Pumpkin Idiyappam : பூசணிக்காய் இடியாப்பம் ..பஞ்சு போன்ற சுவையில் ஆரோக்கியமான காலை உணவு!

Pumpkin Idiyappam : மஞ்சள் பூசணிக்காயை வைத்து சுவையான, பஞ்சு போன்ற மென்மையான இடியாப்பம் செய்வது எப்படி? தேவையான பொருள்கள், எளிய செய்முறை, வேகவைக்கும் நேரம் மற்றும் சுவையான சைடிஷ் வகைகள் என முழு விவரங்கள் இதோ.

Image Credit : Gemini Ai

பூசணிக்காய் இடியாப்பம் செய்வது எப்படி?

வழக்கமாக அரிசி மாவில் இடியாப்பம் செய்து தேங்காய்ப்பால், சர்க்கரை சேர்த்துச் சாப்பிட்டிருப்போம். ஆனால், அதே இடியாப்பத்தில் ஒரு சின்ன மாற்றம் செய்தால் போதும். சுவையும் கூடும், உணவின் நிறமும் அழகாக மாறும். வீட்டில் இருக்கும் மஞ்சள் பூசணிக்காயை வைத்து பஞ்சு போன்ற மென்மையான, சுவையான இடியாப்பம் செய்து அசத்தலாம்.

குழந்தைகள் முதல் பெரியவர்கள் வரை அனைவரும் விரும்பிச் சாப்பிடும் வகையில் இருக்கும் இந்த பூசணிக்காய் இடியாப்பம், காலை உணவுக்கும் மாலை நேர சிற்றுண்டிக்கும் ஏற்றது.

குறிப்பாக, பூசணிக்காயைச் சாப்பிட அடம்பிடிக்கும் குழந்தைகளுக்குக்கூட இந்த முறையில் செய்து கொடுத்தால் விரும்பிச் சாப்பிடுவார்கள். அப்படியென்ன இந்த இடியாப்பத்தின் ஸ்பெஷல்? வீட்டிலேயே எளிமையாக பூசணிக்காய் இடியாப்பம் செய்வது எப்படி என்று பார்க்கலாம்.

Image Credit : Gemini Ai

பூசணிக்காய் இடியாப்பம் செய்ய தேவையான பொருள்கள்

• மஞ்சள் பூசணிக்காய் - 1 கப்
• இடியாப்ப மாவு - 2 கப்
• நெய் - 1 டேபிள் ஸ்பூன்
• உப்பு - தேவையான அளவு
• தண்ணீர் - தேவையான அளவு

Image Credit : Gemini Ai

பூசணிக்காய் இடியாப்பம் செய்வது எப்படி? படி 1

பூசணிக்காயை அரைத்துக் கொள்ளவும்

முதலில் மஞ்சள் பூசணிக்காயின் தோல் மற்றும் விதைகளை நீக்கிவிட்டு, சிறிய துண்டுகளாக நறுக்கிக் கொள்ளவும். இந்தத் துண்டுகளை மிக்சியில் போட்டு, சிறிதளவு தண்ணீர் சேர்த்து நன்றாக மைய அரைத்துக் கொள்ளவும்.

Image Credit : Gemini Ai

படி 2

பூசணிக்காய் விழுதைச் சூடாக்கவும்

அரைத்த பூசணிக்காய் விழுதை ஒரு வாணலியில் ஊற்றி லேசாகச் சூடாக்கவும். பச்சை வாசனை நீங்கி, விழுது சற்று சூடானதும் அடுப்பை அணைத்துவிடவும். கொதிக்கவிட வேண்டிய அவசியமில்லை. மாவில் சேர்ப்பதற்கு முன்பு சிறிது ஆறவிடவும்.

Image Credit : Gemini Ai

படி 3

இடியாப்ப மாவைப் பிசையவும்

ஒரு அகலமான பாத்திரத்தில் இடியாப்ப மாவை எடுத்துக் கொள்ளவும். அதில் தேவையான அளவு உப்பு, தயாரித்து வைத்துள்ள பூசணிக்காய் விழுது மற்றும் ஒரு டேபிள் ஸ்பூன் நெய் சேர்க்கவும். இவற்றை நன்றாகக் கலந்து, தேவையான அளவு வெதுவெதுப்பான தண்ணீர் சேர்த்து மென்மையான மாவாகப் பிசைந்து கொள்ளவும்.

மாவு மிகவும் கெட்டியாகவோ அல்லது தளர்வாகவோ இருக்கக் கூடாது. இடியாப்ப உரலில் எளிதாகப் பிழியும் பதத்தில் இருக்க வேண்டும்.

