Kitchen Tips: சமையலில் உப்பு அதிகமாயிடுச்சா? சரிசெய்ய 6 சூப்பர் டிப்ஸ் இதோ!
சமையலில் உப்பு குறைவாக இருந்தால் கூட சேர்த்துச் சாப்பிடலாம், ஆனால் அதிகமாகிவிட்டால் மொத்தமும் வீண். பல நேரங்களில் சமையலில் உப்பு அதிகமாகிவிடுவதுண்டு. இந்தச் சிக்கலைச் சரிசெய்ய சில எளிய குறிப்புகள் இங்கே.
உணவுக்கு சுவையை வழங்கும் வள்ளல்.!
இந்திய சமையலில் உப்பு தவிர்க்க முடியாத முக்கியமான பொருள். பஞ்சாபி உணவாக இருந்தாலும், முகலாய் பிரியாணியாக இருந்தாலும், சரியான அளவு உப்புதான் சுவையை முழுமையாக்கும். உப்பு அதிகமானாலோ அல்லது குறைந்தாலோ, எவ்வளவு சிறப்பாக சமைத்திருந்தாலும் உணவின் சுவை கெட்டு, மொத்த உழைப்பும் வீணாகிவிடும்.
உப்பு அதிகமாகிவிட்டால்.!
சமையலில் உப்பு அதிகமாகிவிட்டால் அதை ஓரளவு சரிசெய்ய சில எளிய டிப்ஸ்கள் உதவும். இருப்பினும், அளவுக்கு மீறி உப்பு சேர்த்துவிட்டால் அதை முழுமையாக சரிசெய்வது சிரமம். எனவே, கீழே கொடுக்கப்பட்டுள்ள இந்த எளிய வழிமுறைகள் உப்பின் தாக்கத்தை குறைத்து, உணவின் சுவையை ஓரளவுக்கு மீட்டெடுக்க உதவும்.
சமையலில் உப்பு
சமையல் செய்யும்போது உப்பை ஒரே தடவையில் அதிகமாக சேர்க்க வேண்டாம். முதலில் சிறிதளவு உப்பு சேர்த்து சமைக்கவும். பின்னர் சமையல் முடியும் தருவாயில் சுவை பார்த்து, தேவைப்பட்டால் மட்டுமே கூடுதலாக உப்பு சேர்ப்பது சிறந்த பழக்கமாகும். இதனால் உப்பு அதிகமாகிவிடும் தவறை எளிதாகத் தவிர்க்கலாம்.
உப்பை குறைக்க கோதுமை மாவு
குழம்பு அல்லது கிரேவியில் உப்பு அதிகமாகிவிட்டால், கோதுமை மாவை சிறிய உருண்டைகளாக உருட்டி அதில் போடுங்கள். குழம்பு நன்றாகக் கொதிக்கும்போது, அந்த மாவு உருண்டைகள் கூடுதலான உப்பை ஓரளவு உறிஞ்சிக்கொள்ளும். பின்னர் பரிமாறுவதற்கு முன் அந்த உருண்டைகளை எடுத்துவிட்டால், உணவின் உப்புச் சுவை சற்றுக் குறையும்.
உப்பை குறைக்க எலுமிச்சை அல்லது தக்காளி
வறுவல், பொரியல் போன்ற உலர்வான உணவுகளில் உப்பு அதிகமாகிவிட்டால், அதை ஓரளவு சமநிலைப்படுத்த எலுமிச்சை சாறு சிறந்த தீர்வாக இருக்கும். சிறிதளவு எலுமிச்சை சாற்றைப் பிழிந்தால், அதன் புளிப்புச் சுவை உப்பின் தாக்கத்தை குறைத்து உணவை சுவையாக மாற்றும். வீட்டில் எலுமிச்சை இல்லையெனில், சிறிதளவு தக்காளி சாஸை சேர்த்தும் சுவையை சமப்படுத்தலாம். தேவையெனில், மிளகுத்தூள் அல்லது மிளகாய் தூளை லேசாகத் தூவினால் கூட உணவின் சுவை மேம்படும். ஆனால், எந்தப் பொருளையும் அளவோடு மட்டுமே சேர்க்க வேண்டும்; இல்லையெனில் உணவின் அசல் சுவை மாறிவிடும்.
