Salads: கோடைகால வெப்பத்தை தணிக்க 5 சுலபமான நீர்ச்சத்து சாலட் ரெசிபிக்கள்!
கோடை காலத்தில் நம் உடலை குளிர்ச்சியாகவும், நீர்ச்சத்தோடும் (hydration) வைத்திருப்பது மிகவும் அவசியம். அதே சமயம், அதிக கலோரி இல்லாத, வயிற்றை நிரப்பக்கூடிய உணவுகளைத் தேர்ந்தெடுப்பது நல்லது. நீர்ச்சத்து அதிகம் நிறைந்த 5 ஆரோக்கியமான சாலட் ரெசிபிக்கள் இதோ
வெள்ளரிக்காய் மற்றும் புதினா சாலட் :
வெள்ளரிக்காயில் 90 சதவீதத்திற்கும் மேல் நீர்ச்சத்து நிறைந்துள்ளது. இது உடலின் வெப்பத்தை தணிப்பதில் முதலிடம் வகிக்கிறது.
செய்முறை: வெள்ளரிக்காயை சிறு துண்டுகளாக நறுக்கி, அதனுடன் புதிய புதினா இலைகளைச் சேர்க்கவும். சிறிதளவு எலுமிச்சை சாறு, உப்பு மற்றும் மிளகுத்தூள் தூவி நன்கு கலக்கினால், மிகவும் சுவையான மற்றும் குளிர்ச்சியான சாலட் தயார்.
தர்பூசணி மற்றும் ஃபெட்டா சீஸ் சாலட் :
கோடைகாலத்தின் ஸ்பெஷல் பழமான தர்பூசணி, உடலின் நீர் தேவையை பூர்த்தி செய்வதுடன், இனிப்பு சாப்பிட வேண்டும் என்ற ஆவலையும் கட்டுப்படுத்துகிறது.
செய்முறை: தர்பூசணி துண்டுகளுடன் சிறிதளவு ஃபெட்டா சீஸ் (feta cheese) மற்றும் புதினா இலைகளைச் சேர்க்கவும். இனிப்பும் உப்பும் கலந்த இந்த வித்தியாசமான சுவை, நாவிற்கு நல்ல விருந்தாக அமையும்.
லெட்டியூஸ், தக்காளி மற்றும் குடைமிளகாய் சாலட் :
இந்த மூன்று காய்கறிகளிலுமே நீர்ச்சத்து அதிகம் மற்றும் கலோரிகள் மிகக் குறைவு. இதில் உடலுக்குத் தேவையான வைட்டமின்களும், செரிமானத்திற்கு உதவும் நார்ச்சத்தும் (fibre) நிறைந்துள்ளன.
செய்முறை: லெட்டியூஸ் இலைகள், தக்காளி மற்றும் வண்ணமயமான குடைமிளகாய்களை நறுக்கி ஒன்றாக்கிக் கொள்ளவும். சிறிதளவு ஆலிவ் ஆயில் மற்றும் எலுமிச்சை சாறு சேர்த்துப் பரிமாறலாம். இது பசியை நன்கு கட்டுப்படுத்தும்.
முட்டக்கோஸ் மற்றும் கேரட் சாலட் :
முட்டக்கோஸில் நீர்ச்சத்தும் நார்ச்சத்தும் மிக அதிகம். கேரட் உடலுக்குத் தேவையான ஆன்டி-ஆக்ஸிடன்ட்டுகளை வழங்குகிறது.
செய்முறை: பொடியாக நறுக்கிய முட்டக்கோஸ் மற்றும் துருவிய கேரட்டை ஒன்றாகக் கலக்கவும். இதனுடன் சுவைக்காகவும் ஆரோக்கியத்திற்காகவும் குறைந்த கொழுப்புள்ள தயிர் (yoghurt) சேர்த்து மிக்ஸ் செய்து சாப்பிடலாம். இது மொறுமொறுப்பான, வயிறு நிறையும் சிறந்த சாலட் ஆகும்.
ஸ்ட்ராபெரி மற்றும் கீரை சாலட் :
ஸ்ட்ராபெரி பழங்களில் நீர்ச்சத்து அதிகம். பசலைக்கீரை (spinach) உடலுக்குத் தேவையான இரும்புச்சத்து மற்றும் அத்தியாவசிய ஊட்டச்சத்துக்களை வழங்குகிறது.
செய்முறை: பசலைக்கீரை இலைகளுடன் நறுக்கிய ஸ்ட்ராபெரி துண்டுகளைச் சேர்க்கவும். கூடுதல் சுவைக்காகவும், நல்ல கொழுப்புக்காகவும் சில பாதாம் அல்லது பூசணி விதைகளை (seeds) மேலே தூவி சாப்பிடலாம்.
