- Home
- Tamil Nadu News
- திமுகவில் இருந்து விலகிய முக்கிய நிர்வாகி.. கனிமக் கொள்ளை.. முதல்வர் ஸ்டாலின் மீது பரபரப்பு புகார்!
திமுகவில் இருந்து விலகிய முக்கிய நிர்வாகி.. கனிமக் கொள்ளை.. முதல்வர் ஸ்டாலின் மீது பரபரப்பு புகார்!
திமுகவில் இருந்து முக்கிய நிர்வாகி ஒருவர் விலகியுள்ளார். திமுக தலைவரும், முதல்வருமான ஸ்டாலின் மீது பரபரப்பு குற்றச்சாட்டு சுமத்தியுள்ளார். இது குறித்த முழு விவரங்களை பார்க்கலாம்.
திமுகவில் இருந்து முக்கிய நிர்வாகி விலகல்
திமுகவின் நெல்லை மேற்கு மாவட்ட சுற்றுச்சூழல் அணியின் துணை அமைப்பாளராக இருந்து வந்தவர் கடையம் சந்திரசேகர். இவர் திமுக அட்சியில் கனிமக் கொள்ளையை தடுக்க முடியாததால் தனது பொறுப்பில் இருந்தும் திமுகவின் அடிப்படை உறுப்பினர் பதவியில் இருந்தும் விலகுவதாக அதிரடியாக அறிவித்துள்ளார்.
கனிமக்கொள்ளை
இது தொடர்பாக திமுக தலைவரும், முதல்வருமான மு.க.ஸ்டாலினுக்கு கடிதம் எழுதிய சந்திரசேகர், ‘’கழகத்தில் நெல்லை மேற்கு மாவட்ட சுற்றுச்சூழல் துணை அமைப்பாளராக கழக பணியாற்றினேன் தென்காசி மாவட்டம், ஆலங்குளம் சட்டமன்ற தொகுதிக்கு உட்பட்ட கடையம் ஒன்றியத்தில் ஏராளமான கணி வளங்கள் கேரளாவிற்கு கொண்டு செல்லப்படுகிறது. கனரக வாகனங்களால் பொதுமக்கள் பெரும் இன்னலுக்கு உள்ளாகியுள்ளனர்.
நடவடிக்கை எடுக்காத முதல்வர் ஸ்டாலின்
மேலும் எதிர்வரும் காலங்களில் ஏற்படும் தீமைகளை பற்றி பலமுறை தங்களுக்கு எடுத்துரைத்தும் பலன் இல்லை. மாவட்ட சுற்றுச்சூழல் துணை அமைப்பாளராக இருந்து கொண்டு எங்கள் பகுதி சுற்றுச்சூழலை காப்பாற்ற, பாதுகாக்க முடியவில்லை.
எனவே எனது பொறுப்பிலிருந்து விலகுகிறேன். ஐயா நான் தந்தை பெரியார், அறிஞர் அண்ணா, டாக்டர் கலைஞர் ஆகியோரிடத்தில் சுயமரியாதையை கற்ற மாணவன் ஆகவே எனது சுயமரியாதையை காப்பாற்ற அடிப்படை உறுப்பினர் பொறுப்பிலிருந்தும் விலகுகிறேன்'' என்று தெரிவித்துள்ளார்.
அன்புமணி குற்றச்சாட்டு
''தென்மாவட்டங்களில் கனிமக்கொள்ளையை தடுக்க முடியாததால் மானமுள்ள திமுக நிர்வாகி விலகியுள்ளார். இனியாவது முதல்வர் விழிப்பாரா, சீரழிப்பாரா? என்று பாமக தலைவர் அன்புமணி கேள்வி எழுப்பியுள்ளார். ''தென் மாவட்டங்களில் பல்லாயிரம் கோடி ரூபாய் அளவுக்கு கனிமக் கொள்ளை நடைபெறுகிறது.
ஒவ்வொரு நாளும் பல்லாயிரக்கணக்கான சரக்குந்துகளில் கனிமவளங்கள் கேரளத்திற்கு கடத்திச் செல்லப்படுகின்றன; கனிமக் கொள்ளையில் ஈடுபடுபவர்களுக்கு காட்பாதராக இருந்து திமுகவின் பெரும்புள்ளி ஒருவர் பாதுகாக்கிறார் என்று பல ஆண்டுகளாக நான் குற்றஞ்சாட்டி வருகிறேன். அவை அனைத்தும் உண்மை என்று இப்போது திமுக நிர்வாகியின் வாக்குமூலத்தால் நிரூபிக்கப்பட்டுள்ளது.
இனியாவது ஸ்டாலின் நடவடிக்கை எடுக்க வேண்டும்
அதை சுற்றுச்சூழலை பாதுகாப்பதற்காக போராட வேண்டிய திமுக நிர்வாகியாலேயே தடுக்க முடியவில்லை; கனிமக் கொள்ளை குறித்து முதலமைச்சர் மு.க.ஸ்டாலின் அவர்களுக்கு திமுக நிர்வாகியே புகார் அனுப்பியும் எந்த நடவடிக்கையும் எடுக்கப்படவில்லை என்பன உள்ளிட்ட பல செய்திகளை இந்த ஒற்றை பதவி விலகல் கடிதம் கூறுகிறது.
இனியாவது கனிமக் கொள்ளையில் ஈடுபடுவோர் மீது முதல்வர் ஸ்டாலின் கடுமையான நடவடிக்கை எடுக்க வேண்டும். இல்லாவிட்டால் அவரை வாக்கு என்னும் ஆயுதத்தைக் கொண்டு தமிழ்நாட்டு மக்கள் விரட்டியடிப்பார்கள்'' என்று அன்புமணி கூறியுள்ளார்.
