அஜித்துடன் பைக் ரைடு சென்ற வெற்றி துரைசாமி.. யாரும் பார்த்திடாத Unseen போட்டோஸ் இதோ..

அதிமுக முன்னாள் எம்.எல்.ஏ, சென்னை முன்னாள் மேயர் உள்ளிட்ட பதவிகளை வகித்தவர் சைதை துரைசாமி. இவர் தனது மனிதநேய அறக்கட்டளை மூலம் ஐஏஎஸ், ஐபிஎஸ் உள்ளிட்ட போட்டி தேர்வுகளுக்கு தயாராகும் மாணவர்களுக்கு பயிற்சி மையம் நடத்தி வருகிறார். இவரின் மகன் தான் வெற்றி துரைசாமி. தனது தந்தையின் அறக்கட்டளையை கவனித்து வந்த இவர் வனவிலங்கு புகைப்பட ஆர்வலராகவும் இருந்துள்ளார்.

மேலும் சினிமா மீது ஆர்வம் கொண்ட இவர் என்றாவது ஒரு நாள் என்ற படத்தின் மூலம் இயக்குனராக மாறினார். மேலும் சாகச பயணங்கள், சுற்றுலா செல்வதிலும் இவருக்கு அதிக ஆர்வம் இருந்துள்ளது. நடிகர் அஜித்திற்கும் நண்பர் ஆவார். இருவரும் அடிக்கடி சாகச பயணங்கள் மேற்கொண்டுள்ளனர். அஜித்துடன் இருக்கும் புகைப்படங்கள் அவர் வெளியிட்டிருந்தார். மேலும் வெற்றியின் திருமணத்திற்கு அஜித் தனது மனைவி ஷாலினியுடன் சென்று வாழ்த்தினார்.

இந்த நிலையில் புதிய படத்தின் படப்பிடிப்புக்காக ஹிமாலச்சல பிரதேசத்திற்கு லொகேஷன் பார்க்க சென்றார் வெற்றி துரைசாமி. கடந்த 4-ம் தேதி இவர் பயணித்த கார் சட்லஜ் ஆற்றில் விபத்துக்குள்ளானது. கார் டிரைவர் சடலமாக மீட்கப்பட்ட நிலையில், வெற்றி துரைசாமியின் உதவியாளர் கோபிநாத் படுகாயங்களுடன் மீட்கப்பட்டார்

இந்த விபத்தில் வெற்றி துரைசாமி மாயமானதை தொடர்ந்து பேரிடர் மீட்பு படையினர், தீயணைப்பு வீரர்கள் கடந்த 8 நாட்களாக அவரை தீவிரமாக தேடி வந்தனர். இந்த சூழலில் நேற்று முன் தினம் வெற்றியின் உடல் மீட்கப்பட்டது. தொடர்ந்து தனி விமானம் மூலம் நேற்று அவரின் உடல் சென்னை கொண்டுவரப்பட்டது.

சென்னை சிஐடி நகரில் உள்ள இல்லத்தில் அஞ்சலிக்காக வைக்கப்பட்ட வெற்றி துரைசாமியின் உடலுக்கு தமிழ்நாடு ஆளுநர் ஆர்.என்.ரவி, முதலமைச்சர் மு.க. ஸ்டாலின், அமைச்சர்கள், எதிர்க்கட்சி தலைவர் எடப்பாடி பழனிசாமி உள்ளிட்ட முக்கிய பிரமுகர்கள் அஞ்சலி செலுத்தினர்.

தனது நெருங்கிய நண்பராக இருந்த வெற்றி துரைசாமியின் உடலுக்கு நடிகர் அஜித்தும் நேரில் அஞ்சலி செலுத்தினார். தொடர்ந்து அவரின் உடல் இறுதி சடங்குகள் செய்யப்பட்டு தகனம் செய்யப்பட்டது. இந்த சூழலில் நடிகர் அஜித்துடன் பைக் ரைடு சென்ற போது வெற்றி துரைசாமி எடுத்துக்க்கொண்ட புகைப்படங்கள் தற்போது இணையத்தில் வைரலாகி வருகின்றன.