Weight Loss Tips: டயட், உடற்பயிற்சி செஞ்சும் வெயிட் குறையலையா? இதுதான் காரணம்!
Weight Loss Tips: கடுமையான டயட்டில் இருந்தும் உடல் எடை குறையவில்லையா என்று கவலைப்படுகிறீர்களா? நாம் செய்யும் சிறிய தவறுகள்தான் உடல் எடை குறையாமல் இருப்பதற்கு முக்கியக் காரணமாக அமைகின்றன. அவை என்னென்ன தவறுகள் என்பதைப் பற்றி விரிவாக பார்ப்போம்.
1. மாத்திரைகளின் பக்கவிளைவுகள்
சில வகையான மருந்துகளை உட்கொள்வது உடல் எடை அதிகரிப்பதற்கு வழிவகுக்கும். குறிப்பாக, மன அழுத்தம் மற்றும் மனநல பாதிப்புகளுக்கு எடுத்துக்கொள்ளும் மருந்துகள் (Antidepressants, Antipsychotics), கார்டிகோஸ்டீராய்டுகள், மற்றும் இரத்த அழுத்த மற்றும் சர்க்கரை நோய் மாத்திரைகள் ஆகியவை உடல் எடையை அதிகரிக்கச் செய்யும் முக்கியக் காரணங்களில் சிலவாகும்.
2. சாப்பாட்டிற்கு முன் தண்ணீர் குடிப்பதன் பயன்
தண்ணீர் குடிப்பது நமது உடல் மெட்டபாலிசத்தை அதிகரித்து, எடையை விரைவாகக் குறைக்க உதவுகிறது. உண்பதற்கு 30 நிமிடங்களுக்கு முன்பு சுமார் இரண்டு கப் (500 மி.லி) தண்ணீர் குடிப்பதன் மூலம் பசி கட்டுப்படுத்தப்பட்டு, நாம் உண்ணும் உணவின் அளவு இயற்கையாகவே குறையும்.
3. உணவில் காய்கறிகள் இல்லாதது
நாம் எவ்வளவு கலோரிகள் உட்கொள்கிறோம் என்பதை விட, எத்தகைய உணவுகளை உட்கொள்கிறோம் என்பது மிகவும் முக்கியமானதாகும். உணவில் காய்கறிகள் அல்லது நார்ச்சத்து குறைவாக இருந்தால், உடல் எடையைக் குறைப்பது மிகவும் கடினமான காரியமாகும்.
4. ஒரே இடத்தில் நீண்ட நேரம் உட்கார்ந்திருப்பது
வெறும் உடற்பயிற்சி மட்டும் செய்வது போதாது; நாள் முழுவதும் நீங்கள் எவ்வளவு சுறுசுறுப்பாக இருக்கிறீர்கள் என்பதும் அவசியமானது. மிக நீண்ட நேரம் ஒரே இடத்தில் உட்கார்ந்து வேலை செய்வது, ஒருநாளில் எரிக்கப்பட வேண்டிய கலோரி அளவைக் கணிசமாகக் குறைத்துவிடும்.
5. தைராய்டு மற்றும் பிசிஓஎஸ் பிரச்சனைகள்
ஹைப்போதைராய்டிசம் மற்றும் பிசிஓஎஸ் போன்ற உடல்நலப் பிரச்சனைகள் உடல் எடையை அதிகரிக்கச் கூடும். இத்தகைய பிரச்சனைகள் உள்ளவர்கள் தங்களது உடல் எடையைக் கட்டுக்குள் வைத்திருப்பது சவாலான ஒரு விஷயமாகும்.
6. அதிகப்படியான மன அழுத்தம்
அதிகப்படியான மன அழுத்தம் நமது உணவுப் பழக்கவழக்கங்களையும் உடல் எடையையும் கடுமையாக பாதிக்கும். மன அழுத்தத்தில் இருக்கும்போது ஏற்படும் ஹார்மோன் மாற்றங்களால் பசி அதிகரிக்கும்; இதன் காரணமாகப் பலரும் துரித உணவுகளை அதிகமாக உட்கொள்ளத் தொடங்குவார்கள்.
7. தூக்கமின்மை
நாம் செய்யும் மற்றுமொரு முக்கியத் தவறு சீரான மற்றும் ஆழமான தூக்கமின்மையாகும். ஒரு நாளைக்கு குறைந்தது 7 முதல் 8 மணி நேரம் தரமான தூக்கம் இல்லாத போது, உடலில் 'கிரெலின்' என்னும் பசியைத் தூண்டும் ஹார்மோன் அதிகரித்து, 'லெப்டின்' என்னும் நிறைவைத் தரும் ஹார்மோன் குறைகிறது.
இதனால் தேவையற்ற பசி ஏற்பட்டு, இரவு நேரங்களில் கண்ட உணவுகளை உண்ணத் தூண்டும். மேலும், போதுமான தூக்கமின்மை நமது உடலின் மெட்டபாலிசத்தை மெதுவாக்கி, நாம் உண்ணும் உணவைச் சரியாக எரிக்க முடியாமல் செய்து கொழுப்பாகச் சேமித்துவிடும். எனவே, முறையான டயட்டுடன் சீரான தூக்கமும் உடல் எடை இழப்புக்கு மிக அவசியமான ஒன்றாகும்.
