- Home
- Lifestyle
- உங்களை சுற்றி இருக்கும் இந்த நபர்களால் முதுமை தோற்றம் வருமாம்.! இவர்களிடம் எச்சரிக்கையா இருங்க.!
உங்களை சுற்றி இருக்கும் இந்த நபர்களால் முதுமை தோற்றம் வருமாம்.! இவர்களிடம் எச்சரிக்கையா இருங்க.!
Stress and Biological Aging : நம்மை சுற்றி இருக்கும் நபர்கள் நம் வயதில் மிகப்பெரிய தாக்கத்தை ஏற்படுத்துவார்கள் என்று ஆய்வறிக்கை ஒன்று கூறுகிறது. அது குறித்து இந்த பதிவில் பார்க்கலாம்.
விரைவில் முதுமையடைச் செய்யும் மனிதர்கள்
வருடங்கள் செல்ல செல்ல மனிதர்களுக்கு வயதாவது இயல்புதான். இந்த பூமியில் ஜீவராசிகளாக பிறக்கும் ஒவ்வொருவரும் ஒரு நாள் மரணித்தே தீர வேண்டும். ஒரு மனிதனோ அல்லது விலங்கோ முதுமையை அடைந்த பிறகு மரணிக்க வேண்டும் என்பது நியதி. ஆனால் முதுமை என்பது சிலருக்கு முன்கூட்டியே வந்துவிடுவதாக சமீபத்திய ஆய்வு கட்டுரை ஒன்று கூறுகிறது. நம்மைச் சுற்றி இருக்கும் நபர்களால் நாம் விரைவாக முதுமை அடையக்கூடும் என்று அந்த ஆய்வு முடிவில் தெரியவந்துள்ளது. அது குறித்து இந்த பதிவில் பார்க்கலாம்.
சர்வதேச ஆய்வு முடிவுகள்
இந்த கண்டுபிடிப்புகள் தேசிய அறிவியல் அகாடமியின் (PNAS) சக மதிப்பாய்வு செய்யப்பட்ட இதழான Proceedings இல் வெளியிடப்பட்டுள்ளன. சர்வதேச அளவில் 2,600 நபர்களிடம் எடுக்கப்பட்ட ஆய்வு முடிவுகளின் படி, ஒருவருடைய வாழ்க்கையில் மன அழுத்தத்தை ஏற்படுத்தும் அல்லது நச்சுத்தன்மை கொண்டவர்கள் இருந்தால் அது அவர்களின் உயிரியல் முதுமையை துரிதப்படுத்துவது கண்டறியப்பட்டுள்ளது. இத்தகைய நபர்களுடன் தொடர்பில் இருப்பவர்கள் அதே வயதுடைய மற்றவர்களை விட சராசரியாக 9 மாதங்கள் கூடுதலாக முதுமையடைந்து காணப்படுகிறார்கள்.
‘ஹஸ்லர்ஸ்’
இந்த மன அழுத்தத்தை ஏற்படுத்துபவர்களை ஆராய்ச்சியாளர்கள் ‘ஹஸ்லர்ஸ்’ என்று அழைக்கிறார்கள். இவர்கள் தொடர்ந்து மற்றவர்களுக்கு மன அழுத்தம், பதற்றம் அல்லது உணர்ச்சி ரீதியான அழுத்தத்தை உருவாக்குவார்கள். ஒவ்வொரு கூடுதல் அழுத்தமான உறவும் ஒருவரது உயிரியல் முதுமையை சுமார் 1.5% வேகப்படுத்துவதாக கண்டறியப்பட்டுள்ளது. மன அழுத்தம் காரணமாக உடலில் கார்டிசோல் போன்ற ஹார்மோன்கள் தொடர்ந்து சுரப்பதாகவும், இது டிஎன்ஏவில் உள்ள டெலோமியார்ஸ் எனப்படும் பாதுகாப்பு உறைகளைக் குறைத்து செல்கள் விரைவாக முதுமையடைய காரணமாகிறது.
நிபுணர்களின் ஆலோசனை
மேலும் இதன் காரணமாக உடலில் மாற்றங்கள், உள் உறுப்புகளில் வீக்கம், இன்சுலின் எதிர்ப்பு, ரத்த நாளங்கள் பாதிப்பு, அதிக உடல் எடை, கவலை, மனச்சோர்வு ஆகியவற்றையும் ஏற்படுத்துவதாக கண்டறியப்பட்டுள்ளது. நிபுணர்களின் ஆலோசனைப்படி உறவுகளில் கவனமாக இருக்க வேண்டியது அவசியம். தொடர்ந்து எதிர்மறை எண்ணங்களை பரப்புபவர்களிடமிருந்து விலகி இருப்பது நல்லது. முழுமையாக விலக முடியாத குடும்பச் சூழலில் மாட்டிக் கொண்டவர்கள், தகுந்த இடைவெளியைப் பேணுவது ஆரோக்கியத்திற்கு சிறந்தது.
சரியான மனிதர்களை தேர்ந்தெடுங்கள்
மன அழுத்தத்தை தரும் மனிதர்கள் உங்கள் மனதை மட்டும் அல்ல, உங்கள் உடலின் செல்களையும் முதுமைடையச் செய்கிறார்கள். எனவே ஆரோக்கியமான நேர்மறையான சமூக வட்டத்தை அமைத்துக் கொள்வது நீண்ட ஆயுளுக்கு மட்டுமல்லாமல் உங்கள் இளமையான தோற்றத்தையும் தக்க வைப்பதற்கு உதவும்.
ஏஷ்யாநெட் தமிழ் நியூஸின் லைஃப்ஸ்டைல் பிரிவு, வாசகர்களுக்கு வாழ்க்கை முறை, உறவுகள் மற்றும் நடைமுறை வாழ்க்கை குறித்து வளமான தகவல்களை வழங்குகிறது. இதில் ஆரோக்கிய ஆலோசனைகள், உணவு மற்றும் ஊட்டச்சத்து குறிப்புகள், ஃபாஷன் டிரெண்ட்ஸ் மற்றும் தினசரி வாழ்க்கையை மேம்படுத்தும் சிந்தனையூட்டும் கருத்துகள் அடங்கும்.
