குவாலிஃபையர் 2 சுற்றில் 2 முறை விளையாடிய SRH 1 வெற்றி, 1 தோல்வி – இறுதிப் போட்டிக்கு முன்னேறுமா?

ஐபிஎல் கிரிக்கெட் திருவிழா இன்னும் 2 நாட்களில் முடிவடைகிறது. நடப்பு ஆண்டுக்கான ஐபிஎல் 2024 கிரிக்கெட் திருவிழா கடந்த மார்ச் 22 ஆம் தேதி சென்னை சேப்பாக்கம் மைதானத்தில் பிரம்மாண்டமாக தொடங்கியது. இதில், இடம் பெற்று விளையாடிய 10 அணிகளில் கொல்கத்தா நைட் ரைடர்ஸ், சன்ரைசர்ஸ் ஹைதராபாத், ராஜஸ்தான் ராயல்ஸ் மற்றும் ராயல் சேலஞ்சர்ஸ் பெங்களூரு அணிகள் பிளே ஆஃப் சுற்றுக்கு வந்தன.

இதில், நடைபெற்ற சன்ரைசர்ஸ் ஹைதராபாத் அணிக்கு எதிரான முதல் குவாலிஃபையர் சுற்று போட்டியில் கொல்கத்தா நைட் ரைடர்ஸ் அணியானது 8 விக்கெட்டுகள் வித்தியாசத்தில் வெற்றி பெற்று முதல் அணியாக இறுதிப் போட்டிக்கு முன்னேறியது.

கடந்த 16 ஆண்டுகளாக ஐபிஎல் டிராபிக்காக போராடி வந்த ஆர்சிபி இந்த முறையும் கோட்டைவிட்டு எலிமினேட்டர் சுற்று போட்டியில் தோல்வி அடைந்து வெளியேறியது. இதைத் தொடர்ந்து இன்று நடைபெறும் குவாலிஃபையர் 2 சுற்று போட்டியில் சன்ரைசர்ஸ் ஹைதராபாத் மற்றும் ராஜஸ்தான் ராயல்ஸ் அணிகள் முதல் முறையாக மோதுகின்றன.

இதற்கு முன்னதாக சன்ரைசர்ஸ் ஹைதராபாத் கடந்த 2018 ஆம் ஆண்டு நடைபெற்ற ஐபிஎல் தொடரின் 2ஆவது குவாலிஃபையர் சுற்று போட்டியில் கொல்கத்தா நைட் ரைடர்ஸ் அணியை 14 ரன்கள் வித்தியாசத்தில் வீழ்த்தி இறுதிப் போட்டிக்கு சென்றது. இதே போன்று கடந்த 2020 ஆம் ஆண்டு ஐபிஎல் தொடரின் குவாலிஃபையர் 2ஆவது சுற்று போட்டியில் டெல்லி கேபிடல்ஸ் அணிக்கு எதிராக 17 ரன்கள் வித்தியாசத்தில் தோல்வி அடைந்து வெளியேறியது என்பது குறிப்பிடத்தக்கது.

இதே போன்று ராஜஸ்தான் ராயல்ஸ் அணியானது 2 முறை குவாலிஃபையர் 2 சுற்றில் விளையாடியுள்ளது. இதில், கடந்த 2013 ஆம் ஆண்டு நடைபெற்ற ஐபிஎல் தொடரின் 2ஆவது குவாலிஃபையர் சுற்று போட்டியில் மும்பை இந்தியன்ஸ் அணிக்கு எதிராக 4 விக்கெட்டுகள் வித்தியாசத்தில் தோல்வி அடைந்து வெளியேறியது.

இதே போன்று, கடந்த 2022 ஆம் ஆண்டு நடைபெற்ற ஐபிஎல் தொடரின் 2ஆவது குவாலிஃபையர் சுற்று போட்டியில் ஆர்சிபிக்கு எதிராக 7 விக்கெட்டுகள் வித்தியாசத்தில் வெற்றி பெற்று இறுதிப் போட்டிக்கு சென்றது. தற்போது 3ஆவது முறையாக ராஜஸ்தான் ராயல்ஸ் குவாலிஃபையர் சுற்று போட்டிக்கு முன்னேறியுள்ளது. இதில், சன்ரைசர்ஸ் ஹைதராபாத் அணியை எதிர்கொள்கிறது.

இந்தப் போட்டி சென்னை சேப்பாக்கம் மைதானத்தில் நடைபெறுகிறது. இதில் வெற்றி பெறும் அணியானது இறுதிப் போட்டிக்கு முன்னேறும் என்பது குறிப்பிடத்தக்கது. இதன் மூலமாக இரு அணிகளும் தலா 2 முறை தனித்தனியாக குவாலிஃபையர் 2 சுற்று போட்டியில் விளையாடியுள்ளன. இதில் இரு அணிகளுமே ஒரு தோல்வி மற்றும் ஒரு வெற்றி பெற்றுள்ளன. தற்போது இரு அணிகளும் 3ஆவது முறையாக குவாலிஃபையர் 2 சுற்றுக்கு சென்றுள்ளன. மேலும், இரு அணிகளும் முதல் முறையாக குவாலிஃபையர் 2 சுற்று போட்டியில் விளையாடுகின்றன.