பாலிவுட் பாட்ஷா ஷாருக்கானுடன் கைகோர்க்கும் KGF யாஷ்? எல்லாம் ஓ.கே... ஆனா ஒரே ஒரு சிக்கல்..
பாலிவுட் சூப்பர் ஸ்டார் ஷாருக்கானும், யாஷும் இணைந்து நடிக்க உள்ளதாக தகவல்கள் வெளியாகி உள்ளன.
தொலைக்காட்சி நடிகராக தனது திரை வாழ்க்கையை தொடங்கிய யாஷ் இன்று பான் இந்தியா நடிகராக மாறி உள்ளார். 2008-ம் ஆண்டு ராக்கி என்ற படத்தின் மூலம் கன்னட திரையுலகில் ஹீரோவாக அறிமுகமானார் யாஷ். ஆனால் இந்த படம் படுதோல்வி அடைந்தது. பின்னர் 2012-ம் ஆண்டு வெளியான டிராமா என்ற படம் அவருக்கு மிகப்பெரிய ஹிட் படமாக அமைந்ததுடன், யாஷுக்கு நல்ல அங்கீகரம் கிடைத்தது.
இதை தொடர்ந்து பல படங்களில் நடித்த யாஷ் கன்னட திரையுலகில் முன்னணி நடிகராக வலம் வந்தார். ஆனால் யாஷுக்கு மட்டுமின்றி ஒட்டுமொத்த கன்னட சினிமாவுக்கு திருப்புமுனை ஏற்படுத்திய படம் என்றால் அது கே.ஜி.எஃப் படம் தான்.
பிரசாந்த் நீல் இயக்கிய கேஜிஎஃப் 1, 2 பல வசூல் சாதனைகளை படைத்த நிலையில், இந்த படங்களில் நடித்ததன் மூலம் பான் இந்தியா ஸ்டாராக மாறி உள்ளார் யாஷ்.
இந்த நிலையில் பாலிவுட்டிலும் தடம் பதிக்க உள்ளார் யாஷ். நிதிஷ் திவாரி இயக்கும் ராமாயணம் படத்தின் மூலம் பாலிவுட்டில் எண்ட்ரி கொடுக்க உள்ளார். இந்த படத்தை தொடர்ந்து அவர் மற்றொரு ஹிந்தி படத்திலும் நடிக்க உள்ளதாக தகவல்கள் தெரிவிக்கின்றன.
இந்த நிலையில் பாலிவுட் சூப்பர் ஸ்டார் ஷாருக்கானும், யாஷும் இணைந்து ஒரு படத்தில் நடிக்க உள்ளதாக தகவல்கள் வெளியாகி உள்ளன. இதுகுறித்து யாஷ் மற்றும் ஷாருக்கான் இடையே பேச்சுவார்த்தை நடந்ததாகவும் இரு நடிகர்களும் இந்த படத்தில் நடிக்க மிகுந்த ஆர்வம் காட்டியதாகவும் கூறப்படுகிறது.
எனினும் அவர்கள் ஒரு நல்ல கதைக்காக காத்திருப்பதாகவும் மிகுந்த எதிர்பார்ப்புடன் வரும் தங்கள் ரசிகர்களை ஏமாற்றக்கூடாது என்பதில் இருவரும் உறுதியாக இருப்பதாகவும் தெரிகிறது. எனவே அவசரப்பட்டு எந்த முடிவையும் எடுக்காமல் சரியான கதை கிடைக்கும் பட்சத்தில் ஷாருக்கான் யாஷ் இருவரும் இணைந்து நடிக்க முடிவு செய்துள்ளதாகவும் பாலிவுட் வட்டாரங்கள் தெரிவிக்கின்றன.
இதனிடையே ஷாருக்கானின் ரெட் சில்லிஸ் என்டர்டெயின்மென்ட் நிறுவனத்துடன் மற்றொரு படத்தில் நடிக்க யாஷ் பேச்சுவார்த்தை நடத்தி வருவதாகவும் அவருக்கு நெருக்கமானவர்கள் தெரிவிக்கின்றனர். அதாவது யாஷ் ஏற்கனவே தனது இரண்டாவது படத்திற்கான பேச்சுவார்த்தையில் இருக்கிறார் என்றும், ஆக்ஷன் படமாக உருவாகும் இந்த படத்திற்காக என்டர்டெயின்மென்ட் நிறுவனத்துடன் உரையாடுகிறார் என்றும் கூறப்படுகிறது.
Yash Toxic
தற்போது டாக்ஸிக் என்ற கன்னட படத்தில் யாஷ் நடித்து வருகிறார். . இப்படத்தை கீது மோகன்தாஸ் இயக்கவுள்ளதாக தகவல் வெளியானாலும், மீதமுள்ள நடிகர்கள் விவரம் இன்னும் வெளியாகவில்லை. இப்படத்தில் ஹீரோயினாக நடிக்க கரீனா கபூரிடம் பேச்சுவார்த்தை நடந்து வருவதாகவும் தகவல் வெளியாகியுள்ளது.