வழக்கமான சட்னி சாப்பிட்டு சலிச்சு போச்சா? 10 நிமிடத்தில் சுவையான 'காரைக்குடி ஸ்பெஷல்' சட்னி!

காரைக்குடி சமையலுக்கே உரித்தான தனித்துவமான சுவையில் செய்யப்படும் 'காரைக்குடி கார சட்னி' சுடச்சுட இட்லி மற்றும் மொறுமொறுப்பான தோசைக்கு அட்டகாசமான ரெசிபியாகும்.

Image Credit : X

இட்லி தோசைக்கு கார சட்னி

காலையில சுடச்சுட ஆவி பறக்குற இட்லியோ அல்லது நல்லா மொறுமொறுனு இருக்குற தோசையோ தட்டுல வச்சதும், அதுக்குத் தொட்டுக்க காரசாரமா ஒரு சட்னி இருந்தா எத்தனை சாப்பிடுறோம்னே தெரியாது. சட்னி வகைகளிலேயே காரைக்குடி சமையலுக்கே உரித்தான அந்த தனித்துவமான சுவையில் செய்யப்படுற 'காரைக்குடி கார சட்னிக்கு எப்போதும் தனி ரசிகர் பட்டாளமே உண்டு. வழக்கமா செய்யுற சட்னியை விட இதோட செய்முறையும் சுவையும் முற்றிலும் மாறுபட்டது.

வெங்காயம், தக்காளி, பூண்டு மூணையும் சரியான பக்குவத்துல தனித்தனியா அரைச்சு, நல்லெண்ணெயில வதக்கி எடுக்குறதுதான் இந்த சட்னியோட அசல் சுவை ரகசியம். நாக்குக்கு நல்லா காரசாரமா எதாவது சாப்பிடணும்னு தோணும்போது இந்த சட்னியைச் செஞ்சு பாருங்க, வாங்க இதை எப்படி ஈஸியா பண்றதுன்னு பார்க்கலாம்.

Image Credit : X

தேவையான பொருட்கள்

பூண்டு - 10 பற்கள்

வரமிளகாய் - 5 முதல் 6 வரை

புளி - ஒரு சிறிய துண்டு

சின்ன வெங்காயம் - ஒரு கைப்பிடி அளவு

தக்காளி - 2

நல்லெண்ணெய் - தேவையான அளவு

கடுகு, கருவேப்பிலை - தாளிக்க தேவையான அளவு

உப்பு - தேவையான அளவு

கொத்தமல்லி இலை - சிறிதளவு (பொடியாக நறுக்கியது)

Image Credit : X

செய்முறை:

முதலில் ஒரு மிக்ஸி ஜாரில் 10 பல்லு பூண்டு, காரத்துக்கு ஏற்ப 5 அல்லது 6 வரமிளகாய், ஒரு சிறிய துண்டு புளி ஆகியவற்றைச் சேர்த்து, சுத்தமாகத் தண்ணீர் எதுவும் ஊற்றாமல் கொரகொரப்பாக அரைத்து எடுத்துக்கொள்ள வேண்டும். அதன் பிறகு, அதே மிக்ஸி ஜாரில் ஒரு கைப்பிடி அளவு சின்ன வெங்காயம், சட்னிக்குத் தேவையான அளவு உப்பு சேர்த்து, இதையும் தண்ணீர் விடாமல் அரைத்து எடுத்துக் கொள்ளுங்கள். இதில் மிக முக்கியமான விஷயம் என்னவென்றால், வெங்காயத்தை அரைக்கும்போது தக்காளியை அதனுடன் சேர்த்து அரைத்துவிடக் கூடாது.

அடுத்து ஒரு வாணலியில் தாராளமாக நல்லெண்ணெய் ஊற்றிச் சூடானதும், கடுகு, கருவேப்பிலை சேர்த்துத் தாளிக்க வேண்டும். தாளிப்பு தயாரானதும், நாம் ஏற்கனவே அரைத்து வைத்துள்ள பூண்டு-வெங்காய விழுதை உள்ளே சேர்த்து வதக்கத் தொடங்குங்கள். அடுப்பை மிதமான தீயிலேயே வைத்து வதக்குவது மிகவும் அவசியம். இதற்கிடையில் தனியாக இரண்டு பழுத்த தக்காளிகளை மிக்ஸியில் போட்டு மென்மையாக அரைத்து வைத்துக்கொள்ளுங்கள். வாணலியில் வதங்கிக் கொண்டிருக்கும் வெங்காய விழுதோடு இந்தத் தக்காளி விழுதையும் ஒன்றாகச் சேர்த்துக்கொள்ளவும்.

Image Credit : X

நல்லெண்ணெய் கார சட்னி

தக்காளியின் பச்சை வாசனை முழுமையாகப் போகும் வரை நன்கு வதக்கிவிட்டு, பின்னர் மிகச் சிறிய அளவு தண்ணீர் சேர்த்து மிதமான தீயில் கொதிக்க விடவும். சட்னி நன்றாகக் கொதித்து, நாம் ஊற்றிய நல்லெண்ணெய் பிரிந்து மேலே மிதந்து வரும் வரை காத்திருக்க வேண்டும். இறுதியாகப் பொடியாக நறுக்கிய கொத்தமல்லி இலைகளை மேலே தூவி இறக்கினால், கமகமக்கும் வாசனையோடு நாவில் எச்சில் ஊறவைக்கும் பாரம்பரிய காரைக்குடி கார சட்னி தயார். சுடச்சுட இட்லி, மொறுமொறுப்பான தோசையுடன் வைத்துச் சாப்பிட இது அட்டகாசமான இணையாக இருக்கும்.