எதிர்ப்புக்கு மத்தியில்... எகிறிய 'தி கேரளா ஸ்டோரி' படத்தின் முதல் நாள் பாக்ஸ் ஆபீஸ் வசூல்! இத்தனை கோடியா?

நேற்று பல்வேறு சர்ச்சைகளுக்கு மத்தியில் வெளியான, 'தி கேரளா ஸ்டோரி' படத்தின் முதல் நாள் வசூல் குறித்த தகவல் தற்போது வெளியாகி உள்ளது. 

சர்ச்சைகள் மற்றும் கடுமையான எதிர்ப்புகளுக்கு மத்தியில், நேற்று மே 5-ஆம் தேதி, தமிழ், தெலுங்கு, மலையாளம், இந்தி ஆகிய மொழிகளில் பான் இந்தியா படமாக வெளியானது 'தி கேரளா ஸ்டோரி'. கேரளாவை சேர்ந்த 32-ஆயிரம் பெண்கள் இஸ்லாமிய மதத்திற்கு மாற்றப்பட்டு, பின்பு ஐஎஸ்ஐஎஸ் அமைப்பில் இணைந்ததாக சித்தரித்து தி கேரளா ஸ்டோரி என்ற திரைப்படம் எடுக்கப்பட்டுள்ளது. மேலும் அந்த பெண்கள் கட்டாய மதம் மாற்றப்பட்டு பயங்கரவாதப் பணிகளில் ஈடுபடுத்தப்பட்டதாகவும் கூறப்பட்டிருந்தது.

The Kerala story

இந்த படத்தின் டீசர் வெளியானதில் இருந்தே, தி கேரளா ஸ்டோரி படத்தை தடை செய்ய வேண்டும் என சில அரசியல் கட்சிகள் மற்றும் தனி நபர்கள் பலர், நீதி மன்றத்தில் வழக்கு தொடர்ந்தனர். இந்த வழக்கை விசாரித்த நீதி மன்றம், படத்தின் வெளியீட்டில் தலையிட முடியாது என அதிரடியாக தெரிவித்தது மட்டும் இன்றி, இந்த படத்தில் நடித்த நடிகர் - நடிகைகள், இயக்குனர், தயாரிப்பாளர் பற்றிக்கும் நினைத்து பார்க்க வேண்டும் என, உச்ச நீதி மன்ற தலைமை நீதிபதி அறிவுறுத்தி இருந்தார். 

இந்நிலையில் பல்வேறு எதிர்ப்புகளை கடந்து சன் ஷைன் சினிமா நிறுவனம் தயாரித்துள்ள ‘தி கேரளா ஸ்டோரி’ திரைப்படம், உலகம் முழுவதும் ரிலீஸ் ஆனது. குறிப்பாக தமிழகத்தில் குறிப்பாக கோவை, திருச்சி, திருப்பூர், சேலம், உள்ளிட்ட மாவட்டங்களில் 'தி கேரளா ஸ்டோரி' திரைப்படம் வெளியாகியுள்ளது.  சென்னையில் 13 திரையரங்குகளில் மட்டுமே வெளியிடப்பட்டது. 

அதா ஷர்மா, யோகிதா பிஹானி, சோனியா பாலானி, சித்தி இத்னானி உள்ளிட்ட நாயகிகள் முன்னணி கதாபாத்திரத்தில் நடித்துள்ள, இந்த படம் எதிர்ப்புகளுக்கு மத்தியில் வெளியானாலும் பாக்ஸ் ஆபிசில் கெத்து காட்டியுள்ளது. அதன்படி, தற்போது வெளியாகியுள்ள தகவலில், கேரளா ஸ்டோரி திரைப்படம், முதல் நாளில் ரூ 7.50-8 கோடிகளை வசூலித்ததாக கூறப்படுகிறது. இதன் மூலம், பாலிவுட் திரையுலகில் கடந்த 2023 ஆம் ஆண்டில் வெளியான படங்களில் 5-ஆவது அதிக ஓபனிங்கைப் பதிவு செய்துள்ளது. இந்த தகவல் படக்குழுவினரை உற்சாகமடைய செய்துளளது. இந்த படத்தை சுதிப்தோ சென் எழுதி இயக்கியது குறிப்பிடத்தக்கது.

எனினும் தொடர்ந்து இப்படத்திற்கு, எதிர்ப்புகள் கிளம்பியுள்ளதாலும், சில இடங்களில் போராட்டங்கள் வெடிக்கும் சூழ்நிலை நிலவி வருவதாலும், இப்படத்தின் கலெக்ஷன் இனி வரும் நாட்களில் பாதிக்கப்பட வாய்ப்புள்ளதாக கூறப்படுகிறது.

 பாலிவுட் திரையுலகில் சூப்பர் ஸ்டார் ஷாருக்கானின் பதான் (ரூ 55 கோடி) முதல் நாளில் வசூல் செய்தது, இதை தொடர்ந்து சல்மான் கான் நடித்த கிசி கா பாய் கிசி கி ஜான் (ரூ 15.81 கோடியும்), ரன்பீர் கபூர் மற்றும் ஷ்ரத்தா கபூரின் ரொமான்டிக் படமான டிஜேஎம்எம் (ரூ 15.7 கோடியையும்) வசூல் செய்தன. மேலும் அஜய் தேவ்கனின் போலா (11.20 கோடி) வசூல் செய்த நிலையில், தற்போது கேரளா ஸ்டோரி திரைப்படம், 8 கோடி வசூலித்து ஐந்தாவது பிக் ஓப்பனிங் கலெக்ஷன் செய்த படங்களின் லிஸ்டில் இணைந்துள்ளது குறிப்பிடத்தக்கது.