Diabetes: நைட் ஷிஃப்ட் வேலை பார்த்தால் சர்க்கரை நோய் வருமா? டாக்டர்கள் சொல்வது என்ன? இதை படிங்க!

Diabetes: இரவு நேரப் பணி இன்சுலின் எதிர்ப்புத்திறனை ஏற்படுத்தி, டைப் 2 சர்க்கரை நோய் அபாயத்தை அதிகரிக்கிறது என மருத்துவர்கள் கூறுகின்றனர். இது குறித்த முழு விவரங்களை விரிவாக பார்ப்போம்.

Image Credit : AI

நைட் ஷிஃப்ட் வேலை பார்த்தால் சர்க்கரை நோய் வருமா?

ஐடி துறை, பிபிஓ, மருத்துவமனை என பல துறைகளில் இரவு நேரப் பணி என்பது இப்போது சாதாரணமாகிவிட்டது. இப்படித் தொடர்ந்து நைட் ஷிஃப்டில் கண் விழித்து வேலை பார்ப்பவர்களுக்கு சர்க்கரை நோய் வருவதற்கான அபாயம் உள்ளதா என்ற சந்தேகம் பலருக்கும் இருக்கிறது. இதற்கான மருத்துவ ரீதியான பதில், 'நிச்சயமாக வாய்ப்புள்ளது' என்பதுதான்.

நமது உடல் இயற்கையாகவே பகலில் சுறுசுறுப்பாக இயங்குவதற்கும், இரவில் ஓய்வெடுப்பதற்கும் ஏற்ப வடிவமைக்கப்பட்டுள்ளது. இதனை உயிரியல் கடிகாரம் (Biological clock) என்று மருத்துவர்கள் குறிப்பிடுகிறார்கள். இந்த இயற்கையான சுழற்சியை மாற்றி அமைக்கும்போது உடலில் பல ரசாயன மாற்றங்கள் நிகழ்கின்றன.

Image Credit : Getty

இன்சுலின் சுரப்பில் ஏற்படும் சிக்கல்கள்

இரவு நேரங்களில் தொடர்ந்து விழித்திருக்கும்போது, உடலின் வளர்சிதை மாற்றம் கடுமையாக பாதிக்கப்படுகிறது. இதனால் கணையத்தில் இருந்து சுரக்கும் இன்சுலின் ஹார்மோனின் அளவு சீரற்ற நிலையை அடைகிறது. ரத்தத்தில் உள்ள சர்க்கரையின் அளவைக் கட்டுப்படுத்துவதில் இந்த இன்சுலின் மிக முக்கியப் பங்கு வகிக்கிறது.

தூக்கமின்மை காரணமாக உடலின் செல்கள் இன்சுலினைச் சரியாகப் பயன்படுத்த முடியாத நிலை (Insulin resistance) உருவாகிறது. இதுவே நாளடைவில் டைப் 2 சர்க்கரை நோயாக மாறுகிறது. அதேபோல, இரவில் விழித்திருக்கும்போது கார்டிசோல் எனப்படும் மன அழுத்த ஹார்மோன் இயல்பை விட அதிகமாக சுரக்கிறது.

இந்த ஹார்மோன் ரத்தத்தில் சர்க்கரையின் அளவை நேரடியாக அதிகரிக்கச் செய்யும் தன்மை கொண்டது. போதிய தூக்கம் இல்லாதவர்களுக்கு உடல் பருமன் ஏற்படுவதற்கான வாய்ப்புகளும் அதிகம். உடல் பருமனும் சர்க்கரை நோய்க்கு மிக முக்கியக் காரணியாக அமைகிறது.

பொதுவாக இரவு நேரங்களில் நமது கல்லீரல் குளுக்கோஸை உற்பத்தி செய்யும் பணியை குறைத்துக்கொள்ளும். ஆனால் விழித்திருந்து வேலை செய்யும்போது உடலுக்கு ஆற்றல் தேவைப்படுவதால், கல்லீரல் தொடர்ந்து குளுக்கோஸை ரத்தத்தில் கலக்கச் செய்கிறது. இதுவும் சர்க்கரை அளவு கட்டுப்பாட்டை மீற ஒரு முக்கியக் காரணமாகும்.

Image Credit : Getty

உணவுப் பழக்கமும் தூக்கமின்மையும்

நைட் ஷிஃப்ட் பார்ப்பவர்களின் உணவுப் பழக்கம் முற்றிலும் மாறுபட்டதாக இருக்கும். நள்ளிரவில் பசி எடுக்கும்போது, பெரும்பாலும் துரித உணவுகள் அல்லது அதிக கலோரி கொண்ட ஸ்நாக்ஸ் சாப்பிடுவதையே பலரும் வழக்கமாக கொண்டுள்ளனர். சரியான நேரத்தில் சத்தான உணவை சாப்பிடாதது சர்க்கரை நோய் அபாயத்தை பலமடங்கு அதிகரிக்கிறது.

பகலில் என்னதான் அடித்துப் போட்டது போல் தூங்கினாலும், அது இரவில் கிடைக்கும் இயற்கையான உறக்கத்திற்கு ஈடாகாது என்பதே நிதர்சனம். பகல் நேரத்து வெளிச்சம், வாகனச் சத்தம் போன்றவற்றால் தூக்கத்தின் தரம் குறைகிறது. இதனால் உடல் முழுமையான ஓய்வைப் பெறுவதில்லை.

வார இறுதி நாட்களில் அல்லது விடுமுறை தினங்களில் மீண்டும் பகல் நேரப் பழக்கத்திற்கு மாறுவது உடலின் சுழற்சியை மேலும் குழப்பமடையச் செய்யும். இந்தத் தொடர் மாற்றங்களால் ஏற்படும் பாதிப்பை மருத்துவத் துறையில் 'ஷிஃப்ட் ஒர்க் ஸ்லீப் டிஸ்ஆர்டர்' என்று அழைக்கிறார்கள்.

Image Credit : Getty

தற்காத்துக் கொள்வது எப்படி?

இரவு நேரப் பணியைத் தவிர்க்க முடியாதவர்கள், தங்களின் வாழ்க்கை முறையில் சில கட்டாய மாற்றங்களைக் கொண்டு வருவது அவசியம். ஷிஃப்ட் முடிந்து வீட்டுக்கு வந்ததும், இருட்டான மற்றும் அமைதியான அறையில் குறைந்தது 7 முதல் 8 மணி நேரம் தூங்குவதை உறுதி செய்ய வேண்டும்.

நள்ளிரவில் பசித்தால் எண்ணெயில் பொரித்த உணவுகளைத் தவிர்த்துவிட்டு, பழங்கள் அல்லது எளிதில் செரிமானமாகும் உணவுகளைச் சாப்பிடலாம். தினமும் குறைந்தது 30 நிமிடங்களாவது உடற்பயிற்சி செய்வது ரத்தச் சர்க்கரை அளவைக் கட்டுப்பாட்டில் வைக்கப் பெரிதும் உதவும்.