ரஜினி நடிச்சும் இந்த நிலைமையா? பாக்ஸ் ஆபிஸில் பயங்கர அடி வாங்கிய லால் சலாம் - முதல் நாள் வசூல் இவ்வளவுதானா?
ரஜினியின் மகள் ஐஸ்வர்யா இயக்கத்தில் விஷ்ணு விஷால், விக்ராந்த் நடிப்பில் திரைக்கு வந்துள்ள லால் சலாம் படத்தின் முதல் நாள் வசூல் நிலவரம் வெளியாகி உள்ளது.
Lal salaam
3, வை ராஜா வை போன்ற படங்களை இயக்கிய ஐஸ்வர்யா ரஜினிகாந்த், சுமார் 9 ஆண்டு இடைவெளிக்கு பின் இயக்கி உள்ள திரைப்படம் தான் லால் சலாம். இப்படத்தை லைகா நிறுவனம் சார்பில் சுபாஸ்கரன் தயாரித்துள்ளார். சுமார் ரூ.40 கோடி பட்ஜெட்டில் பிரம்மாண்டமாக தயாரிக்கப்பட்டுள்ள இப்படத்திற்கு இசைப்புயல் ஏ.ஆர்.ரகுமான் இசையமைத்து உள்ளார். கிரிக்கெட்டை மையமாக வைத்து இப்படத்தை இயக்கி இருந்தார் ஐஸ்வர்யா ரஜினிகாந்த்.
Lal salaam Rajinikanth
லால் சலாம் படத்தில் கதையின் நாயகர்களாக விஷ்ணு விஷால் மற்றும் விக்ராந்த் ஆகியோர் நடித்துள்ளனர். இப்படத்தில் சூப்பர்ஸ்டார் ரஜினிகாந்த், மொய்தீன் பாய் ஆக சிறப்பு தோற்றத்தில் நடித்துள்ளார். மேலும் இதில் ரஜினிக்கு ஜோடியாக நடிகை நிரோஷா நடித்திருக்கிறார். இதுதவிர நடிகைகள் ஜீவிதா, தன்யா பாலகிருஷ்ணன், நகைச்சுவை நடிகர்கள் செந்தில், தம்பி ராமையா, தங்கதுரை ஆகியோரும் இப்படத்தில் முக்கிய கதாபாத்திரத்தில் நடித்துள்ளனர்.
இதையும் படியுங்கள்... ராக்கி பாய்-ஐ போல் மாஸ் காட்டினாரா மொய்தீன் பாய்? லால் சலாம் படத்தின் விமர்சனம் இதோ
Lal salaam Box Office
லால் சலாம் திரைப்படம் நேற்று உலகமெங்கும் பிரம்மாண்டமாக ரிலீஸ் ஆனது. இப்படத்தை தமிழகம் முழுவதும் ரெட் ஜெயண்ட் மூவீஸ் நிறுவனம் தான் வெளியிட்டது. இதனால் அதிகப்படியான திரையரங்குகளில் லால் சலாம் ரிலீஸ் ஆனது. இப்படத்தில் ரஜினிகாந்த் கேமியோ ரோலில் நடித்திருந்தாலும், இதனை முழுக்க முழுக்க ரஜினிகாந்த் படமாகவே புரமோட் செய்தனர். இதனால் படத்தின் வசூலும் அதிகளவில் இருக்கும் என எதிர்பார்க்கப்பட்டது.
Lal Salaam Day 1 Collection
ஆனால் லால் சலாம் படத்திற்கு பாக்ஸ் ஆபிஸில் முதல் நாளில் எதிர்பார்த்த வசூல் கிடைக்கவில்லை. இப்படம் இந்திய அளவில் முதல் நாளில் ரூ.4.3 கோடி மட்டுமே வசூலித்து உள்ளது. மொத்தமாக உலகளவில் லால் சலாம் படத்தின் வசூல் ரூ.7 கோடிக்கும் குறைவாகவே இருக்கும் என கூறப்படுகிறது.
Lal salaam day 1 Box Office collection
ரஜினிகாந்த் நடித்தும் படத்திற்கு இப்படி ஒரு நிலைமையா என்கிற கேள்வி தான் எழுகிறது. கடைசியாக ரஜினி நடிப்பில் வெளிவந்த ஜெயிலர் திரைப்படம் முதல் நாள் உலகளவில் ரூ.98 கோடி வசூலை வாரிக்குவித்து இருந்தது. அதில் 10 சதவீத வசூலை கூட லால் சலாம் படம் எட்டாதது தான் ஆச்சர்யமாக உள்ளது. இனி அடுத்தடுத்த விடுமுறை தினங்கள் என்பதால் இப்படம் பாக்ஸ் ஆபிஸில் பிக் அப் ஆகும் என எதிர்பார்க்கப்படுகிறது.
இதையும் படியுங்கள்... என் அன்பு தாய் ஐஸ்வர்யாவுக்கு சலாம்... வீல் சேரில் அமர்ந்திருக்கும் அன்சீன் புகைப்படத்துடன் ரஜினி வாழ்த்து