'குக் வித் கோமாளி' முதல் சீசனில் இருந்து இந்த நிகழ்ச்சியை தொகுத்து வழங்கி வரும் ரக்சனின் சம்பளம் குறித்த தகவல் தற்போது வெளியாகியுள்ளது.
ஒரு ரேடியோ ஜாக்கியாக தன்னுடைய பணியை துவங்கி, பின்னர் ராஜ் டிவியில் வீடியோ ஜாக்கியாக மாறியவர் இன்று முன்னணி தொகுப்பாளர்களில் ஒருவராக இருக்கும் ரக்சன்.
கடந்த 2015 ஆம் ஆண்டு, 'கலக்கப்போவது யாரு' சீசன் 5 நிகழ்ச்சியை தொகுத்து வழங்க துவங்கிய இவர், இதைத் தொடர்ந்து கலக்கப்போவது யாரு சீசன் 6, கலக்கப்போவது யாரு சீசன் 7, என அடுத்தடுத்து விஜய் டிவியில் நிகழ்ச்சிகளை தொகுத்து வழங்கி வந்தார்.
'ஜோடி ஃபன் அன்லிமிடெட்' என்கிற நிகழ்ச்சியில் போட்டியாளராக கலந்து கொண்ட ரக்சன், செமி பைனலில் நிகழ்ச்சிகள் விட்டு வெளியேறினார். இதை தொடர்ந்து வழக்கம்போல் தன்னுடைய தொகுப்பாளர் பணியை துவங்கிய இவர் 'ரெடி ஸ்டெடி போ' நிகழ்ச்சிக்கு பின், 2019 ஆம் ஆண்டு துவங்கப்பட்ட 'குக் வித் கோமாளி' நிகழ்ச்சியை தொகுத்து வழங்க தொடங்கினார்.
தொடர்ந்து நான்கு சீசன்களாக இந்த நிகழ்ச்சியை தொகுத்து வழங்கி வரும் இவர், தற்போது ஐந்தாவது சீசனையும் தொகுத்து வழங்க உள்ளார். 'குக் வித் கோமாளி' சீசன் 5 நிகழ்ச்சி அடுத்த மாதம் துவங்க உள்ள நிலையில், இதில் தொகுப்பாளராக ரக்சன் மற்றும் மணிமேகலை இருவரும் களமிறங்க உள்ளனர்.
இந்நிலையில், குக் வித் கோமாளி நிகழ்ச்சியை தொகுத்து வழங்க இவர் வாங்கும் சம்பளம் குறித்த தகவல் தற்போது வெளியாகி உள்ளது. அதன்படி கடந்த சீசன் முதல் 1.5 லட்சம் சம்பளமாக வாங்கி வந்த இவர், இந்த சீசனில் 2 லட்சம் சம்பளம் வாங்க உள்ளதாக கூறப்படுகிறது. அதை போல் மணிமேகலை 75 ஆயிரம் முதல் ஒரு லட்சம் வரை சம்பளம் பெறலாம் என கூறப்படுகிறது. இந்த தகவல் தற்போது சமூக வலைதளத்தில் வைரலாகி வருகிறது. ஆனால் இதுகுறித்து எந்த ஒரு அதிகார பூர்வ தகவலும் வெளியாகவில்லை.
கடந்த 2020 ஆம் ஆண்டு வெளியான 'கண்ணும் கண்ணும் கொள்ளையடித்தால்' படத்தில் துல்கர் சல்மானுக்கு நண்பராக நடித்திருந்த ரக்சன் , இதைத்தொடர்ந்து 'மறக்குமா நெஞ்சம்' படத்தில் நடித்திருந்தார். தற்போது சூப்பர் ஸ்டார் ரஜினிகாந்த் நடித்த வரும் 'வேட்டையன்' படத்தில் முக்கிய கதாபாத்திரத்தில் நடித்து வருவது குறிப்பிடத்தக்கது.