போனில் டைம் டிராவல் செய்த 'மார்க் ஆண்டனி' பாக்ஸ் ஆபிசில் ஜெயித்தாரா? முதல் நாள் வசூல் விவரம் இதோ..!
இயக்குனர் ஆதிக் ரவிச்சந்திரன் இயக்கத்தில் விஷால், எஸ்.ஜே.சூர்யா நடிப்பில் வித்தியாசமான கதைக்களத்தில் வெளியாகியுள்ள 'மார்க் ஆண்டனி' திரைப்படத்தின் முதல் நாள் வசூல் குறித்த தகவல் தற்போது வெளியாகியுள்ளது.
விஷால் நடித்து வெளியான 'துப்பறிவாளன்' படத்திற்கு பின்னர், இவர் நடிப்பில் அடுத்தடுத்து வெளியான படங்கள் தோல்வியை தழுவிய நிலையில், விஷால் மிகப்பெரிய எதிர்பார்ப்புக்கு மத்தியில், நடித்து முடித்திருந்த திரைப்படம் 'மார்க் ஆண்டனி'. இந்த படத்தை, இயக்குனரும் - நடிகருமான ஆதிக் ரவிச்சந்திரன் இயக்கி இருந்தார்.
ஹீரோவாக விஷால் நடிக்க, முக்கிய கீ ரோலில் எஸ்.ஜே.சூர்யா நடித்துள்ளார். விஷாலுக்கு ஜோடியாக நடிகை ரித்து வர்மா நடித்திருந்தார். இவர்களை தவிர... செல்வராகவன், சுனில், விநாயகன் என மிகப்பெரிய நட்சத்திர பட்டாளமே 'மார்க் ஆண்டனி' படத்தில் நடித்திருந்தது. இந்த படத்தை மினி ஸ்டூடியோஸ் நிறுவனம் தயாரிக்க, ஜிவி பிரகாஷ் குமார் இசையமைத்து உள்ளார்.
இதுவரை வெளியான டைம் டிராவல் படங்களில் இருந்து சற்று வித்தியாசமாக, போன் மூலம் டைம் டிராவல் செய்யும் களத்தில் கலகலப்புக்கு பஞ்சம் இல்லாமல் இயக்கி இருந்தார் ஆதிக் ரவிச்சந்திரன். தமிழ் - தெலுங்கு ஆகிய இருமொழிகளில் இப்படம் நேற்று உலகம் முழுவதும் வெளியான நிலையில் தொடர்ந்து ரசிகர்கள் மத்தியில் பாசிட்டிவ் விமர்சனங்களை பெற்று வந்தது.
சுமார் 40 கோடி பட்ஜட்டில் எடுக்கப்பட்ட இந்த படம், முதல் நாளில் மட்டும் இந்தியாவில் சுமார் 5 கோடி வசூலித்துள்ளதாக கூறப்படுகிறது. அடுத்தடுத்து 3 நாட்கள் விடுமுறை நாட்கள் என்பதாலும், படத்திற்கு பாசிட்டிவ் விமர்சனங்கள் கிடைத்து வருவதாலும் வசூல் அதிகரிக்க கூடும் என தெரிவிக்கப்பட்டுள்ளது. மேலும் 'மார்க் ஆண்டனி' படம் மூலம் சில வருடங்களுக்கு பின்னர் மீண்டும் தன்னுடைய வெற்றியை விஷால் உறுதி செய்துள்ளார் என்பது குறிப்பிடத்தக்கது.