அட்ராசக்க... உலகநாயகன் கமல்ஹாசனுக்கு வாழ்நாள் சாதனையாளர் விருது

தமிழ் சினிமாவில் வளர்ச்சிக்கு வித்திட்ட பிரபலங்களில் நடிகர் கமல்ஹாசனுக்கும் முக்கிய பங்கு உண்டு. தமிழ் சினிமாவில் புதுப்புது தொழிநுட்பங்களை அறிமுகப்படுத்தியதோடு மட்டுமின்றி, இந்தியாவே வியந்து பார்க்கும் அளவுக்கு பல்வேறு பிளாக்பஸ்டர் ஹிட் படங்களை கொடுத்துள்ளார் கமல்ஹாசன். அவர் நடிப்பில் கடைசியாக வெளிவந்த விக்ரம், திரைப்படம், தமிழ்நாட்டில் அதிக வசூல் ஈட்டிய படங்கள் பட்டியலில் முதலிடம் பிடித்து அசத்தியது.

விக்ரம் படத்தின் பிரம்மாண்ட வெற்றிக்கு பின்னர் கமல்ஹாசன் நடிப்பில் தற்போது இந்தியன் 2 திரைப்படம் தயாராகி வருகிறது. ஷங்கர் இயக்கும் இப்படத்தின் படப்பிடிப்பு இறுதிக்கட்டத்தை எட்டி உள்ளது. இந்தியன் 2 படத்தை தொடர்ந்து மணிரத்னம் இயக்கும் படத்தில் நடிக்க உள்ளார். இப்படத்தை மணிரத்னம், கமல்ஹாசன் ஆகியோர் ரெட் ஜெயண்ட் மூவீஸ் நிறுவனத்துடன் இணைந்து தயாரிக்கவும் உள்ளனர். இதுதவிர பா.இரஞ்சித், வெற்றிமாறன் ஆகியோர் இயக்கத்திலும் நடிக்க உள்ளார் கமல்ஹாசன்.

இதையும் படியுங்கள்... அரசியல் தர்பார்... தேசிய தலைவர்களுடன் கமல்ஹாசன் சந்திப்பு

நடிகர் கமல்ஹாசனின் நடிப்புத்திறமையை பாராட்டி பல்வேறு விருதுகளும் வழங்கப்பட்டு உள்ளன. அவர் சிறந்த நடிப்பை வெளிப்படுத்தியதற்காக மூன்றாம்பிறை, இந்தியன், நாயகன் போன்ற படங்களுக்கு தேசிய விருதை வென்றுள்ளார். இதுதவிர அவர் தயாரித்த தேவர்மகன் திரைப்படம் சிறந்த மாநில மொழி படத்துக்கான தேசிய விருதை வென்றது. இதுமட்டுமின்றி மத்திய அரசின் உயரிய விருதாக கருதப்படும் பத்மஸ்ரீ விருது கமலுக்கு கடந்த 1990-ம் ஆண்டும், பத்மபூஷண் விருது கடந்த 2014-ம் ஆண்டும் வழங்கப்பட்டது.

இந்நிலையில், தற்போது நடிகர் கமல்ஹாசனுக்கு வாழ்நாள் சாதனையாளர் விருது வழங்கப்பட உள்ளதாக அறிவிக்கப்பட்டு உள்ளது. வருகிற மே 27-ந் தேதி அபுதாபியில் நடைபெற உள்ள சர்வதேச இந்திய திரைப்பட விழாவில் கமல்ஹாசனுக்கு இவ்விருது வழங்கப்படும் என அறிவிக்கப்பட்டு உள்ளது. இந்திய சினிமாவில் சிறந்த பங்காற்றியதற்காக அவருக்கு இவ்விருது வழங்கப்பட இருக்கிறது. இதனால் கமல்ஹாசனுக்கு வாழ்த்துக்கள் குவிந்த வண்ணம் உள்ளன.

இதையும் படியுங்கள்... வசூலில் பொன்னியின் செல்வன் 2-வையே ஓரங்கட்டிய பிச்சைக்காரன் 2.. பாக்ஸ் ஆபிஸில் விஜய் ஆண்டனி செய்த தரமான சம்பவம்