சூயிங்கம் சாப்பிட்டால் புற்றுநோய் வைரஸ் அழியுமா? விஞ்ஞானிகளின் மிரட்டலான புதிய கண்டுபிடிப்பு!

தலை மற்றும் கழுத்து புற்றுநோயுடன் தொடர்புடைய ஆபத்தான வைரஸ்கள் மற்றும் பாக்டீரியாக்களை எதிர்த்துப் போராடும் ஒரு சிறப்பு சூயிங்கத்தை விஞ்ஞானிகள் உருவாக்கிக் சோதித்துள்ளனர்.

Image Credit : X

புற்றுநோயை எதிர்க்கும் சூயிங்கம்

தலை மற்றும் கழுத்து புற்றுநோயுடன் தொடர்புடைய ஆபத்தான வைரஸ்கள் மற்றும் பாக்டீரியாக்களை அழிக்கும் வல்லமை படைத்த ஒரு சிறப்பு சூயிங்கத்தை (Chewing Gum) விஞ்ஞானிகள் உருவாக்கியுள்ளனர். புற்றுநோய் நோயாளிகளிடம் பெறப்பட்ட மாதிரிகளைக் கொண்டு நடத்தப்பட்ட ஆய்வகப் பரிசோதனைகளில், இந்த சூயிங்கம் மனித பாப்பிலோமாவைரஸ் (HPV) அளவை 93% வரை குறைப்பதாகக் கண்டறியப்பட்டுள்ளது.

மேலும், இதன் மேம்படுத்தப்பட்ட வடிவம், வாயில் உள்ள நன்மை செய்யும் பாக்டீரியாக்களுக்கு எந்தப் பாதிப்பும் ஏற்படுத்தாமல், தீமை விளைவிக்கும் 2 முக்கிய பாக்டீரியாக்களை முற்றிலும் அழிப்பதாகவும் தெரியவந்துள்ளது. 'சயின்டிஃபிக் ரிப்போர்ட்ஸ்' (Scientific Reports) இதழில் வெளியிடப்பட்ட இந்த ஆய்வு முடிவுகள், எதிர்காலத்தில் குறிப்பிட்ட தொற்றுநோய்களைத் தடுக்கவும், புற்றுநோய் சிகிச்சைகளுக்குத் துணையாகவும் இருக்கும் என்று எதிர்பார்க்கப்படுகிறது.

Image Credit : X

புற்றுநோய் ஏற்படுத்தும் நுண்ணுயிரிகளை இலக்கு வைப்பது ஏன்?

தலை மற்றும் கழுத்து செதில் உயிரணு புற்றுநோய் என்பது வாய் மற்றும் தொண்டைப் பகுதிகளில் உள்ள திசுக்களில் ஏற்படும் ஒரு பொதுவான புற்றுநோயாகும். இந்த நோய் உடலின் பிற பகுதிகளுக்குப் பரவிய பிறகு சிகிச்சை அளிப்பது மிகவும் கடினம் என்பதால், முற்றிய நிலையில் கண்டறியப்படும் நோயாளிகளின் உயிர்வாழும் வாய்ப்பு குறைவாகவே உள்ளது.

பென்சில்வேனியா பல்கலை. பல் மருத்துவப் பள்ளியைச் சேர்ந்த ஆய்வுக் குழுவினர் இந்த ஆராய்ச்சியை மேற்கொண்டுள்ளனர். இவர்களின் கூற்றுப்படி, சமீபத்தில் அறிமுகப்படுத்தப்பட்ட புதிய புற்றுநோய் மருந்துகள் பலவும் நோயாளிகளின் வாழ்நாளை நீட்டிப்பதிலோ அல்லது வாழ்க்கைத் தரத்தை உயர்த்துவதிலோ பெரிய மாற்றத்தை ஏற்படுத்தவில்லை. எனவே, இந்நோயைத் தடுக்கும் புதிய உத்திகளின் தேவை அவசியமாகிறது.

