கிரிக்கெட்னாலே ஹிட் தான்! லால் சலாமுக்கு முன் தமிழில் வெளியாகி சக்கைப்போடு போட்ட கிரிக்கெட் படங்களின் பட்டியல்

கிரிக்கெட்டிற்கு தமிழ்நாட்டில் மவுசு அதிகம். இதனால் தமிழில் இதுவரை வெளிவந்த கிரிக்கெட் சம்பந்தமான திரைப்படங்கள் ஏகோபித்த வரவேற்பை பெற்றுள்ளன. அந்த வரிசையில் புதிதாக இணைந்துள்ள படம் லால் சலாம். ஐஸ்வர்யா ரஜினிகாந்த் இயக்கியுள்ள இப்படம் இன்று திரைக்கு வந்துள்ளது. இப்படத்திற்கும் பாசிடிவ் விமர்சனங்கள் கிடைத்து வரும் நிலையில், இதற்கு முன் தமிழில் வெளியான கிரிக்கெட் படங்கள் பற்றி தற்போது பார்க்கலாம்.

உள்ளூர் கிரிக்கெட் அணிகளின் மோதலை கலகலப்புடன் கூறிய படம் தான் சென்னை 28. வெங்கட் பிரபு இயக்கத்தில் வெளியான இப்படத்தின் இரண்டு பாகங்களும் பாக்ஸ் ஆபிஸில் சக்கைப்போடு போட்டன. 90ஸ் கிட்ஸின் பேவரைட்டான ஸ்டிரீட் கிரிக்கெட்டை நினைவுகூறும் படமாக இது அமைந்திருந்தது.

சுசீந்திரன் இயக்கத்தில் கடந்த 2014-ம் ஆண்டு திரைக்கு வந்த படம் தான் ஜீவா. இதில் விஷ்ணு விஷால் ஹீரோவாக நடித்திருந்தார். அவருக்கு ஜோடியாக ஸ்ரீதிவ்யா நடித்திருந்த இப்படத்தில், தமிழ்நாடு கிரிக்கெட்டில் இருக்கும் அரசியலை தோலுரித்துக் காட்டி இருந்தார் இயக்குனர் சுசீந்திரன்.

இதையும் படியுங்கள்... ராக்கி பாய்-ஐ போல் மாஸ் காட்டினாரா மொய்தீன் பாய்? லால் சலாம் படத்தின் விமர்சனம் இதோ

தமிழில் வெளிவந்த மற்றுமொரு முக்கியமான கிரிக்கெட் படம் என்றால் அது கனா தான். மகளிர் கிரிக்கெட்டை மையமாக வைத்து உருவான இப்படத்தை அருண்ராஜா காமராஜ் இயக்கி இருந்தார். இப்படத்தை தயாரித்ததோடு, அதில் பயிற்சியாளராகவும் நடித்திருந்தார் சிவகார்த்திகேயன். கிரிக்கெட்டில் பெண்கள் சாதிக்க என்னென்ன தடைகளை கடந்துவர வேண்டும் என்பதை வெளிச்சம் போட்டு காட்டியது இப்படம். இதில் நடிகை ஐஸ்வர்யா ராஜேஷ் கதையின் நாயகியாக நடித்திருந்தார்.

கிரிக்கெட்டை மையமாக வைத்து எடுக்கப்பட்டு ஹிட்டான லேட்டஸ்ட் திரைப்படம் தான் ப்ளூ ஸ்டார். இப்படத்தை பா.இரஞ்சித் தயாரித்து இருந்தார். இதில் அசோக் செல்வன், சாந்தனு, திவ்யா துரைசாமி, கீர்த்தி பாண்டியன் ஆகியோர் நடிப்பில் வெளியான இப்படத்தை ஜெய் என்கிற புதுமுக இயக்குனர் இயக்கி இருந்தார். உள்ளூர் கிரிக்கெட்டும் அதை சுற்றி நடக்கும் அரசியலையும் உரக்க பேசியது இப்படம்.

இதையும் படியுங்கள்... ஐஸ்வர்யா மேல அம்புட்டு பாசமா? லால் சலாம் படம் பற்றி தனுஷ் போட்ட பதிவுக்கு குவியும் லைக்ஸ்