'புஷ்பா' 2 படத்தின் ரிலீஸ் தேதி அறிவிப்பு! அல்லு அர்ஜூனால் கமல்ஹாசனுக்கு வந்த சிக்கல்?
நடிகர் அல்லு அர்ஜுன் நடிப்பில் உருவாகி வரும், 'புஷ்பா 2' படத்தின் ரிலீஸ் தேதியை படக்குழு அதிகார பூர்வமாக அறிவித்துள்ளது.
இயக்குனர் சுகுமார் இயக்கத்தில், அல்லு அர்ஜுன் நடித்த 'புஷ்பா' முதல் பாகத்தை தொடர்ந்து, 'புஷ்பா' 2 படத்தில் நடித்து வருகிறார். 'புஷ்பா தி ரைஸ்' என பெயரிடப்பட்ட முதல் பாகம், கடந்த ஆண்டு சுமார் 200 கோடி பட்ஜட்டில் வெளியாகி, 500 கோடிக்கு மேல் வசூல் சாதனை படைத்தது. இப்படத்துக்கு சிலர் கலவையான விமர்சனங்களை தெரிவித்து வந்த போதிலும் அல்லு அர்ஜுன் ரசிகர்கள் மத்தியில் நல்ல வரவேற்பை பெற்றது இப்படம்.
செம்மர கடத்தலை மையமாக வைத்து எடுக்கப்பட்டிருந்த இந்த, திரைப்படத்தில் அல்லு அர்ஜுன் இதுவரை ஏற்று நடித்திராத வித்தியாசமான கதாபாத்திரத்தில் மிகவும் அழகாக தன்னுடைய நடிப்பை வெளிப்படுத்தி இருந்தார். இவரின் அசத்தலான நடிப்புக்கு, தேசிய விருதும் கிடைத்துள்ளது. இதன் மூலம் தெலுங்கு திரையுலகில் முதல் முறையாக சிறந்த நடிகருக்கான விருதை பெரும் பிரபலம் என்கிற பெருமையும் இவருக்கு கிடைத்துள்ளது. இந்த படத்தில் அல்லு அர்ஜுனுக்கு ஜோடியாக நடிகை ராஷ்மிகா மந்தனா நடித்திருந்த நிலையில்ம, சமந்தா ஐட்டம் பாடலுக்கு ஆட்டம் போட்டிருந்தார்.
மேலும் வில்லனாக சுனிலும், முரட்டுத்தனமான போலீஸ் அதிகாரியாக பகத் பாசிலும் நடித்திருந்தனர். இந்த படத்திற்கு தேவி ஸ்ரீ பிரசாத் இசையமைத்திருந்தார். இப்படத்திற்கு எந்த அளவுக்கு வரவேற்பு கிடைத்ததோ, அதே அளவிற்கு, இப்படத்தின் இரண்டாம் பாகத்தின் மீதான எதிர்பார்ப்பு எழுந்துள்ளது. மேலும் 'புஷ்பா 2' படத்தின் முதல் பாகத்தை விட, இரண்டாம் பாகத்தை பிரமாண்டமாக எடுக்க முடிவு செய்து படப்பிடிப்பை நடத்தி வருகிறார் இயக்குனர் சுகுமார்.
தற்போது சுமார் 50 சதவீத படப்பிடிப்பு முடிவடைந்து விட்டதாக கூறப்படும் நிலையில், மீதமுள்ள காட்சிகளும் விறுவிறுப்பாக எடுக்கப்பட்டு வருகிறது. மேலும் இரண்டாம் பாகத்தின் போஸ்டர் மற்றும் கிலிம்ஸி போன்றவை படம் மீதான எதிர்பார்ப்பை தூண்டியுள்ளது. இந்நிலையில் சற்று முன்னர் இந்த படத்தின் ரிலீஸ் தேதி குறித்த தகவலை படக்குழு வெளியிட்டுள்ளது. அதன்படி அடுத்த ஆண்டு ஆகஸ்ட் 15ஆம் தேதி 'புஷ்பா தி ரூல்' திரைப்படம் வெளியாகும் என அறிவிக்கப்பட்டுள்ளது. இதே நாளில் தான் ஷங்கர் இயக்கத்தில், கமல்ஹாசன் நடித்து வரும் 'இந்தியன் 2' வெளியாகும் என கூறப்படும் நிலையில், அல்லு அர்ஜூனால் இந்தியன் 2 படத்திற்கு ஏதேனும் பிரச்சனை வருமா? அல்லது தேதிகள் மாற்றப்படுமா? என்பதை பொறுத்திருந்து பார்ப்போம்.