Annamalai Speech : மேகதாது அணைத் திட்டத்தால் தமிழ்நாட்டின் நலன்கள் பாதிக்கப்படக் கூடாது என 'வி தி லீடர்ஸ்' இயக்கத்தின் நிறுவனர் கே. அண்ணாமலை தெரிவித்துள்ளார்.
தமிழ்நாடு பாஜகவின் முன்னாள் மாநிலத் தலைவரும், ‘வி தி லீடர்ஸ்’ இயக்கத்தின் நிறுவனருமான கே. அண்ணாமலை, மேகதாது அணை விவகாரத்தில் தமிழகத்தின் நலன்கள் எந்த வகையிலும் பாதிக்கப்படாத வகையில் தீர்வு காணப்பட வேண்டும் என்று தெரிவித்துள்ளார். காவிரி நீர் தொடர்பான இந்தப் பிரச்சினையில் தமிழ்நாடு மற்றும் கர்நாடக முதலமைச்சர்கள் நேரடியாக பேச்சுவார்த்தை நடத்தி, இரு மாநிலங்களுக்கும் ஏற்ற நியாயமான முடிவை எடுக்க வேண்டும் என்றும் அவர் வலியுறுத்தியுள்ளார்.
சென்னையில் நடைபெற்ற நிகழ்ச்சி ஒன்றில் பேசிய அண்ணாமலை, தமிழக மக்களின் நலனுக்காக தொடர்ந்து குரல் கொடுத்து வருவதாகக் குறிப்பிட்டார். பாஜகவில் இருந்த காலத்திலும் தமிழக பாஜக சார்பில் மேகதாது அணை திட்டத்திற்கு எதிர்ப்பு தெரிவிக்கப்பட்டதாக அவர் நினைவுகூர்ந்தார்.
தமிழக மக்களின் நலனும், சமூகத்தில் மாற்றத்தை ஏற்படுத்துவதுமே தனது அரசியல் பயணத்தின் முக்கிய நோக்கங்கள் என்றும் அவர் தெரிவித்தார். அதே நேரத்தில், பிரதமர் நரேந்திர மோடி மீது தனக்கு நம்பிக்கை இருப்பதாகவும் அண்ணாமலை கூறினார். இரு மாநிலங்களையும் பாதிக்கக்கூடிய விவகாரம் என்பதால், தமிழக மற்றும் கர்நாடக முதலமைச்சர்கள் ஒரே மேசையில் அமர்ந்து பேசி தீர்வு காண்பதே சரியான அணுகுமுறை என்றும் அவர் தெரிவித்தார்.
Related Articles
அண்ணாமலை ஓபன் டாக்
பெங்களூரு நகரின் குடிநீர் தேவையை கர்நாடக அரசு பூர்த்தி செய்ய வேண்டிய அவசியம் இருப்பதை அண்ணாமலை ஏற்றுக்கொண்டார். ஆனால், அந்தத் தேவையை நிறைவேற்றும் நடவடிக்கைகள் தமிழகத்தின் உரிமைகள் அல்லது நலன்களுக்கு பாதிப்பை ஏற்படுத்தும் வகையில் இருக்கக் கூடாது என்றும் அவர் குறிப்பிட்டார்.
காவிரி ஆற்றின் குறுக்கே மேகதாதுவில் அணை கட்டும் திட்டம் தொடர்பாக தமிழ்நாடு மற்றும் கர்நாடகா இடையே நீண்டகாலமாக கருத்து வேறுபாடு நிலவி வருகிறது. குறிப்பாக, அணை கட்டப்பட்டால் தமிழகத்திற்கு கிடைக்கும் காவிரி நீரின் அளவில் தாக்கம் ஏற்படலாம் என்ற அச்சம் தமிழக தரப்பில் தொடர்ந்து முன்வைக்கப்பட்டு வருகிறது.
அமித் ஷா அளித்த வாய்ப்பு குறித்து அண்ணாமலை
பாஜகவிலிருந்து விலகுவதற்கு முன்பு மத்திய உள்துறை அமைச்சர் அமித் ஷாவுடன் நடைபெற்ற உரையாடல் குறித்தும் அண்ணாமலை பேசினார். டெல்லிக்கு வந்து கட்சியில் ஒரு முக்கியப் பொறுப்பை ஏற்று சில ஆண்டுகள் பணியாற்றுமாறு அமித் ஷா தம்மிடம் கேட்டதாக அவர் தெரிவித்தார்.
எனினும், தமிழகத்திலேயே இருந்து மக்களுக்காக பணியாற்றுவதையே தான் தேர்வு செய்ததாக அண்ணாமலை கூறினார். பாஜகவில் இருந்தாலும், தற்போது கட்சிக்கு வெளியே இருந்தாலும் தமிழகத்திற்காகவும் சமூக மாற்றத்திற்காகவும் தொடர்ந்து செயல்படுவேன் என்றும் அவர் குறிப்பிட்டார்.
ஆட்சி மற்றும் ஊழல் குறித்தும் விமர்சனம்
மாநில அரசின் செயல்பாடுகள் குறித்தும் அண்ணாமலை தனது கருத்துகளை முன்வைத்தார். தற்போதைய ஆட்சிக்கு போதிய கால அவகாசம் வழங்கி அதன் செயல்பாட்டை மதிப்பிட வேண்டும் என்று கூறிய அவர், நிர்வாகத்தில் தவறுகள் இருப்பது தெரியவந்தால் அதற்கு எதிராக முதலில் குரல் கொடுப்போம் என்றும் தெரிவித்தார். மேலும், மாநிலத்தில் ஊழல் மீண்டும் தலைதூக்கியுள்ளதாகவும், சில அமைச்சர்கள் லஞ்சம் பெறுவதாக தமக்கு தகவல்கள் கிடைத்துள்ளதாகவும் அண்ணாமலை குற்றம்சாட்டினார். இதுதொடர்பாக தன்னிடம் ஆடியோ ஆதாரம் இருப்பதாகவும் அவர் கூறினார்.
முதலமைச்சர் ஊழலை கட்டுப்படுத்த விரும்பினால், அமைச்சரவையில் இருப்பவர்களும் அதே கொள்கையை கடைப்பிடிக்கிறார்களா என்பதை உறுதி செய்ய வேண்டும் என்றும் அண்ணாமலை வலியுறுத்தினார். மேகதாது அணை விவகாரம், தமிழக அரசின் செயல்பாடுகள் மற்றும் ஊழல் குற்றச்சாட்டுகள் என பல்வேறு அரசியல் விவகாரங்கள் குறித்து அண்ணாமலை முன்வைத்துள்ள இந்தக் கருத்துகள் தற்போது தமிழக அரசியல் களத்தில் கவனம் பெற்றுள்ளன.
