- Home
- உடல்நலம்
- உணவு
- Kanchipuram Thenkuzhal Murukku : தீபாவளி ஸ்பெஷல் காஞ்சிபுரம் தேன்குழல் முறுக்கு..மொறுமொறுப்பான சுவையில் அசத்தும் பாரம்பரிய பலகாரம்!
Kanchipuram Thenkuzhal Murukku : தீபாவளி ஸ்பெஷல் காஞ்சிபுரம் தேன்குழல் முறுக்கு..மொறுமொறுப்பான சுவையில் அசத்தும் பாரம்பரிய பலகாரம்!
Kanchipuram Thenkuzhal Murukku : தீபாவளிக்கு வீட்டிலேயே மொறுமொறுப்பான காஞ்சிபுரம் தேன்குழல் முறுக்கு செய்யலாம். பச்சரிசி மாவு, உளுந்து மாவு, வெண்ணெய் கொண்டு சுலபமாகத் தயாரிக்கும் இந்தப் பாரம்பரிய முறுக்கு செய்முறை மற்றும் டிப்ஸ் இதோ.
தேன்குழல் முறுக்கு செய்வது எப்படி
தீபாவளி என்றாலே புத்தாடை, பட்டாசு, பலகாரங்கள் என வீடே களைகட்டத் தொடங்கிவிடும். அதிலும் வீட்டில் தயாரிக்கும் முறுக்கு, அதிரசம், சீடை போன்ற பலகாரங்களுக்குத் தனி மவுசு உண்டு. கடைகளில் என்னதான் விதவிதமான ஸ்நாக்ஸ் வாங்கினாலும், வீட்டில் எண்ணெயில் பொன்னிறமாகப் பொரித்து எடுக்கும் முறுக்கின் சுவைக்கு ஈடாகாது.
அந்த வகையில், இந்த தீபாவளிக்கு வழக்கமாகச் செய்யும் முறுக்கைத் தாண்டி, காஞ்சிபுரம் ஸ்பெஷல் தேன்குழல் முறுக்கை ஒருமுறை செய்து பாருங்கள். அரிசி மாவு, உளுந்து மாவு, வெண்ணெய் என எளிமையான பொருள்களைக் கொண்டே தயாரிக்கக்கூடிய இந்த முறுக்கு, சாப்பிடும்போது மொறுமொறுவென உடையும்.
குழந்தைகள் முதல் பெரியவர்கள் வரை அனைவரும் விரும்பிச் சாப்பிடும் இந்தப் பாரம்பரிய பலகாரத்தை வீட்டிலேயே சுலபமாகச் செய்வது எப்படி என்று பார்க்கலாம்.
தேன்குழல் முறுக்கு செய்யத் தேவையான பொருள்கள்
- பச்சரிசி மாவு - 2 கப்
- உளுந்து மாவு - 1\4 கப்
- வெண்ணெய் - 3 தேக்கரண்டி
- சீரகம் - 1 1\2 தேக்கரண்டி
- பெருங்காயத்தூள்- 1\4 தேக்கரண்டி
- உப்பு - தேவையான அளவு
- எண்ணெய் - பொரிக்கத் தேவையான அளவு
- தண்ணீர் - தேவையான அளவு
காஞ்சிபுரம் தேன்குழல் முறுக்கு செய்வது எப்படி?
மாவைத் தயார் செய்தல்
முதலில் ஒரு அகலமான பாத்திரத்தை எடுத்துக்கொள்ளவும். அதில் பச்சரிசி மாவு, உளுந்து மாவு ஆகியவற்றைச் சேர்க்கவும். இதனுடன் சீரகம் , பெருங்காயத்தூள் மற்றும் தேவையான அளவு உப்பு சேர்த்து நன்றாகக் கலக்கவும்.
படி 1
வெண்ணெய் சேர்த்துப் பிசைதல்
அடுத்ததாக வெண்ணெயை மாவுடன் சேர்க்கவும். வெண்ணெய் மாவு முழுவதும் பரவும் வகையில் கைகளால் நன்றாகப் பிசையவும். இதுதான் முறுக்கு மொறுமொறுப்பாகவும், கடிக்கும்போது மென்மையாகவும் இருப்பதற்கு உதவும்.
படி 2
முறுக்கு மாவு பதத்திற்குப் பிசையவும்
இப்போது சிறிது சிறிதாகத் தண்ணீர் சேர்த்து மாவைப் பிசைய வேண்டும். ஒரே நேரத்தில் அதிக தண்ணீர் ஊற்றிவிடக் கூடாது. மாவு மிகவும் கெட்டியாகவும் இல்லாமல், தளர்வாகவும் இல்லாமல் இருக்க வேண்டும். முறுக்கு அச்சில் எளிதாகப் பிழியக்கூடிய, கைகளில் அதிகம் ஒட்டாத மென்மையான பதத்தில் மாவைத் தயாரித்துக் கொள்ளவும்.
