Rashmika : நேஷனல் அவார்டை தட்டித்தூக்க ரெடியான ‘நேஷனல் கிரஷ்’ ராஷ்மிகா... பிரம்மாண்டமாக உருவாகும் பாடகியின் பயோபிக்

MS A Legacy On Screen : எம்.எஸ். சுப்புலட்சுமியின் வாழ்க்கை வரலாற்றுப் படமான 'எம்.எஸ். எ லெகஸி ஆன் ஸ்கிரீன்' அதிகாரப்பூர்வமாக அறிவிக்கப்பட்டுள்ளது. அவரது 110வது பிறந்தநாளை முன்னிட்டு இந்த அறிவிப்பு வெளியானது.

Image Credit : Asianet News

MS Subbulakshmi biopic

இந்திய இசை உலகில் அழியாத தடம் பதித்தவரும், பாரத ரத்னா விருது பெற்ற கர்நாடக இசை மேதையுமான எம்.எஸ். சுப்புலட்சுமியின் வாழ்க்கை வரலாறு தற்போது திரைப்படமாக உருவாக உள்ளது. ‘MS – A Legacy on Screen’ என பெயரிடப்பட்டுள்ள இந்த பிரம்மாண்ட பயோபிக்கில், எம்.எஸ். சுப்புலட்சுமியின் கதாபாத்திரத்தில் நடிகை ராஷ்மிகா மந்தனா நடிக்கிறார். இந்த படத்திற்கு அனிருத் ரவிச்சந்தர் இசையமைக்கிறார். ‘மஜிலி’, ‘ஜெர்சி’ உள்ளிட்ட படங்களை இயக்கிய கௌதம் தின்னனூரி இந்த பயோபிக்கை இயக்கவுள்ளார்.

Image Credit : fb

இசையாகவே வாழும் எம்.எஸ். சுப்புலட்சுமி

தயாரிப்பாளர்கள் அல்லு அரவிந்த், ராக்லைன் வெங்கடேஷ் மற்றும் பன்னி வாசு ஆகியோர் இணைந்து இப்படத்தை தயாரிக்கின்றனர். எம்.எஸ். சுப்புலட்சுமியின் 110வது பிறந்தநாளை முன்னிட்டு, சென்னை மியூசிக் அகாடமியில் நடைபெற்ற சிறப்பு நிகழ்ச்சியில் இந்த படத்தின் அதிகாரப்பூர்வ அறிவிப்பு வெளியாகியுள்ளது.

இந்தியாவின் இசை பாரம்பரியத்தில் எம்.எஸ். சுப்புலட்சுமிக்கு தனிச்சிறப்பான இடம் உண்டு. அவரது குரல் மொழி, மதம், பிராந்தியம் போன்ற எல்லைகளைக் கடந்து கோடிக்கணக்கான மக்களை சென்றடைந்தது. பக்திப் பாடல்கள் முதல் கர்நாடக இசைக் கச்சேரிகள் வரை, அவரது குரல் இந்தியர்களின் இசை அனுபவத்தில் முக்கியமான பகுதியாக மாறியது.

அவர் மறைந்து பல ஆண்டுகள் கடந்துவிட்ட போதிலும், அவரது பாடல்கள் இன்றும் வீடுகள், கோவில்கள், இசை அரங்குகள் என பல்வேறு இடங்களில் தொடர்ந்து ஒலித்துக்கொண்டிருக்கின்றன. இப்படிப்பட்ட ஒரு இசை ஜாம்பவானின் வாழ்க்கையை அடுத்த தலைமுறையினரிடம் கொண்டு சேர்க்கும் முயற்சியாக இந்த பயோபிக் உருவாகிறது.

Image Credit : others

பல ஆண்டுகளாக நடந்த பணிகள்

எம்.எஸ். சுப்புலட்சுமியின் வாழ்க்கையை திரையில் கொண்டு வருவது சாதாரண முயற்சி அல்ல என்பதால், அவரது வாழ்க்கையுடன் தொடர்புடைய பல்வேறு தகவல்கள், உரிமைகள், அனுமதிகள், இலக்கிய ஆவணங்கள் மற்றும் குடும்பத்தினருடனான தொடர்புகள் உள்ளிட்டவற்றை திரட்டும் பணியில் படக்குழு நீண்ட காலமாக ஈடுபட்டதாக தெரிவிக்கப்பட்டுள்ளது.

அவரது புகழை மட்டும் மையமாகக் கொள்ளாமல், உலகம் அறிந்த அந்த குரலுக்கு பின்னால் இருந்த மனிதரின் தனிப்பட்ட வாழ்க்கை, கனவுகள், சவால்கள், போராட்டங்கள், மன உறுதி மற்றும் ஆன்மீக பயணம் உள்ளிட்ட பல்வேறு அம்சங்களையும் படத்தில் பதிவு செய்ய படக்குழு திட்டமிட்டுள்ளது.

Image Credit : others

எம்.எஸ். சுப்புலட்சுமியாக ராஷ்மிகா

இந்த அறிவிப்பில் ரசிகர்களின் கவனத்தை அதிகம் ஈர்த்திருப்பது, எம்.எஸ். சுப்புலட்சுமி கதாபாத்திரத்தில் ராஷ்மிகா மந்தனா நடிக்கிறார் என்பதுதான். இன்றைய தலைமுறையில் முன்னணி நடிகையாக வலம் வரும் ராஷ்மிகாவுக்கு, இந்திய இசை உலகின் மிகப்பெரிய ஆளுமைகளில் ஒருவரை திரையில் பிரதிபலிப்பது மிகப்பெரிய சவாலாக இருக்கும்.

எம்.எஸ். சுப்புலட்சுமியின் தோற்றம் மட்டுமின்றி, அவரது கலைப் பயணம், உணர்வுகள், வாழ்க்கை அனுபவங்கள் மற்றும் ஆன்மீகத் தேடல் ஆகியவற்றையும் தனது நடிப்பின் மூலம் வெளிப்படுத்த வேண்டிய பொறுப்பு ராஷ்மிகாவுக்கு இருக்கிறது.

Image Credit : others

பிரம்மாண்ட கூட்டணியில் உருவாகும் பயோபிக்

பல தலைமுறைகளுக்கும் ஊக்கமளிக்கும் எம்.எஸ். சுப்புலட்சுமியின் வாழ்க்கை வரலாற்றை, இன்றைய ரசிகர்களுக்கும் புரியும் வகையில் பிரம்மாண்டமான திரைப்படமாக உருவாக்க படக்குழு தயாராகி வருகிறது. தனக்கே உரிய கதை சொல்லும் பாணியால் கவனம் பெற்றுள்ள கௌதம் தின்னனூரி, இந்த இசை மேதையின் வாழ்க்கையை எவ்வாறு திரையில் வடிவமைக்கப் போகிறார் என்ற எதிர்பார்ப்பும் அதிகரித்துள்ளது.

அனிருத்தின் இசை, ராஷ்மிகாவின் நடிப்பு, கௌதம் தின்னனூரியின் இயக்கம் என உருவாகும் இந்த கூட்டணி, எம்.எஸ். சுப்புலட்சுமியின் வாழ்க்கையைப் பற்றிய மிகப்பெரிய சினிமா அனுபவமாக அமையுமா என்ற எதிர்பார்ப்பை ரசிகர்கள் மத்தியில் ஏற்படுத்தியுள்ளது.