உப்பை குறைக்க வேகவைத்த உருளைக்கிழங்கு
பொரியல், கூட்டு போன்ற உணவுகளில் உப்பு அதிகமாகிவிட்டால், ஒரு உருளைக்கிழங்கை தனியாக வேகவைத்து நன்றாக மசித்து அதில் சேர்க்கலாம். பின்னர் அடுப்பில் வைத்து சில நிமிடங்கள் நன்றாகக் கிளறினால், உருளைக்கிழங்கு கூடுதலான உப்பை ஓரளவு உறிஞ்சிக்கொள்ளும். இதனால் உணவின் சுவை பெரிதாக மாறாமல், உப்பின் தாக்கம் குறையும். குறிப்பாக உருளைக்கிழங்கின் இயல்பான மிருதுவான தன்மை, உணவின் சுவை மற்றும் பதத்தை சமநிலைப்படுத்த உதவுவதால், இது மிகவும் எளிமையான மற்றும் பயனுள்ள சமையல் டிப்ஸாகும்.
உப்பை குறைக்க தண்ணீர்
குழம்பு, சாம்பார் அல்லது கிரேவி போன்ற உணவுகளில் உப்பு அதிகமாகிவிட்டால், அதில் சிறிதளவு தண்ணீர் சேர்த்து மீண்டும் கொதிக்கவிடலாம். இதனால் உப்பின் செறிவு ஓரளவு குறைந்து சுவை சமநிலைக்கு வரும். இருப்பினும், தண்ணீரை அதிகமாக சேர்த்தால் குழம்பின் கெட்டித்தன்மை, காரம் மற்றும் மசாலா சுவை குறையக்கூடும். எனவே, தேவையான அளவு மட்டுமே தண்ணீர் சேர்த்து, தேவைப்பட்டால் மிளகாய்த்தூள், மசாலா அல்லது சிறிதளவு தேங்காய் பால் சேர்த்து சுவையை மீண்டும் சமநிலைப்படுத்துவது சிறந்த முறையாகும்.
அளவான உப்பு
எந்த சமையலாக இருந்தாலும், உப்பை சரியான அளவில் சேர்ப்பதில்தான் உணவின் சுவை இருக்கிறது. எனவே, சமைக்கும்போதே உப்பை அளவோடு சேர்த்து, இறுதியில் சுவை பார்த்து தேவையானால் மட்டும் கூடுதலாக சேர்ப்பது நல்ல பழக்கம். உப்பு அதிகமான பிறகு சரிசெய்ய பல டிப்ஸ்கள் இருந்தாலும், அவை முழுமையான தீர்வாக இருக்காது. அதனால், ஆரம்பத்திலேயே கவனமாக இருப்பதே சிறந்த வழி. இல்லையெனில், தினமும் உப்பு கூடிக்கொண்டே இருந்தால், இந்த டிப்ஸ்கள் எல்லாம் வீட்டிலேயே அனைவருக்கும் மனப்பாடமாகிவிடும்!
ஏஷ்யாநெட் தமிழ் நியூஸின் லைஃப்ஸ்டைல் பிரிவு, வாசகர்களுக்கு வாழ்க்கை முறை, உறவுகள் மற்றும் நடைமுறை வாழ்க்கை குறித்து வளமான தகவல்களை வழங்குகிறது. இதில் ஆரோக்கிய ஆலோசனைகள், உணவு மற்றும் ஊட்டச்சத்து குறிப்புகள், ஃபாஷன் டிரெண்ட்ஸ் மற்றும் தினசரி வாழ்க்கையை மேம்படுத்தும் சிந்தனையூட்டும் கருத்துகள் அடங்கும்.
