓடுவது பிடிக்காது என்றால் அதை வற்புறுத்தி செய்யாதீர்கள். அதற்குப் பதிலாக உங்களுக்குப் பிடித்தமான யோகா, நீச்சல், அல்லது சைக்கிள் ஓட்டுதல் போன்ற செயல்பாடுகளில் ஈடுபடலாம். நீங்கள் ரசித்துச் செய்யும் ஒரு விஷயம் உங்களை சோர்வடையச் செய்யாது.

Image Credit : Getty

நண்பர்களுடன் இணைந்து செய்யுங்கள் :

தனியாக உடற்பயிற்சி செய்யும்போது எளிதாகத் தவிர்த்துவிடத் தோன்றும். ஆனால், ஒரு நண்பருடனோ அல்லது குழுவாகவோ இணைந்து செய்யும்போது ஒருவருக்கொருவர் உந்துதலாக (Motivation) இருக்க முடியும். அவர்கள் உங்களுக்காகக் காத்திருக்கிறார்கள் என்ற பொறுப்புணர்வே உங்களைச் செயல்பட வைக்கும்.

Image Credit : Getty

ஆடைகளை முன்கூட்டியே தயார் செய்து வையுங்கள் :

காலையில் எழுந்தவுடன் உடற்பயிற்சி செய்வதற்கான ஆடைகளைத் தேடுவதே ஒரு பெரிய வேலையாகத் தோன்றி, உங்கள் மூடைக் கெடுத்துவிடும். எனவே, முந்தைய நாள் இரவே உங்கள் உடற்பயிற்சி ஆடைகளையும், காலணிகளையும் (Shoes) எடுத்துப் பக்கத்தில் வைத்துக் கொள்ளுங்கள். இது உங்கள் மூளையை உடற்பயிற்சிக்குத் தயாராக வைக்க உதவும்.

Image Credit : Getty

பலன்களை நினைத்துப் பாருங்கள் :

உடற்பயிற்சி செய்வதால் உடலுக்கு மட்டுமின்றி மனதிற்கும் பல நன்மைகள் கிடைக்கின்றன. உடற்பயிற்சிக்குப் பிறகு உங்கள் மூளையில் எண்டோர்பின்கள் (Endorphins - மகிழ்ச்சி தரும் ஹார்மோன்கள்) சுரப்பதால் உங்கள் மனம் எவ்வளவு புத்துணர்ச்சியாக இருக்கும் என்பதை நினைத்துப் பாருங்கள். அந்த நல்ல உணர்வுக்காகவே நீங்கள் உடற்பயிற்சி செய்யத் தொடங்குவீர்கள்.

Image Credit : Getty

'ஆல்-ஆர்-நத்திங்' (All-or-Nothing) மனநிலையைத் தவிருங்கள் :

"இன்று என்னால் முழுமையாக 5 கிலோமீட்டர் ஓட முடியாது, அதனால் இன்று ஓடவே வேண்டாம்" என்ற மனநிலை ஆபத்தானது. 5 கிலோமீட்டர் ஓட முடியாவிட்டால் என்ன, 10 நிமிடங்கள் நிதானமாக நடந்துவிட்டு வரலாம். எதையுமே செய்யாமல் இருப்பதற்கு, ஏதேனும் கொஞ்சம் செய்வது எவ்வளவோ மேலானது.

Image Credit : Getty

அன்றாட வேலைகளோடு இணையுங்கள் :

உடற்பயிற்சிக்கு என்று தனியாக நேரம் ஒதுக்க முடியாவிட்டால், உங்கள் அன்றாட வேலைகளிலேயே உடற்பயிற்சியைக் கொண்டு வாருங்கள். லிஃப்டுக்குப் பதிலாகப் படிகளைப் பயன்படுத்துவது, கடைகளுக்குச் செல்லும்போது வாகனத்தைத் தூர நிறுத்தவிட்டு நடந்து செல்வது, அல்லது அலுவலகத்தில் போன் பேசும்போது நின்றுகொண்டே பேசுவது போன்ற சிறிய மாற்றங்களைச் செய்யலாம்.