பஞ்சாப் மாநிலம் பெரோஸ்பூரில், வெளிநாட்டில் இருந்து திரும்பிய ஹர்பிந்தர் சிங் என்ற NRI, சோஃபாவிலிருந்து எழுந்தபோது இடுப்பில் இருந்த துப்பாக்கி எதிர்பாராத விதமாக வெடித்து உயிரிழந்தார். இந்த துயரச் சம்பவம் CCTV-யில் பதிவாகியுள்ளது.
பஞ்சாப் மாநிலம் பெரோஸ்பூர் மாவட்டத்தில், எதிர்பாராத விதமாக துப்பாக்கி வெடித்ததில் வெளிநாடு வாழ் இந்தியர் (NRI) ஒருவர் உயிரிழந்த சம்பவம் பெரும் அதிர்ச்சியை ஏற்படுத்தியுள்ளது.
திடீரென வெடித்த துப்பாக்கி
பெரோஸ்பூர் மாவட்டத்திலுள்ள தனி சுச்சா சிங் கிராமத்தைச் சேர்ந்தவர் ஹர்பிந்தர் சிங் (என்கிற சோனு). வெளிநாட்டில் வசித்து வந்த இவர், சமீபத்தில்தான் சொந்த ஊருக்குத் திரும்பி குடியேறினார்.
திங்கட்கிழமை அன்று, ஹர்பிந்தர் தனது உறவினர் ஒருவருடன் வீட்டில் உள்ள சோஃபாவில் அமர்ந்து பேசிக்கொண்டிருந்தார். அப்போது அவரது இடுப்பில் தோட்டாக்கள் நிரப்பப்பட்ட துப்பாக்கி வைக்கப்பட்டிருந்தது. சோஃபாவிலிருந்து அவர் திடீரென எழுந்தபோது, எதிர்பாராத விதமாக துப்பாக்கி வெடித்தது. இதில் தோட்டா அவரது வயிற்றுப் பகுதியில் பாய்ந்தது.
Related Articles
CCTV-யில் பதிவான காட்சிகள்
இந்த துயரமான காட்சிகள் அங்குள்ள CCTV கேமராவில் பதிவாகியுள்ளது. துப்பாக்கி வெடிக்கும் சத்தம் கேட்டு குடும்பத்தினர் அலறியடித்துக்கொண்டு ஓடிவருவதும், காயமடைந்த ஹர்பிந்தரை மீட்டு மருத்துவமனைக்கு அழைத்துச் செல்வதும் அந்த வீடியோவில் பதிவாகியுள்ளது.
காயமடைந்த ஹர்பிந்தர் உடனடியாக அரசு மருத்துவமனைக்கு கொண்டு செல்லப்பட்டார். அங்கு முதலுதவி அளிக்கப்பட்ட பின், மேல் சிகிச்சைக்காக மற்றொரு மருத்துவமனைக்கு மாற்ற பரிந்துரைக்கப்பட்டார். ஆனால், பதிண்டா நகருக்கு கொண்டு செல்லும் வழியிலேயே அவர் பரிதாபமாக உயிரிழந்தார்.
காவல்துறை விசாரணை
இச்சம்பவம் குறித்து சதர் காவல் நிலைய அதிகாரி ரவீந்தர் சர்மா விசாரணை மேற்கொண்டு வருகிறார். ஹர்பிந்தரின் தந்தை தர்ஷன் சிங் அளித்த வாக்குமூலத்தின் அடிப்படையில், பாரதிய நியாய சன்ஹிதா (BNS) பிரிவு 194-ன் கீழ் வழக்குப்பதிவு செய்யப்பட்டுள்ளது. பிரேத பரிசோதனைக்குப் பிறகு உடல் குடும்பத்தினரிடம் ஒப்படைக்கப்பட்டது.
சமீபத்தில் திருமணமான ஹர்பிந்தருக்கு இரண்டு வயதில் ஒரு பெண் குழந்தை உள்ளது. செவ்வாய்க்கிழமை நடைபெற்ற அவரது இறுதிச் சடங்கில் கிராம மக்கள் மற்றும் ஆம் ஆத்மி கட்சியைச் சேர்ந்த முக்கிய பிரமுகர்கள் கலந்துகொண்டு அஞ்சலி செலுத்தினர். இச்சம்பவம் அந்த கிராமத்தையே சோகத்தில் ஆழ்த்தியுள்ளது.