ஆராய்ச்சியாளர்கள் முக்கியமாக 3 நுண்ணுயிரிகளை மையமாகக் கொண்டு ஆய்வு செய்தனர். HPV (ஹியூமன் பாப்பிலோமாவைரஸ்): தொண்டை மற்றும் வாய்சார் புற்றுநோய்களை உருவாக்கும் முதன்மை வைரஸ். போர்ஃபைரோமோனாஸ் ஜிங்கிவாலிஸ் ஃபியூசோபாக்டீரியம் நியூக்ளியேட்டம் இந்த 'Pg' மற்றும் 'Fn' பாக்டீரியா தொற்றுகள், புற்றுநோய் அறுவை சிகிச்சை மற்றும் இதர சிகிச்சைகளுக்குப் பிறகும் நோயாளிகளின் உடல்நிலையை மேலும் மோசமாக்கி, உயிர்வாழும் விகிதத்தைக் குறைக்கின்றன.

Image Credit : X

பீன்ஸ்சிலிருந்து உருவாக்கப்பட்ட சூயிங்கம்

ஆராய்ச்சியாளர்கள் லேப்லேப் அவரைக்காயில் (Lablab beans) இருந்து 'FRIL' எனப்படும் இயற்கையான வைரஸ் எதிர்ப்பு புரதத்தைக் கொண்டு இந்த சூயிங்கத்தைத் தயாரித்தனர். புற்றுநோய் நோயாளிகளின் வாய்வழியாகச் சேகரிக்கப்பட்ட மாதிரிகளில் இந்த சூயிங்கத்தின் சாறுகளைச் செலுத்திச் சோதித்தபோது:

உமிழ்நீர் மாதிரிகளில் HPV வைரஸ் அளவு 93% வரை குறைந்தது. வாய் கொப்பளிக்கும் திரவ மாதிரிகளில் 80% வரை குறைந்தது. இதனைத் தொடர்ந்து, 'புரோட்டெக்ரின்' (Protegrin) எனும் பாக்டீரியா எதிர்ப்பு பெப்டைடை (Antimicrobial peptide) இதில் சேர்த்தபோது, புற்றுநோயை தீவிரமாக்கும் 'Pg' மற்றும் 'Fn' ஆகிய 2 பாக்டீரியாக்களும் கண்டறிய முடியாத அளவுக்கு முற்றிலும் அழிக்கப்பட்டன.

Image Credit : X

நன்மை செய்யும் பாக்டீரியாக்களுக்குப் பாதிப்பில்லை

பொதுவாக கதிரியக்கச் சிகிச்சை (Radiation therapy) போன்ற புற்றுநோய் சிகிச்சைகள், வாயில் உள்ள நன்மை செய்யும் பாக்டீரியாக்களை அழித்து, 'கேன்டிடா ஆல்பிகான்ஸ்' (Candida albicans) போன்ற தீங்கிழைக்கும் பூஞ்சைகளின் வளர்ச்சியைத் தூண்டிவிடும். ஆனால், இந்தச் சோதனைச் சூயிங்கம் நன்மை செய்யும் பாக்டீரியாக்களுக்கு எந்தப் பாதிப்பும் ஏற்படுத்தாமல், இலக்கு வைக்கப்பட்ட ஆபத்தான பாக்டீரியாக்களை மட்டுமே துல்லியமாக அழிப்பது கண்டறியப்பட்டுள்ளது.

Image Credit : X

எதிர்காலப் பயன்பாடு & மனித மருத்துவப் பரிசோதனைகள்

தற்போது இந்த ஆய்வுகள் ஆய்வக அளவில் (Laboratory testing) மட்டுமே வெற்றிகரமாகச் சோதிக்கப்பட்டுள்ளன. மனிதர்களின் வாயில் நேரடியாகப் பயன்படுத்தும்போது இது எவ்வாறு செயல்படுகிறது என்பதை உறுதிப்படுத்த அடுத்தகட்டமாக மனித மருத்துவப் பரிசோதனைகளுக்கு (Human clinical trials) இந்தத் தொழில்நுட்பத்தைக் கொண்டு செல்ல விஞ்ஞானிகள் திட்டமிட்டுள்ளனர்.

இது வெற்றிபெறும் பட்சத்தில், புற்றுநோய் சிகிச்சையில் உள்ள நோயாளிகளுக்கு எளிமையாகவும், குறைந்த செலவிலும் கிடைக்கக்கூடிய ஒரு தடுப்பு மருந்தாக இந்தச் சாதாரண சூயிங்கம் உருவெடுக்கும்.