Better Sleep: இரவில் படுத்த உடனே தூக்கம் வரணுமா? இந்த 6 உணவுகளை சாப்பிட்டு பாருங்க!
Better Sleep: நல்ல உறக்கத்திற்கு நாம் உட்கொள்ளும் உணவு மிக முக்கியமானது. மெலடோனின், டிரிப்டோபான், மெக்னீசியம், பி வைட்டமின்கள் மற்றும் ஆன்டிஆக்ஸிடன்ட்கள் நிறைந்துள்ள உணவுகள் அமைதியான உறக்கத்திற்கு உதவக்கூடும்.
நிம்மதியான தூக்கத்துக்கு உதவும் 6 உணவுகள்
நல்ல உறக்கத்திற்கு நாம் உட்கொள்ளும் உணவு முக்கிய பங்கு வகிக்கிறது. மெலடோனின், டிரிப்டோபான், மெக்னீசியம், பி வைட்டமின்கள் மற்றும் ஆன்டிஆக்ஸிடன்ட்கள் நிறைந்துள்ள உணவுகள் அமைதியான உறக்கத்திற்கு உதவக்கூடும். இரவில் நல்ல உறக்கத்திற்கு உதவும் உணவுகளைப் பற்றித்தான் நாம் இப்போது பார்க்கப் போகிறோம்.
தக்காளி நல்ல தூக்கத்துக்கு உதவும்
தக்காளியில் பொட்டாசியம், வைட்டமின் சி, ஆன்டிஆக்ஸிடன்ட்கள் அதிகமாக உள்ளன. இது நோய் எதிர்ப்பு சக்தி, இதய ஆரோக்கியம், பார்வைத்திறன் ஆகியவற்றை மேம்படுத்த உதவுகிறது. அதுமட்டுமல்லாமல், இதிலுள்ள சத்துக்கள் நல்ல தூக்கத்திற்கும் உதவும். தக்காளியில் இயற்கையாகவே மெலடோனின் உள்ளது. சமைத்த அல்லது பதப்படுத்தப்பட்ட தக்காளியில் லைக்கோபீன், கரோட்டினாய்டுகள் அதிகமாக உள்ளன. தினமும் 7-8 மணி நேரம் நன்றாகத் தூங்குவதற்கு இந்தச் சத்துக்கள் உதவுவதாகக் கூறப்படுகிறது.
செர்ரி ஜூஸ் குடித்தால் வேகமாக தூக்கம் வரும்
செர்ரி ஜூஸில் மெலடோனின் மற்றும் டிரிப்டோபான் ஆகிய சத்துகள் இயற்கையாகவே அமைந்துள்ளன. அதனால், செர்ரி ஜூஸ் அருந்தினால் விரைவாகத் தூக்கம் வருவதோடு, நீண்ட நேரமும் அத்தூக்கம் நீடிக்கும். செர்ரி பழங்களில் மெலடோனின் உள்ளது. இந்த ஹார்மோன்தான் நமது தூக்கம் மற்றும் விழிப்புச் சுழற்சியைக் கட்டுப்படுத்துகிறது.
பல்வேறு நட்ஸ் மற்றும் விதைகள்
பல்வேறு வகையான நட்ஸ் வகைகளும் விதைகளும் நல்ல தூக்கத்திற்கு உதவக்கூடும். குறைந்த அளவில் உட்கொண்டாலே, தூக்கத்திற்கு உதவும் பல ஊட்டச்சத்துக்கள் இவற்றில் நிறைந்துள்ளன. இவற்றில் டிரிப்டோபான், பி6, ஃபோலேட் போன்ற பி-வைட்டமின்கள் மற்றும் மெக்னீசியம், கால்சியம், இரும்பு, துத்தநாகம் போன்ற ஊட்டச்சத்துக்களும் உள்ளன. சியா, ஆளி விதைகள், சணல் விதைகள் மற்றும் வால்நட்ஸ் ஆகியவற்றில் தூக்கத்திற்கு உதவும் ஆன்டிஆக்ஸிடன்ட்களும் உள்ளன.
தூக்கத்திற்கு உதவும் கிவி
கிவி மிகவும் சுவையான பழம். இதில் குடல் ஆரோக்கியத்திற்குத் தேவையான நார்ச்சத்தும், நல்ல தூக்கத்திற்கு உதவும் சத்துக்களும் அதிகமாக இருக்கின்றன. தூங்குவதற்கு முன்னால் சாப்பிடக் கிவி ஒரு சிறந்த சிற்றுண்டி (ஸ்நாக்). இதில் செரோடோனின், வைட்டமின் சி, ஈ போன்ற ஆன்டிஆக்ஸிடன்ட்கள் உள்ளன. தூங்குவதற்குச் சிறிது நேரத்திற்கு முன்னால் ஒன்று அல்லது இரண்டு கிவி பழங்கள் சாப்பிட்டால், சீக்கிரமாகத் தூக்கம் வரும், தூக்கமும் கலையாமல் இருக்கும்.
கீரைகளை சாப்பிடுவது தூக்கத்திற்கு உதவும்
பச்சை நிறக் கீரைகளைச் சாப்பிடுவது இரவில் நன்றாகத் தூங்க உதவும். செரோடோனின் உற்பத்திக்குத் தேவையான டிரிப்டோஃபான், பி-வைட்டமின்கள் இதில் அதிகமாக உள்ளன. அதுமட்டுமில்லாமல், தூக்கமின்மை, தூக்கம் கலைவது போன்ற பிரச்சனைகளைத் தடுக்கும் மெக்னீசியம், கால்சியம், இரும்பு, துத்தநாகம் போன்ற தாதுக்களும் இதில் இருக்கின்றன.
தூக்கத்திற்கு உதவும் முட்டை
முட்டை, தூக்கத்திற்கு உதவும் 'டிரிப்டோபான்' சத்தின் ஒரு சிறந்த மூலமாகும். இதில் பி-வைட்டமின்களும் அதிகமாக உள்ளன. உடம்பில் காபா, செரோடோனின் உற்பத்தியாக இந்த வைட்டமின்கள் தேவைப்படுகின்றன. இந்த இரண்டும் தான் நிம்மதியான தூக்கத்திற்கு உதவுகின்றன. வேகவைத்த முட்டையை சாலட், சாண்ட்விச் அல்லது தானிய உணவுகளோடு சேர்த்துச் சாப்பிடலாம்.
