தனது ஓய்வு முடிவு குறித்து அவசரம் காட்டப்போவதில்லை என்றும், அதற்கான முடிவை எடுக்க இன்னும் நேரம் எடுத்துக்கொள்வேன் என்றும் எம்.எஸ். தோனி தெரிவித்துள்ளார். தனது உடல்நிலையைப் பொறுத்துதான் முடிவு எடுப்பேன் என அவர் கூறினார்.
சென்னை சூப்பர் கிங்ஸ் அணியின் கேப்டன் எம்.எஸ். தோனியின் கிரிக்கெட் எதிர்காலம் குறித்த கேள்விகள் மீண்டும் எழுந்துள்ள நிலையில், தனது ஓய்வு முடிவு குறித்து அவசரம் காட்டப்போவதில்லை என்றும், அதற்கான முடிவை எடுக்க இன்னும் நேரம் எடுத்துக்கொள்வேன் என்றும் அவர் தெரிவித்துள்ளார்.
குஜராத் டைட்டன்ஸ் அணிக்கு எதிரான வெற்றியின் பின்னர் பேட்டி அளித்த தோனி, தனது ஐபிஎல் எதிர்காலம் குறித்த கேள்விக்கு நேரடியாக பதிலளிக்க மறுத்துவிட்டார். "இது அவசரமாக முடிவு செய்ய வேண்டியது அல்ல. எனக்கு இன்னும் 4-5 மாதங்கள் உள்ளன. எனது உடல்நிலையைப் பொறுத்துதான் முடிவு எடுக்க முடியும். அதற்கு இப்போது அவசரம் இல்லை" என்று அவர் கூறினார்.
"இன்னும் நேரம் இருக்கிறது":
"ஒரு வீரர் தனது ஆட்டத்திறன் காரணமாக ஓய்வு பெற வேண்டும் என்றால், பலர் 22 வயதிலேயே ஓய்வு பெற்றுவிடுவார்கள். நான் இப்போதே ஓய்வு பெறுகிறேன் என்று சொல்லவில்லை, நான் மீண்டும் விளையாடுவேன் என்றும் சொல்லவில்லை. எனக்கு நேரம் இருக்கிறது. அதைப் பற்றி சிந்தித்து முடிவெடுப்பேன்" என்றும் தோனி விளக்கமளித்தார்.
Related Articles
43 வயதாகும் தோனி, கடந்த சில ஆண்டுகளாகவே ஐபிஎல் போட்டிகளில் இருந்து தனது ஓய்வு குறித்த கேள்விகளை எதிர்கொண்டு வருகிறார். கடந்த சீசனில் சென்னை அணி கோப்பையை வென்றபோது, "ரசிகர்களுக்காக நான் இன்னும் ஒரு சீசன் விளையாட விரும்புகிறேன்" என்று குறிப்பிட்டிருந்தார்.
எப்போது ஓய்வு பெறுவார்?
நடப்பு சீசனில், சென்னை சூப்பர் கிங்ஸ் அணி பிளேஆஃப் சுற்றுக்குத் தகுதிபெறாத நிலையில், ஐபிஎல் தொடரில் தோனியின் எதிர்காலம் மீண்டும் விவாதப் பொருளாக மாறியுள்ளது. ரசிகர்கள் அவர் தொடர்ந்து விளையாட வேண்டும் என்று ஆர்வமாக இருந்தாலும், தோனி தனது உடல் தகுதியையும், அணியின் தேவையையும் கருத்தில் கொண்டே இறுதி முடிவை எடுப்பார் என்று எதிர்பார்க்கப்படுகிறது.
ஐபிஎல் 2025 சீசனுக்குப் பிறகு ராஞ்சிக்கு திரும்பிச் சென்று சில பைக் சவாரிகளை மேற்கொள்ளப் போவதாகக் குறிப்பிட்ட தோனி, தனது முடிவை அறிவிக்கும் வரை ரசிகர்கள் பொறுத்திருக்க வேண்டும் என்ற தொனியிலேயே பேசினார்.