சென்னை கோட்டையில் சாம்பியனான KKR – கவுதம் காம்பீர், ஷ்ரேயாஸ் ஐயர் அண்ட் கோவிற்கு குவியும் பாராட்டு!

சென்னை எம்.ஏ.சிதம்பரம் மைதானத்தில் நடைபெற்ற கொல்கத்தா நைட் ரைடர்ஸ் அணிக்கு எதிரான ஐபிஎல் 2024 இறுதிப் போட்டியில் டாஸ் வென்று முதலில் பேட்டிங் செய்த சன்ரைசர்ஸ் ஹைதராபாத் அணியானது 113 ரன்கள் மட்டுமே எடுத்தது.

அபிஷேக் சர்மா மற்றும் டிராவிஸ் ஹெட் இருவரும் தொடக்க வீரர்களாக களமிறங்கினர். இதில், ரூ.24.75 கோடிக்கு ஏலம் எடுக்கப்பட்ட மிட்செல் ஸ்டார்க் முதல் ஓவரை வீசினார். அந்த ஓவரின் 5ஆவது பந்தில் அபிஷேக் சர்மா 2 ரன்னில் ஆட்டமிழ்ந்தார். வைபவ் அரோரா வீசிய 2ஆவது ஓவரில் டிராவிஸ் ஹெட் கோல்டன் டக் முறையில் வெளியேறினார்.

இந்த சீசனில் கடைசியாக விளையாடிய 4 போட்டிகளில் முறையே 0(1), 0(2), 34(28), 0(1) என்று ரன்கள் எடுத்து ஆட்டமிழந்துள்ளார். இதையடுத்து ஸ்டார்க் வீசிய 5.2ஆவது ஓவரில் ராகுல் திரிபாதி 9 ரன்களில் நடையை கட்டினார். 5 ஓவர்கள் முடிவில் ஹைதராபாத் 3 விக்கெட்டுகளை இழந்து 23 ரன்கள் மட்டுமே எடுத்திருந்தது.

இவரைத் தொடர்ந்து இன்று தனது 21ஆவது பிறந்தநாளை கொண்டாடும் நிதிஷ் குமார் ரெட்டி களமிறங்கினார். அவர், ஒரு பவுண்டரி, ஒரு சிக்ஸர் அடித்து 13 ரன்களில் ஹர்ஷித் ராணா பந்தில் ஆட்டமிழந்தார். கடைசியாக எய்டன் மார்க்ரம் 23 பந்துகளில் 3 பவுண்டரி அடித்த நிலையில் ஆண்ட்ரே ரஸல் பந்தில் 20 ரன்களில் ஆட்டமிழந்தார்.

இதன் மூலமாக சன்ரைசர்ஸ் ஹைதராபாத் 10.2 ஓவர்களில் 5 விக்கெட்டுகளை இழந்து 62 ரன்கள் மட்டுமே எடுத்திருந்தது. இதையடுத்து ஹென்ரிச் கிளாசென் மற்றும் ஷாபாஸ் அகமது இருவரும் ஜோடி சேர்ந்தனர். ஆனால், ஷாபாஸ் அகமது பெரிதாக தாக்கத்தை ஏற்படுத்தவில்லை. அவர் 8 ரன்னில் ஆட்டமிழக்க, இம்பேக்ட் பிளேயராக வந்த அப்துல் சமாத் 4 ரன்களில் நடையை கட்டினார். பெரிதும் நம்பப்பட்ட ஹென்ரிச் கிளாசென் 16 ரன்களில் ஹர்ஷித் ராணா பந்தில் ஆட்டமிழந்தார்.

அப்போது ஹைதராபாத் அணியானது 14.1 ஓவர்களில் 8 விக்கெட்டுகளை இழந்து 90 ரன்கள் மட்டுமே எடுத்திருந்தது. இதைத் தொடர்ந்து ஜெயதேவ் உனத்கட் 4 ரன்களில் சுனில் நரைன் பந்தில் எல்பிடபிள்யூ முறையில் ஆட்டமிழந்தார். இறுதியாக பேட் கம்மின்ஸ் 24 ரன்களில் ஆட்டமிழக்கவே சன்ரைசர்ஸ் ஹைதராபாத் 18.3 ஓவர்களில் அனைத்து விக்கெட்டுகளையும் இழந்து 113 ரன்கள் மட்டுமே எடுத்தது.

இதன் மூலமாக ஐபிஎல் இறுதிப் போட்டியில் குறைவான ஸ்கோர் பதிவு செய்த அணி என்ற மோசமான சாதனையை ஹைதராபாத் அணி படைத்துள்ளது. இதற்கு முன்னதாக ஐபிஎல் இறுதிப் போட்டியில் 125 ரன்கள் மட்டுமே குறைவான ஸ்கோராக இருந்துள்ளது. அதுமட்டுமின்றி ஐபிஎல் இறுதிப் போட்டியில் 33 இன்னிங்ஸ்களில் ஒரு அணியிலுள்ள எந்த வீரரும் 25 ரன்களை கூட எட்டவில்லை. பேட் கம்மின்ஸ் மட்டுமே அதிகபட்சமாக 24 ரன்கள் எடுத்தார்.

பவுலிங்கைப் பொறுத்த வரையில் ஆண்ட்ரே ரஸல் 3 விக்கெட்டுகள் கைப்பற்றினார். மிட்செல் ஸ்டார்க் மற்றும் ஹர்ஷித் ராணா தலா 2 விக்கெட்டுகள் கைப்பற்றினர். வைபவ் அரோரா, சுனில் நரைன், வருண் சக்கரவர்த்தி ஆகியோர் தலா ஒரு விக்கெட்டுகள் கைப்பற்றினர்.

பின்னர் எளிய இலக்கை துரத்திய கொல்கத்தா நைட் ரைடர்ஸ் அணியில் சுனில் நரைன் 6 ரன்களில் ஆட்டமிழந்தார். இவரைத் தொடர்ந்து குர்பாஸ் அகமது மற்றும் வெங்கடேஷ் ஐயர் இருவரும் இணைந்து அதிரடியாக விளையாடினர். இதில் குர்பாஸ் 39 ரன்களுக்கு ஆட்டமிழந்தார். இவரைத் தொடர்ந்து ஷ்ரேயாஸ் ஐயர் களமிறங்கினார்.

இறுதியாக கேகேஆர் 10.3 ஓவர்களில் 114 ரன்கள் எடுத்து 8 விக்கெட்டுகள் வித்தியாசத்தில் வெற்றி பெற்று 3ஆவது முறையாக டிராபியை வென்றுள்ளது. இதற்கு முன்னதாக கவுதம் காம்பீர் தலைமையிலான கேகேஆர் அணியானது 2012 மற்றும் 2014 ஆம் ஆண்டுகளில் டிராபியை வென்றது. தற்போது முதல் முறையாக ஷ்ரேயாஸ் ஐயர் தலைமையில் டிராபியை கைப்பற்றியுள்ளது.