அந்த பையன் ஆண்ட்ரூ சைமண்ட்ஸ் மாதிரி.. மிகப்பெரிய மேட்ச் வின்னர்..! இந்திய அணிக்கு பாண்டிங் அட்வைஸ்

ஆஸ்திரேலிய அணிக்கு ஆண்ட்ரூ சைமண்ட்ஸ் என்ன செய்தாரோ, அதேமாதிரியான பங்களிப்பை இந்திய அணிக்கு செய்ய வல்லவர் சூர்யகுமார் யாதவ். எனவே அவரை ஒருநாள் உலக கோப்பையில் கண்டிப்பாக ஆடவைக்க வேண்டும் என்று ரிக்கி பாண்டிங் தெரிவித்துள்ளார். 

இந்தியாவின் 360 என அழைக்கப்படும் சூர்யகுமார் யாதவ் அபாயகரமான பேட்ஸ்மேன். மைதானத்தின் அனைத்து திசைகளிலும் பந்தை பறக்கவிடக்கூடியவர். ஐபிஎல்லில் மும்பை இந்தியன்ஸ் அணிக்காக அபாரமான ஆட்டத்தை வெளிப்படுத்தியதன் விளைவாக, இந்திய அணியிலும் இடம்பிடித்து கடந்த 2 ஆண்டுகளாக அபாரமாக ஆடிவருகிறார்.

சர்வதேச டி20 கிரிக்கெட்டில் 48 போட்டிகளில் ஆடி 3 சதங்களை விளாசி அசத்தியுள்ளார். ஆனால் அண்மைக்காலமாக பேட்டிங்கில் ஸ்கோர் செய்ய முடியாமல் திணறிவருகிறார். ஆஸி.,க்கு எதிரான ஒருநாள் தொடரில் ஷ்ரேயாஸ் ஐயர் காயம் காரணமாக ஆடாததால் அவருக்கு பதிலாக ஆடிய சூர்யகுமார் யாதவ், 3 ஒருநாள் போட்டிகளிலும் முதல் பந்திலேயே கோல்டன் டக் அவுட்டாகி மோசமான சாதனையை படைத்தார். அது அவருக்கு தன்னம்பிக்கை குறைவை ஏற்படுத்தியது.

அதைத்தொடர்ந்து ஐபிஎல்லில் மும்பை இந்தியன்ஸ் அணிக்காக ஆடிவரும் சூர்யகுமார் யாதவ், ஆர்சிபிக்கு எதிரான முதல் போட்டியில் சரியாக 16 பந்தில் 15 ரன்கள் மட்டுமே அடித்து ஆட்டமிழந்தார். இதையடுத்து ஒருநாள் கிரிக்கெட் அணியில் சூர்யகுமார் யாதவின் இடம் கேள்விக்குறியாகியுள்ளது. ஷ்ரேயாஸ் ஐயர் தான் முதன்மை 4ம் வரிசை வீரர். எனவே அவர் வந்துவிட்டால் சூர்யகுமார் யாதவுக்கு இடம் கிடைக்காது.

இந்நிலையில், சூர்யகுமார் யாதவ் குறித்து பேசியுள்ள ரிக்கி பாண்டிங், எப்பேர்ப்பட்ட வீரரின் கெரியரிலும் ஏற்ற இறக்கங்கள் இருக்கத்தான் செய்யும். வெள்ளைப்பந்து கிரிக்கெட்டில் சூர்யகுமார் யாதவ் மிகப்பெரிய மேட்ச் வின்னர். பெரிய போட்டிகளை ஜெயித்து கொடுக்கக்கூடிய வீரர். ஆஸ்திரேலிய அணிக்கு ஆண்ட்ரூ சைமண்ட்ஸ் என்ன மாதிரியான பங்களிப்பை செய்தாரோ, அதேமாதிரி பங்களிப்பை இந்திய அணிக்கு செய்யக்கூடியவர் சூர்யகுமார் யாதவ். எனவே அவரை கண்டிப்பாக உலக கோப்பையில் இந்திய அணி ஆடவைக்க வேண்டும் என்று ரிக்கி பாண்டிங் தெரிவித்துள்ளார்.