முதுகில் சர்ஜரி.. ஐபிஎல்லில் இருந்து உறுதியாக விலகும் பும்ரா
முதுகு காயத்திற்கு பும்ராவிற்கு அறுவை சிகிச்சை செய்யப்படவுள்ளதால் அவர் கண்டிப்பாக ஐபிஎல்லில் ஆடமாட்டார்.
Followஇந்திய அணியின் நட்சத்திர ஃபாஸ்ட் பவுலர் ஜஸ்ப்ரித் பும்ரா. கடந்த ஆண்டு செப்டம்பர் மாதம் ஆஸ்திரேலியாவிற்கு எதிரான தொடரில் ஆடியபோது முதுகில் காயம் ஏற்பட்டது. அதன்பின்னர் ஆசிய கோப்பை, டி20 உலக கோப்பை ஆகிய பெரிய ஐசிசி தொடர்களில் பும்ரா ஆடவில்லை. அது இந்திய அணிக்கு பெரும் பின்னடைவாக அமைந்தது.
முதுகு காயம் காரணமாக 6 மாதங்களாக எந்தவிதமான கிரிக்கெட் போட்டிகளிலும் ஆடாமல் காயத்திலிருந்து மீண்டுவரும் பும்ரா, இந்தியா - ஆஸ்திரேலியா இடையேயான கடைசி 2 டெஸ்ட் போட்டிகளில் ஆடுவார் என்று எதிர்பார்க்கப்பட்டது. ஆனால் டெஸ்ட் தொடரிலும் ஆடவில்லை. அதைத்தொடர்ந்து நடக்கும் ஒருநாள் தொடருக்கான இந்திய அணியிலும் பும்ரா இடம்பெறவில்லை.
பும்ராவின் முதுகு காயம் 6 மாதங்கள் ஆகியும் இன்னும் முழுமையாக குணமாகவில்லை. எனவே அறுவை சிகிச்சை செய்ய வேண்டியுள்ளது. பும்ராவிற்கு முதுகில் அறுவை சிகிச்சை செய்யப்படவுள்ளதால் ஐபிஎல் 16வது சீசனில் பும்ரா ஆடமாட்டார் என்பது கிட்டத்தட்ட உறுதியாகிவிட்டது.
ஐபிஎல் 16வது சீசன் வரும் மார்ச் 31ம் தேதி தொடங்குகிறது. 5 முறை சாம்பியனான மும்பை இந்தியன்ஸ் அணியின் முக்கியமான வீரர் ஜஸ்ப்ரித் பும்ரா. அவர் தான் அந்த அணியின் மிகப்பெரிய மேட்ச் வின்னர். குறைவான ஸ்கோரை அடித்துவிட்டு, அதை வைத்து மும்பை இந்தியன்ஸ் அணி எதிரணியை சுருட்டி வெற்றி பெற காரணமே பும்ரா தான். டெத் ஓவர்களில் டைட்டாக வீசி ரன்னே கொடுக்காமல் வெற்றியை மும்பை இந்தியன்ஸுக்கு பெற்று கொடுக்கும் மேட்ச் வின்னர் பும்ரா. அவர் ஆடவில்லை என்றால் அது மும்பை இந்தியன்ஸ் அணிக்கு பெரும் பின்னடைவாக அமையும்.
பும்ரா ஆடாததால் அவரது இடத்தை சமகாலத்தின் மற்றொரு மிரட்டல் ஃபாஸ்ட் பவுலரான ஜோஃப்ரா ஆர்ச்சரை வைத்து ஈடுகட்டும் முனைப்பில் மும்பை இந்தியன்ஸ் அணி உள்ளது.
சேனலை கிளிக் செய்து பின்தொடரவும்
