நெஞ்சில் ரத்தம்... தலையில் மான் கொம்பு! யார் அந்த உதிரன்? வெறித்தனமான போஸ்டரை வெளியிட்ட 'கங்குவா' படக்குழு!
பாலிவுட் நடிகர் பாபி தியோலின் பிறந்தநாளை முன்னிட்டு, அவருடைய 'உதிரன்' கேரக்டர் லுக்கை 'கங்குவா' படக்குழு வெளியிட்டுள்ளது.
இயக்குனர் சிறுத்தை சிவா இயக்கத்தில், சூர்யா நடித்துள்ள திரைப்படம் 'கங்குவா'. இந்த படத்தின் படப்பிடிப்பு கிட்டத்தட்ட இறுதி கட்டத்தை எட்டியுள்ள நிலையில், அடுத்தடுத்து பல அப்டேட்களை படக்குழு கொடுத்து வருகிறது. சுமார் 350 கோடி பட்ஜெட்டில், ஃபேண்டஸி கதையம்சத்துடன் உருவாக்கி உள்ள இந்த படத்தை, கே இ ஞானவேல் ராஜா, ஸ்டுடியோ கிரீன் நிறுவனத்தின் மூலம் தயாரித்துள்ளார்.
நடிகர் சூர்யா சுமார் 5-திற்கும் மேற்பட்ட கெட்டப்புகளில் நடித்துள்ள இந்த படத்தில், இவருக்கு ஜோடியாக பாலிவுட் நடிகை திஷா பத்தானி நடித்துள்ளார். மேலும் பாபி தியோல் முக்கிய கதாபாத்திரத்தில் நடித்துள்ளார். இவர்களை தவிர, நடிகர் நடராஜன் சுப்பிரமணியம், ஜெகபதி பாபு, யோகி பாபு, ரெடின் கிங்ஸ்லி, கோவை சரளா, ஆனந்தராஜ் மாரிமுத்து, தீபா வெங்கட், ரவி ராகவேந்திரா, கே.எஸ். ரவிக்குமார், உள்ளிட்ட பலர் நடித்துள்ளனர்.
தாய், மனைவியை அடக்கம் செய்த அதே இடத்தில் மகளின் உடலை அடக்கம் செய்யும் இளையராஜா..!
இந்நிலையில் நேற்று 'கங்குவா' பட குழுவினர் உதிரன் என்கிற பெயர் எழுதப்பட்டு, ரத்தக் கரையோடு இருக்கும் கையின் போஸ்டர் ஒன்றை வெளியிட்டனர். இதன் மூலம் இன்று 11 மணிக்கு உதிரன் என்கிற கேரக்டர் போஸ்டர் வெளியாகும் என தெரிவிக்கப்பட்டிருந்தது. இந்த போஸ்டர் வைரலான நிலையில், சற்று முன்னர் உதிரன் யார் என்பதை போஸ்டர் வெளியிட்டு அறிவித்துள்ளது படக்குழு.
பாலிவுட் நடிகர் பாபி தியோலின் பிறந்தநாளை முன்னிட்டு, அவருடைய போஸ்டரை தான் 'படக்குழு' வெளியிட்டுள்ளது. பாபி தியோல் ஆளே அடையாளம் தெரியாதது போல் மாறியுள்ளார். நெஞ்சில் ரத்தத்துடன், தலையில் மான் கொம்புகளுடன்... ஒரே கூட்டத்தில் தலைவராக இருக்கிறார். இந்த போஸ்டர் தற்போது சமூக வலைத்தளத்தில் படு வைரலாக பார்க்கப்பட்டு வருகிறது.