துளியும் கசப்பில்லாமல், உதிரி உதிரியான கல்யாண வீட்டு எலுமிச்சை சாதம் செய்வது எப்படி? இந்த 4 டிப்ஸை மறக்காதீங்க!

நீண்ட தூரப் பயணங்கள் மற்றும் அவசர மதிய உணவுத் தேவைகளுக்கு அனைவரும் விரும்பும் கல்யாண வீட்டு எலுமிச்சை சாதத்தை, துளியும் கசப்பு மற்றும் பிசுபிசுப்பு இல்லாமல் உதிரி உதிரியாக வீட்டிலேயே செய்வது எப்படி என்பதை பற்றி பார்ப்போம்.

Image Credit : Google And Facebook

கல்யாண வீட்டு எலுமிச்சை சாதம் செய்வது எப்படி?

நீண்ட தூரப் பயணங்கள் செல்லும்போதோ அல்லது அவசரமாக மதிய உணவு தயாரிக்க வேண்டிய நேரங்களிலோ நமது நினைவிற்கு முதலில் வருவது தயிர் சாதம் மற்றும் எலுமிச்சை சாதம் போன்ற உணவு வகைகள்தான். அதிலும் குறிப்பாக, மங்கலகரமான மஞ்சள் நிறத்தில் நறுமணம் வீசும் கல்யாண பந்தி எலுமிச்சை சாதத்தை பலரும் விரும்பிச் சாப்பிடுவார்கள்.

ஆனால், இதை வீடுகளில் செய்யும்போது சில நேரங்களில் அரிசி குழைந்து பிசுபிசுப்பாக மாறிவிடும்; அல்லது எலுமிச்சைச் சாற்றில் உள்ள சிறு கசப்புத் தன்மை முழு சுவையையும் குறைத்துவிடும். எந்தவொரு குறையும் இல்லாமல், சரியான பக்குவத்தில் சுவையான எலுமிச்சை சாதம் தயார் செய்வதற்கான முழுமையான செய்முறையை இங்கே பார்க்கலாம்.

Image Credit : Google

தேவையான பொருட்கள் என்னென்ன?

பச்சரிசி அல்லது சாப்பாட்டு அரிசி: 1 கப்

பெரிய அளவிலான எலுமிச்சைப் பழம்: 1

நல்லெண்ணெய்: 3 ஸ்பூன்

தாளிக்க: கடுகு, உளுத்தம் பருப்பு, கடலைப்பருப்பு – தலா 1 ஸ்பூன்

வேர்க்கடலை: 2 ஸ்பூன்

முந்திரிப் பருப்பு: 10

மிளகாய்: காய்ந்த மிளகாய் – 2, பச்சை மிளகாய் – 2

இஞ்சி: 1 சிறிய துண்டு

மஞ்சள் தூள்: அரை ஸ்பூன்

பெருங்காயத் தூள்: கால் ஸ்பூன்

கறிவேப்பிலை, கொத்தமல்லி: சிறிதளவு

கல் உப்பு: தேவையான அளவு

Image Credit : x

எலுமிச்சை சாதம் செய்முறை

முதலில் அரிசியை முக்கால் பதத்திற்கு உதிரியாக வடித்து, அகலமான தாம்பாளத் தட்டில் கொட்ட வேண்டும். அதில் சிறிதளவு நல்லெண்ணெய் ஊற்றி விசிறியின் காற்றில் நன்றாக ஆறவிட வேண்டும். அடுப்பில் ஒரு வாணலியை வைத்து நல்லெண்ணெய் ஊற்றி சூடாக்க வேண்டும். எண்ணெய் காய்ந்ததும் கடுகு, உளுத்தம் பருப்பு, கடலைப்பருப்பு, வேர்க்கடலை மற்றும் முந்திரி ஆகியவற்றைச் சேர்த்து மிதமான தீயில் பொன்னிறமாக வறுக்க வேண்டும். அதன்பின் இஞ்சி, பச்சை மிளகாய், காய்ந்த மிளகாய், கறிவேப்பிலை மற்றும் பெருங்காயத் தூள் சேர்த்து நன்கு வதக்கிக் கொள்ளவும்.

தாளிப்பு முடிந்து அடுப்பை அணைத்த பிறகு, மஞ்சள் தூள் சேர்த்து லேசாகக் கிளற வேண்டும். தாளிப்பின் சூடு ஆறியதும் பிழிந்து வைத்து உள்ள எலுமிச்சைச் சாற்றை அதில் ஊற்றிக் கலக்கவும். இறுதியாக, இந்தக் கலவையை ஆறவைத்துள்ள சாதத்தில் ஊற்றி, தேவையான அளவு கல் உப்பைச் சேர்த்து மெதுவாகக் கிளறினால் அட்டகாசமான கல்யாண வீட்டு எலுமிச்சை சாதம் தயார்.

Image Credit : x

கசப்பு & பிசுபிசுப்பு வராமல் இருக்க 4 முக்கிய குறிப்புகள்

சூடான சாதத்தில் எலுமிச்சைச் சாற்றை ஊற்றினால் சாதம் ஒன்றோடு ஒன்று ஒட்டிப் பிசுபிசுப்பாக மாறிவிடும். எனவே, சாதத்தை நன்றாக ஆறவைத்த பிறகே கலக்க வேண்டும். எலுமிச்சைப் பழத்தைப் பிழியும்போது அதிக அழுத்தம் கொடுத்துப் பிழியக் கூடாது. பழத்தின் தோலில் உள்ள எண்ணெய் சுரப்பிகள் கசப்புத் தன்மையைக் கொண்டவை என்பதால், அவை சாற்றுடன் கலக்காமல் பார்த்துக் கொள்ள வேண்டும். தாளிப்பு முழுவதும் முடிந்து அடுப்பை அணைத்த பிறகே மஞ்சள் தூளைச் சேர்க்க வேண்டும். கொதிக்கும் எண்ணெயில் மஞ்சள் தூள் வறுபட்டால், அது உணவிற்குக் கசப்புத் தன்மையைக் கொடுத்துவிடும்.

அடுப்பில் வைத்து நேரடியாக எலுமிச்சைச் சாற்றைக் கொதிக்க வைப்பதோ, அல்லது சாற்றை ஊற்றிய பிறகு அடுப்பை எரிய விடுவதோ முற்றிலும் தவிர்க்கப்பட வேண்டும். இந்தக் குறிப்புகளைக் கவனத்தில் கொண்டு தயாரித்தால், உதிரி உதிரியான, துளியும் கசப்பு இல்லாத எலுமிச்சை சாதம் மிகச் சிறப்பாக வரும். இதனுடன் காரமான உருளைக்கிழங்கு வறுவல் அல்லது அப்பளம் வைத்துப் பரிமாறினால் அதன் சுவை நாவில் நீண்ட நேரம் நிலைத்திருக்கும்.