Silent Walking : அமைதியான நடைப்பயிற்சி மன அழுத்தத்தைக் குறைப்பது எப்படி?
சைலண்ட் வாக்கிங் என்பது ஹெட்போன், இசை, பாட்காஸ்ட் போன்ற டிஜிட்டல் இடையூறுகள் இன்றி அமைதியாக நடக்கும் நல்வாழ்வுப் பயிற்சியாகும். தினமும் 20-30 நிமிடங்கள் இப்படி நடப்பது மன அழுத்தத்தைக் குறைத்து, மனத் தெளிவையும் உடல் புத்துணர்ச்சியையும் தரும்.
சைலண்ட் வாக்கிங் (Silent Walking) என்றால் என்ன?
இன்றைய காலத்தில் நாம் நடக்கும்போது கூட பாடல்கள் கேட்பது, போன் பேசுவது அல்லது பாட்காஸ்ட் கேட்பது என ஏதேனும் ஒரு டிஜிட்டல் தொடர்பில் இருக்கிறோம். ஆனால் "சைலண்ட் வாக்கிங்" என்பது உங்கள் ஹெட்போன்களை கழற்றி வைத்துவிட்டு, போனைப் பயன்படுத்தாமல் அமைதியாக நடக்கும் ஒரு எளிமையான பயிற்சி. இது வெறும் உடற்பயிற்சி மட்டுமல்ல, மனதை ஒருமுகப்படுத்தும் "நடைப்பயிற்சி தியானம்" (Walking Meditation) ஆகும்.
டிஜிட்டல் சத்தத்திலிருந்து ஒரு விடுதலை :
காலை எழுந்தது முதல் இரவு தூங்கும் வரை நமது மூளை தொடர் செய்திகள், அறிவிப்புகள் (Notifications) மற்றும் சமூக ஊடகத் திரைகளால் சோர்ந்துபோகிறது. இந்த தொடர் டிஜிட்டல் சத்தம் மனச்சோர்வையும், கவனச்சிதறலையும் உண்டாக்குகிறது. சைலண்ட் வாக்கிங் செய்யும்போது, மூளைக்குத் தேவையான ஓய்வும், டிஜிட்டல் தகவல்களில் இருந்து முழுமையான விடுதலையும் கிடைக்கிறது.
மன அழுத்தம் குறையும், மன தெளிவு அதிகரிக்கும் :
அமைதியான சூழலில் நடக்கும்போது, உடலின் மன அழுத்த ஹார்மோனான கார்டிசோல் (Cortisol) அளவு குறைகிறது. இதனால் பதற்றம் மற்றும் மன உளைச்சல் குறைந்து, மனநிலை (Mood) சீராகிறது. மேலும், புதிய யோசனைகள் உதிக்கவும், பிரச்சனைகளுக்குத் தெளிவான தீர்வு காணவும் இந்த அமைதி வழிவகுக்கிறது.
உடலளவிலும் கிடைக்கும் நன்மைகள் :
இந்த அமைதியான நடைப்பயிற்சி மனநலனுக்கு மட்டுமல்லாமல், உடல் நலனுக்கும் சிறந்தது. இது ரத்த அழுத்தத்தைக் கட்டுப்படுத்தவும், இதய ஆரோக்கியத்தை மேம்படுத்தவும், இரவு நேரங்களில் சீரான தூக்கத்தைப் பெறவும் உதவுகிறது. தீவிரமான ஜிம் பயிற்சிகளை விட, தினமும் அமைதியாக நடப்பது மிகவும் எளிமையான, நீடித்த ஆரோக்கியப் பழக்கமாகும்.
சைலண்ட் வாக்கிங்கை எளிதாகத் தொடங்குவது எப்படி?
நேரம்: தினமும் 15 முதல் 30 நிமிடங்கள் ஒதுக்கலாம்.
போன் வேண்டாம்: நடைப்பயிற்சியின் போது போனை சைலண்ட் மோடில் வைக்கவும் அல்லது வீட்டில் வைத்துவிட்டுச் செல்லவும்.
இயற்கையைக் கவனியுங்கள்: பூங்கா அல்லது அமைதியான தெருக்களில் நடக்கும்போது, உங்கள் மூச்சுக்காற்று, காலடிகளின் ஓசை மற்றும் சுற்றியுள்ள இயற்கைச் சத்தங்களை மட்டும் கவனியுங்கள்.
