இது நடந்தால் மட்டுமே ஆர்சிபி 2ஆவது தகுதிச் சுற்று போட்டிக்கு முன்னேறும்!

இதற்கு முன்னதாக இரு அணிகளும் 31 போட்டிகளில் விளையாடியுள்ளன. இதில் ராயல் சேலஞ்சர்ஸ் பெங்களூரு அதிகபட்சமாக 15 போட்டிகளிலும், ராஜஸ்தான் ராயல்ஸ் 13 போட்டிகளிலும் வெற்றி பெற்றுள்ளன. 3 போட்டிகளுக்கு முடிவு எட்டப்படவில்லை.

இந்த சீசனில் இரு அணிகளும் மோதிய ஒரு போட்டியில் ராஜஸ்தான் ராயல்ஸ் 6 விக்கெட்டுகள் வித்தியாசத்தில் வெற்றி பெற்றது. இந்தப் போட்டியில் தான் விராட் கோலி 113 ரன்கள் எடுத்து ஆட்டமிழக்காமல் இருந்தார். இதே போன்று ராஜஸ்தான் அணியில் ஜோஸ் பட்லர் 100 விளாசி அணியின் வெற்றிக்கு வித்திட்டார்.

இந்த சீசனில் ராஜஸ்தான் ராயல்ஸ் விளையாடிய முதல் 8 போட்டிகளில் 7 வெற்றி, ஒரு தோல்வி பெற்றிருந்தது. ஆனால், கடைசியாக நடைபெற்ற 6 போட்டிகளில் ஒரு வெற்றி, 4 தோல்வி அடைந்தது. இதில், ஒரு போட்டி ரத்து செய்யப்பட்டது.

ஆனால், ஆர்சிபி முதலில் விளையாடிய 8 போட்டிகளில் ஒரு வெற்றி மட்டுமே பெற்று புள்ளிப்பட்டியலில் 10ஆவது இடத்தில் இருந்தது. கடைசியாக விளையாடிய 6 போட்டியிலும் வெற்றி பெற்று 4ஆவது அணியாக பிளே ஆஃப் சுற்றுக்கு முன்னேறியது. 6 வெற்றி என்ற நம்பிக்கையுடன் இன்று நடைபெறும் எலிமினேட்டர் சுற்று போட்டியில் விளையாடுகிறது.

இந்தப் போட்டி அகமதாபாத்தில் நடைபெறுகிறது. இதில் வெற்றி பெறும் அணி 2ஆவது தகுதிச் சுற்றுக்கு முன்னேறும். தோல்வி அடையும் அணியானது ஐபிஎல் தொடரிலிருந்து வெளியெறும். இந்த மைதானத்தில் இரு அணிகளும் 2 போட்டியில் விளையாடியுள்ளன. இதில், இரு அணிகளும் தலா ஒரு போட்டியில் வெற்றி பெற்றுள்ளன.

தற்போது 2ஆவது முறையாக மோதுகின்றன. இந்த மைதானத்தில் 2ஆவது பேட்டிங் செய்த அணியே அதிகளவில் வெற்றி பெற்றிருக்கிறது. நேற்று நடைபெற்ற முதல் தகுதிச் சுற்று போட்டியில் கூட டாஸ் வென்ற சன்ரைசர்ஸ் ஹைதராபாத் 8 விக்கெட்டுகள் வித்தியாசத்தில் தோல்வி அடைந்துள்ளது.

முதலில் பேட்டிங் செய்த சன்ரைசர்ஸ் ஹைதராபாத் அனைத்து விக்கெட்டுகளையும் இழந்து 159 ரன்கள் மட்டுமே எடுத்தது. பின்னர் விளையாடிய கொல்கத்தா நைட் ரைடர்ஸ் 13.4 ஓவர்களில் 2 விக்கெட்டுகளை இழந்து 164 ரன்கள் எடுத்து 8 விக்கெட்டுகள் வித்தியாசத்தில் வெற்றி பெற்றது என்பது குறிப்பிடத்தக்கது.

இந்த மைதானத்தில் இதுவரையில் நடைபெற்ற 33 போட்டிகளில் முதலில் பேட்டிங் செய்த அணி 15 போட்டியிலும், சேஸ் செய்த அணி 18 போட்டியிலும் வெற்றி பெற்றுள்ளன. இந்த சீசனில் இந்த மைதானத்தில் நடைபெற்ற 6 போட்டிகளில் முதலில் பேட்டிங் செய்த அணி 2 போட்டியிலும், 2ஆவது பேட்டிங் செய்த அணி 4 போட்டியிலும் வெற்றி பெற்றுள்ளன என்பது குறிப்பிடத்தக்கது.

இந்த மைதானத்தில் அதிகபட்சமாக 234 ரன்கள் எடுக்கப்பட்டுள்ளது. குறைந்தபட்சமாக 66 ரன்கள் எடுக்கப்பட்டுள்ளது. அதிகபட்சமாக 166 ரன்கள் எடுத்து சேஸ் செய்யப்பட்டுள்ளது. குறைந்தபட்சமாக 107 ரன்கள் எடுத்து பாதுகாக்கப்பட்டுள்ளது.