- Home
- உடல்நலம்
- kidney disease symptoms: பெண்களே உஷார்...இந்த அறிகுறிகள் இருந்தால் அலட்சியம் காட்டாதீங்க...கிட்னியை பாதிக்கும்
kidney disease symptoms: பெண்களே உஷார்...இந்த அறிகுறிகள் இருந்தால் அலட்சியம் காட்டாதீங்க...கிட்னியை பாதிக்கும்
சிறுநீரக பிரச்சனைகள் அல்லது நோய்களை முன்கூட்டியே சில எச்சரிக்கைகள் மூலம் நம்முடைய உடல் நமக்கு எச்சரிக்கும். சிறுநீரக பிரச்சனை இருந்தால் பெண்களுக்கு இந்த அறிகுறிகள் ஏற்படலாம். இவற்றை கண்டிப்பாக புறக்கணிக்காமல் கவனமாக இருக்க வேண்டும்.
பெண்கள் சிறுநீரக நோய் அறிகுறிகளை ஏன் குறிப்பாகக் கவனிக்க வேண்டும்?
பெண்களுக்கு சிறுநீரகப் பிரச்சனைகள் ஏற்படுவதற்கு சில காரணங்கள் உள்ளன. சிறுநீர் பாதை தொற்றுகள் (UTIs) பெண்களுக்கு அதிகம் வர வாய்ப்புள்ளது, ஏனெனில் அவர்களின் சிறுநீர்க்குழாய் மலக்குடலுக்கு அருகில் உள்ளது. இது பாக்டீரியாக்கள் எளிதில் சிறுநீர்ப்பையை அடைய வழிவகுக்கிறது. இந்த UTIs சரியாக சிகிச்சையளிக்கப்படாவிட்டால், அவை சிறுநீரகங்களுக்கு பரவி தீவிரமான பாதிப்புகளை ஏற்படுத்தலாம். மேலும், கர்ப்பகாலத்தில் ஏற்படும் சில ஹார்மோன் மாற்றங்கள் மற்றும் உடல் அழுத்தங்கள் சிறுநீரகங்களின் செயல்பாட்டை பாதிக்கலாம்.
கண்கள் மற்றும் கணுக்கால்களில் வீக்கம் :
காலையில் கண் இமைகளைச் சுற்றி வீக்கம் அல்லது கணுக்கால்கள், பாதங்கள் மற்றும் கைகளில் வீக்கம் ஏற்படுவது சிறுநீரக நோய் அறிகுறியாக இருக்கலாம். சிறுநீரகங்கள் உடலில் உள்ள அதிகப்படியான திரவங்களை வெளியேற்றத் தவறும்போது, இந்த வீக்கம் ஏற்படும். இந்த வீக்கம் ஓய்வுக்குப் பிறகும் தொடர்ந்தால், உடனடியாக மருத்துவரை அணுக வேண்டும்.
அதிகப்படியான சோர்வு :
போதுமான உறக்கத்திற்குப் பிறகும் தொடர்ந்து சோர்வாக உணர்வது சிறுநீரகப் பிரச்சனையின் அறிகுறியாக இருக்கலாம். சிறுநீரகங்கள் எரித்ரோபொயட்டின் (Erythropoietin) என்ற ஹார்மோனை உற்பத்தி செய்கின்றன. இது சிவப்பு இரத்த அணுக்களை உருவாக்க உதவுகிறது. சிறுநீரக செயல்பாடு குறையும்போது, இந்த ஹார்மோன் உற்பத்தியும் குறையும், இதனால் இரத்த சோகை ஏற்பட்டு, உடல் முழுவதும் சோர்வாகவும், பலவீனமாகவும் உணரலாம்.
சிறுநீரில் ஏற்படும் மாற்றங்கள் :
சிறுநீரின் நிறம், தன்மை அல்லது சிறுநீர் கழிக்கும் பழக்கத்தில் ஏற்படும் மாற்றங்கள் முக்கியமான அறிகுறிகள். சிறுநீரில் நுரை அல்லது குமிழ்கள் காணப்பட்டல் சிறுநீரில் புரதம் வெளியேறுவதாக இருக்கலாம். இரவில் அடிக்கடி சிறுநீர் கழித்தல், சிறுநீர் கழிக்கும்போது எரிச்சல் அல்லது வலி போன்றவை சிறுநீரக செயல்பாடு குறையும்போது தோன்றும் அறிகுறிகளாகும். சிறுநீரில் இரத்தம் கலந்து செல்லுதல் மிகவும் தீவிரமான அறிகுறியாகும்.
தசைப்பிடிப்பு :
குறிப்பாக, இரவில் திடீர் தசைப்பிடிப்பு ஏற்படுவது சிறுநீரகங்கள் இரத்தத்தில் கால்சியம், சோடியம் மற்றும் பொட்டாசியம் போன்ற எலக்ட்ரோலைட்டுகளின் அளவை சரியாகக் கட்டுப்படுத்த முடியாததைக் குறிக்கலாம். இந்த எலக்ட்ரோலைட் ஏற்றத்தாழ்வுகள் தசை செயல்பாட்டை பாதித்து பிடிப்புகளை ஏற்படுத்தும்.
மூச்சுத்திணறல் :
சிறுநீரக செயல்பாடு குறைபாட்டால் நுரையீரலில் திரவம் சேரும்போது அல்லது இரத்த சோகை காரணமாக உடலில் ஆக்ஸிஜன் பற்றாக்குறை ஏற்படும்போது மூச்சுத்திணறல் ஏற்படலாம். குறிப்பாக உடல் செயல்பாடுகளின் போது இது கவனிக்கப்பட வேண்டியது.
தோலில் அரிப்பு, வறட்சி அல்லது அசாதாரண உணர்வு :
சிறுநீரகங்கள் கழிவுப் பொருட்களை சரியாக வெளியேற்றாதபோது, நச்சுகள் உடலில் சேர்ந்து தோலில் அரிப்பு, வறட்சி, தடிப்புகள் அல்லது செதில் செதிலாக உதிர்வது போன்ற பிரச்சனைகளை ஏற்படுத்தலாம். எவ்வளவு லோஷன் பயன்படுத்தினாலும் இந்த அரிப்பு சரியாகாமல் இருக்கும்.
பசியின்மை மற்றும் குமட்டல் :
சிறுநீரக நோயின் அடுத்த கட்டங்களில், உடலில் நச்சுகள் குவிவதால் குமட்டல், வாந்தி மற்றும் பசியின்மை ஏற்படலாம். இது எடை இழப்புக்கு வழிவகுக்கும்.
முதுகுவலி :
முதுகுவலி பல காரணங்களால் ஏற்படலாம் என்றாலும், சிறுநீரகங்களுக்கு அருகில் ஏற்படும் தொடர்ச்சியான அல்லது தீவிரமான முதுகுவலி, குறிப்பாக விலா எலும்புகளுக்கு கீழே ஒரு பக்கமாக வலித்தால், அது சிறுநீரகப் பிரச்சனையின் அறிகுறியாக இருக்கலாம். சிறுநீரக கற்கள் அல்லது சிறுநீரக தொற்றுகள் இந்த வலியை ஏற்படுத்தலாம்.