எம்.ஏ.சிதம்பரம் மைதானத்தில் டாஸ் ஜெயித்தால் என்ன செய்ய வேண்டும்? 7 போட்டிகளின் முடிவு கொடுத்த ஹிண்ட்!

ஐபிஎல் 2024 கிரிக்கெட் தொடரின் 17ஆவது சீசன் சாம்பியன் யார் என்பது இன்னும் 2 நாட்களில் தெளிவாக தெரிந்துவிடும். இதுவரையில் கொல்கத்தா நைட் ரைடர்ஸ் அணியானது 2 முறை சாம்பியனாகியுள்ளது. இதே போன்று ராஜஸ்தான் ராயல்ஸ் மற்று சன்ரைசர்ஸ் ஹைதராபாத் அணிகள் தலா ஒரு முறை டிராபியை கைப்பற்றியுள்ளன.

ஐபிஎல் குவாலிஃபையர் 1ல் கொல்கத்தா நைட் ரைடர்ஸ் வெற்றி பெற்று ஏற்கனவே இறுதிப் போட்டிக்கு முன்னேறியுள்ளது. இதையடுத்து இன்று நடைபெற்ற எலிமினேட்டர் சுற்று போட்டியில் ராஜஸ்தான் ராயல்ஸ் வெற்றி பெற்றது. இதைத் தொடர்ந்து குவாலிஃபையர் 2 சுற்று போட்டியில் சன்ரைசர்ஸ் ஹைதராபாத் மற்றும் ராஜஸ்தான் ராயல்ஸ் அணிகள் மோதுகின்றன.

இந்தப் போட்டி நாளை சென்னை, எம்.ஏ.சிதம்பரம் மைதானத்தில் நடைபெறுகிறது. இந்த மைதானத்தில் முதல் முறையாக இரு அணிகளும் மோதுகின்றன. ஆனால், இதற்கு முன்னதாக சன்ரைசர்ஸ் ஹைதராபாத் விளையாடிய 10 போட்டிகளில் ஒரு போட்டியில் மட்டுமே வெற்றி பெற்றுள்ளது. மேலும், 8 போட்டிகளில் தோல்வி அடைந்துள்ளது. ஒரு போட்டி டையில் முடிந்துள்ளது.

இதே போன்று ராஜஸ்தான் ராயல்ஸ் இந்த மைதானத்தில் விளையாடிய 9 போட்டிகளில் 2 வெற்றி, 7 தோல்வி அடைந்துள்ளது. இதுவரையில் இந்த மைதானத்தில் மொத்தமாக 83 போட்டிகள் நடந்துள்ளது. இதில் முதலில் பேட்டிங் செய்த அணி 48 போட்டியிலும், 2ஆவது பேட்டிங் செய்த அணி 35 போட்டியிலும் வெற்றி பெற்றுள்ளன.

இந்த மைதானத்தில் கடைசியாக நடைபெற்ற 10 போட்டிகளில் முதலில் பேட்டிங் செய்த அணி 3 போட்டியிலும் 2ஆவது பேட்டிங் செய்த அணி 7 போட்டியிலும் வெற்றி பெற்றுள்ளன. இந்த ஆண்டு நடைபெற்ற 7 போட்டிகளில் முதலில் பேட்டிங் செய்த அணி ஒரு போட்டியிலும், 2ஆவது பேட்டிங் செய்த அணி 6 போட்டியிலும் வெற்றி பெற்றுள்ளன என்பது குறிப்பிடத்தக்கது.

அதன்படி பார்த்தால் இன்று நடைபெறும் போட்டியில் டாஸ் ஜெயிக்கும் அணியானது பவுலிங் தேர்வு செய்ய வேண்டும் என்பது குறிப்பிடத்தக்கது.