Image Credit : Gemini Ai

படி 4

இடியாப்பமாகப் பிழியவும்

இப்போது பிசைந்து வைத்துள்ள மாவை இடியாப்ப உரலில் நிரப்பிக் கொள்ளவும். இட்லித் தட்டில் அல்லது இடியாப்பத் தட்டில் சிறிது நெய் தடவி, அதன் மீது மாவை வட்டமாக இடியாப்பம் போலப் பிழிந்து கொள்ளவும்.

Image Credit : Gemini Ai

படி 5

ஆவியில் வேகவைக்கவும்

இட்லி பாத்திரத்தில் தேவையான அளவு தண்ணீர் ஊற்றி அடுப்பில் வைக்கவும். தண்ணீர் நன்றாகச் சூடானதும், இடியாப்பத் தட்டுகளை உள்ளே வைத்து மூடி போடவும். மிதமான தீயில் சுமார் 7 முதல் 8 நிமிடங்கள் ஆவியில் வேகவைக்கவும். இடியாப்பம் நன்றாக வெந்ததும் வெளியே எடுத்து சிறிது நேரம் ஆறவிடவும்.

Image Credit : Gemini Ai

படி 6

பூசணிக்காய் இடியாப்பம் தயார்

அவ்வளவுதான் சுவையான, பஞ்சு போன்ற மஞ்சள் பூசணிக்காய் இடியாப்பம் தயார். பார்ப்பதற்கே அழகான நிறத்தில் இருக்கும் இந்த இடியாப்பத்தைத் தேங்காய்ப்பால் அல்லது நாட்டுச்சர்க்கரையுடன் சேர்த்துப் பரிமாறலாம்.

Image Credit : Gemini Ai

பூசணிக்காய் இடியாப்பத்துடன் என்ன சேர்த்துச் சாப்பிடலாம்?

இந்த இடியாப்பத்தை இனிப்பு மற்றும் காரம் என இரண்டு விதமாகவும் சாப்பிடலாம்.

தேங்காய்ப்பால்: இடியாப்பத்தின் மீது தேங்காய்ப்பால் ஊற்றி, சிறிதளவு நாட்டுச்சர்க்கரை சேர்த்துச் சாப்பிடலாம்.

நாட்டுச்சர்க்கரை: இடியாப்பத்தை உதிர்த்து அதனுடன் நாட்டுச்சர்க்கரை மற்றும் சிறிது நெய் சேர்த்துக் கலந்து சாப்பிடலாம்.

தேங்காய் துருவல்: தேங்காய்த் துருவல் மற்றும் சர்க்கரை சேர்த்தும் பரிமாறலாம்.

காரமான சைடிஷ்: தேங்காய் சட்னி அல்லது காய்கறி குருமாவுடன் சேர்த்தும் சாப்பிடலாம்.

பூசணிக்காய் இடியாப்பம் செய்யும்போது கவனிக்க வேண்டியவை

• பூசணிக்காயில் இயற்கையாகவே தண்ணீர்ச்சத்து இருப்பதால், மாவைப் பிசையும்போது தண்ணீரை ஒரே நேரத்தில் அதிகமாக ஊற்ற வேண்டாம்.
• பூசணிக்காய் விழுதை நன்றாக மைய அரைத்தால் இடியாப்பம் மென்மையாகக் கிடைக்கும்.
• இடியாப்ப மாவைச் சிறிது சிறிதாகச் சேர்த்து மாவின் பதத்தைச் சரிசெய்துகொள்ளலாம்.
• மாவு மிகவும் கெட்டியாக இருந்தால் இடியாப்பத்தைப் பிழிவது சிரமமாக இருக்கும். எனவே மென்மையான பதத்தில் பிசையவும்.
• அதிக நேரம் ஆவியில் வேகவைக்க வேண்டாம். 7 முதல் 8 நிமிடங்கள் கழித்து வெந்துள்ளதா என்று பார்த்து இறக்கவும்.

பூசணிக்காய் இடியாப்பத்தின் சிறப்புகள் என்ன?

மஞ்சள் பூசணிக்காயில் நார்ச்சத்து, பீட்டா கரோட்டின் உள்ளிட்ட சத்துகள் உள்ளன. குறிப்பாக, பீட்டா கரோட்டின் உடலில் வைட்டமின் ஏ உருவாக உதவுகிறது. இதனுடன் அரிசி மாவும் சேர்வதால், காலை உணவுக்கு ஏற்ற ஒரு வித்தியாசமான உணவாக இதைத் தயாரிக்கலாம்.

வழக்கமான இடியாப்பத்தைச் சாப்பிட்டுச் சலித்துவிட்டதா? அப்படியானால் இந்த மஞ்சள் பூசணிக்காய் இடியாப்பத்தை ஒருமுறை வீட்டில் செய்து பாருங்கள். எளிமையான செய்முறை, அழகான நிறம், மென்மையான சுவை என குடும்பத்தினர் அனைவரையும் கவரும்.