தங்கலான் படப்பிடிப்பில் மூக்கில் காயத்தோடு விக்ரம்! அடையாளம் தெரியாமல் இப்படி ஆகிட்டாரே.. வைரலாகும் போட்டோஸ்!

'தங்கலான்' படத்தின் படப்பிடிப்பில் நடிகர் விக்ரம் கலந்து கொண்டு நடித்து வருவதை, தெரிவிக்கும் விதமாக இவர் மேக்கப் போடும் போட்டோஸ், சிலவற்றை வெளியிட... அவை தாறுமாறாக பார்க்கப்பட்டு வருகிறது.  

சமீபத்தில் 'தங்கலான்' படப்பிடிப்புக்காக தயாராகும், புகைப்படங்கள் சிலவற்றை நடிகை மாளவிகா மோகனன் வெளியிட்டு, 4 முதல் 5 மணி வரை தினமும் மேக்கப் போடுவதாக கூறியிருந்தார். இந்த புகைப்படம் சமூக வலைதளத்தில் வெளியாகி வைரலானது.

இதைத்தொடர்ந்து தற்போது நடிகர் விக்ரம், 'தங்கலான்' படப்பிடிப்புக்காக மேக்கப் போட்டு தயாராகும் புகைப்படங்களை வெளியிட, அவை தாறுமாறாக பார்க்கப்பட்டு வருவதோடு, எப்படி இருந்த விக்ரம் இப்படி ஆகிவிட்டாரே? என ரசிகர்கள் அதிர்ச்சி கேள்விகளை எழுப்பி வருகிறார்கள். அந்த அளவுக்கு 'தங்கலான்' படப்பிடிப்புக்காக ஆளே அடையாளம் தெரியாமல் மாறியுள்ளார் விக்ரம்.

இயக்குனர் பா.ரஞ்சித் இயக்கத்தில் சீயான் விக்ரம் ஹீரோவாக நடித்தவரும் திரைப்படம் 'தங்கலான்'. சமீபத்தில் விக்ரம், ஆதித்த கரிகாலனாக நடித்திருந்த 'பொன்னியின் செல்வன்'  திரைப்படத்தின் இரண்டு பாகங்களும், மிகப்பெரிய வெற்றி பெற்றது. ஆனால் இவர் தனி ஹீரோவாக நடித்து கடந்த இரண்டு மூன்று வருடங்களாக வெளியாகும் எந்த படமும் எதிர்பார்த்த அளவுக்கு வெற்றி பெறவில்லை.

எனவே ஒரு தனி ஹீரோவாக, தன்னுடைய வெற்றியை பதிவு செய்யும் கட்டாயத்தில் விக்ரம் தள்ளப்பட்டிருக்கும் நிலையில்.. வழக்கம்போல் தன்னுடைய வித்யாசமான பாணியில் விக்ரம் பல்வேறு ரிஸ்குகள் எடுத்த நடித்துவரும் திரைப்படம் தங்கலான். இப்படம் கேஜிஎப் பட பாணியில் தங்கம் எடுக்கும் தொழிலாளர்கள் கதையை மையமாக வைத்து எடுக்கப்பட்டு வருகிறது. எனவே இந்த படத்தின் மீதான எதிர்பார்ப்பு, ரசிகர்கள் மத்தியில் சற்று அதிகமாகவே காணப்படுகிறது.

இந்த படத்தில் விக்ரமுக்கு ஜோடியாக பார்வதி நடித்து வருகிறார். மேலும் மாளவிகா மோகனன், பசுபதி, ஹரி, பிரிட்டிஷ் நடிகர் டேனியல் கால்டகிரோன் ஆகியோர் முக்கிய கதாபாத்திரத்தில் நடித்து வருகிறார்கள்.  'தங்கலான்' படத்தின் படப்பிடிப்பு கடந்த ஆண்டு துவங்கிய நிலையில், இன்னும் ஒரு சில மாதங்களில் முடிவடையும் என கோலிவுட் வட்டாரத்தில் கூறப்படுகிறது.

மேலும் சமீபத்தில் நடிகர் விக்ரமின் காட்சிகள் எடுக்கப்பட்டபோது, அவர் கீழே விழுந்ததில் பலத்த காயங்கள் ஏற்பட்டதோடு, விலா எலும்பும் முறிந்தது.  இதை அடுத்து மருத்துவமனையில் அனுமதிக்கப்பட்டு தொடர் சிகிச்சைக்கு பின் தற்போது உடல் நலம் தேறியுள்ள விக்ரம், மீண்டும் 'தங்கலான்'  படப்பிடிப்பில் பங்கேற்க துவங்கியுள்ளார்.

இந்நிலையில் படப்பிடிக்காக மேக்கப் போட்டு தயாராகும் சில புகைப்படங்களை விக்ரம் தன்னுடைய சமூக வலைதளத்தில் வெளியிட்டுள்ளார். இந்த படத்தின் படப்பிடிப்பு தற்போது சென்னையில் நடைபெற்று வருகிறது. இதைத்தொடர்ந்து இறுதிக்கட்ட படப்பிடிப்பு மதுரையில் இன்னும் ஓரிரு வாரங்களில் துவங்கும் என்றும், இதோடு மொத்த படப்பிடிப்பையும் பா ரஞ்சித் முடிக்க முடிவு செய்துள்ளதாகவும் கூறப்படுகிறது.

மேலும் தற்போது வெளியாகி உள்ள விக்ரமின் புகைப்படத்தில், அவருக்கு மூக்கில் காயம் ஏற்பட்டது போன்ற மேக்கப் போடப்பட்டுள்ளது. மேலும் ஆளே அடையாளம் தெரியாத அளவுக்கு தாடி - மீசையோடு கண்ணம் எல்லாம் சுருங்கி, வேறு ஒரு விதமான லுக்கில் விக்ரம் இருக்கிறார். இந்த புகைப்படம் தற்போது வைரலாகி வருகிறது.