படி 3
முறுக்கு அச்சில் மாவை நிரப்புதல்
இப்போது முறுக்கு அச்சை எடுத்துக்கொள்ளவும். அதில் உங்களுக்கு விருப்பமான வடிவிலான அச்சு தட்டை பொருத்தி, தயார் செய்து வைத்துள்ள மாவை நிரப்பவும்.
படி 4
எண்ணெயில் முறுக்கைப் பொரித்தல்
ஒரு அகலமான கடாயில் தேவையான அளவு எண்ணெய் ஊற்றி மிதமான சூட்டில் சூடாக்கவும். எண்ணெய் சூடானதும், முறுக்கு அச்சைப் பயன்படுத்தி மாவை கரண்டி அல்லது தட்டில் வட்ட வடிவில் பிழிந்து எண்ணெயில் போடவும். ஒரே நேரத்தில் அதிக முறுக்குகளைப் போடாமல், கடாயின் அளவுக்கு ஏற்ப போடுவது நல்லது.
மிதமான தீயில் முறுக்கை வேகவிடவும். முறுக்கில் இருந்து வரும் குமிழ்கள் மற்றும் சத்தம் படிப்படியாகக் குறைந்து, முறுக்கு லேசான பொன்னிறமாக மாறியதும் திருப்பிப் போட்டு மறுபுறமும் வேகவிடவும்.
படி 5
எண்ணெயை வடித்து எடுக்கவும்
முறுக்கு நன்றாகப் பொரிந்ததும், எண்ணெயிலிருந்து எடுத்து வடிகட்டியில் வைக்கவும். முழுவதுமாக ஆறிய பிறகு காற்றுப் புகாத டப்பாவில் சேமித்து வைக்கலாம். இதோ, சுவையான காஞ்சிபுரம் தேன்குழல் முறுக்கு தயார்.
தேன்குழல் முறுக்கு மொறுமொறுப்பாக வர சில முக்கிய டிப்ஸ்
மாவு பதம்: மாவு மிகவும் கெட்டியாக இருந்தால் முறுக்கு பிழிவது சிரமமாக இருக்கும். தண்ணீரைச் சிறிது சிறிதாகச் சேர்த்துப் பிசையவும்.
வெண்ணெய் அளவு: வெண்ணெய் அதிகமாகச் சேர்த்தால் முறுக்கு எண்ணெயில் உடைய வாய்ப்புள்ளது. எனவே அளவோடு சேர்க்கவும்.
எண்ணெயின் சூடு: எண்ணெய் மிகவும் சூடாக இருந்தால் முறுக்கு வெளியில் மட்டும் சிவந்து உள்ளே வேகாமல் போகலாம். மிதமான தீயில் பொரிக்கவும்.
மாவை மூடி வைக்கவும்: மாவு காய்ந்து போகாமல் இருக்கப் பயன்படுத்தாத மாவை ஈரத்துணியால் மூடி வைக்கலாம்.
சேமிப்பு: முறுக்கு நன்றாக ஆறிய பிறகே காற்றுப் புகாத டப்பாவில் போட்டு வைக்க வேண்டும். அப்போதுதான் நீண்ட நேரம் மொறுமொறுப்பாக இருக்கும்.
முறுக்கின் சிறப்பு என்ன?
காஞ்சிபுரம் தேன்குழல் முறுக்கின் சிறப்பு என்ன?
அரிசி மாவு மற்றும் உளுந்து மாவின் கலவையுடன் வெண்ணெய் சேர்த்துத் தயாரிப்பதால், இது மற்ற முறுக்கு வகைகளிலிருந்து சற்று மாறுபட்ட சுவையையும் அமைப்பையும் கொண்டிருக்கும்.
குறிப்பாக, தேநீர், காபியுடன் சாப்பிடுவதற்கும், தீபாவளி பலகாரத் தட்டில் வைப்பதற்கும் ஏற்றது. குழந்தைகளுக்குப் பள்ளி முடிந்து வந்ததும் சிற்றுண்டியாகக் கொடுக்கலாம். வீட்டிற்கு வரும் விருந்தினர்களுக்கும் பரிமாறலாம்.
இந்த தீபாவளிக்கு கடையில் வாங்கும் பலகாரங்களுடன், உங்கள் கையால் செய்த காஞ்சிபுரம் தேன்குழல் முறுக்கையும் சேர்த்துப் பரிமாறிப் பாருங்கள். அதன் மொறுமொறுப்பான சுவை நிச்சயம் அனைவரையும் மீண்டும் கேட்க வைக்கும்.
