வாய் கிழிய பேசுவோம் ஆனா.. 'இந்தியன் 2' ட்ரைலரில் தலைவர் தாக்கப்பட்டார்! நோட் பண்ணி போட்டு தாக்கிய ப்ளூ சட்டை!

இந்தியன் 2 திரைப்படம் ஜூலை 12-ஆம் தேதி ரிலீசாக உள்ள நிலையில், இப்படத்தின் ட்ரைலர் இன்று வெளியானது. ட்ரைலர் குறித்து ப்ளூ சட்டை மாறன் தலைவர் தாக்கப்பட்டார் என 'அந்த டயலாக்கை நோட் பண்ணி கூறியுள்ளார்'. இதன் பின்னணி குறித்து பார்க்கலாம் வாங்க. 

உலக நாயகன் கமல்ஹாசன், 'விக்ரம்' பட வெற்றிக்கு பின்னர்... தேர்வு செய்து நடிக்கும் படங்களின் கதையிலும், கதாபாத்திரத்திலும், கூடுதல் கவனம் செலுத்தி வருகிறார். அந்த வகையில் தற்போது இவர் நடித்து முடித்துள்ள திரைப்படம், 'இந்தியன் 2'. கடந்த 1996-ஆம் ஆண்டு வெளியாகி இமாலய வெற்றி பெற்ற 'இந்தியன்' படத்தை மீண்டும் தூசு தட்டி இயக்குனர் ஷங்கர்... சுமார் 29 வருடங்களுக்கு பின்னர் நாட்டின் நிலவரத்தை மக்களுக்கு எடுத்து கூறும் விதமாகவே இந்தியன் தாத்தாவை களமிறக்கி 'இந்தியன் 2' பாகத்தை இயக்கியுள்ளார்.

'இந்தியன் 2' படத்தின் அறிவிப்பு 2017-ஆம் ஆண்டு வெளியானாலும் கூட, இப்படத்தின் படப்பிடிப்பு 2019-ல் தான் துவங்கியது. இடையில் ஏகப்பட்ட பிரச்சனைகளில் இந்தியன் தாத்தா சிக்கிய நிலையில், ஒருவழியாக அனைத்தையும் கடந்து ரிலீசுக்கு இப்போது தான் தயாராகி உள்ளார்.

முதல் பாகத்தில் அப்பா சேனாதிபதி கதாபாத்திரத்திலும், மகன் சந்துரு வேடத்தையும் ஏற்று நடித்த கமல், இரண்டாம் பாகத்தில் சிங்கம் சிங்கிளாத்தான் வரும் என்பது போல், நேதாஜி சுபாஷ் சந்திரபோஸ் வழியை பின்பற்றும் வெறித்தனமான மக்கள் காப்பாளராக களமிறங்கி உள்ளார்.

மேலும் இந்த படத்தில் மக்கள் உரிமைக்காகவும், அநீதிக்காகவும் போராடும் ரோலில் சித்தார்த், ப்ரியா பவானி நடிக்க, பாபி சிம்ஹா போலீஸ் அதிகாரியாக நடித்துள்ளார். நெடுமுடி வேணு ஓய்வு பெற்ற போலீஸ் அதிகாரியாக வர, விவேக் வழக்கம் போல் காமெடியை அள்ளி தெறிக்கும் காவலாளராக நடித்துள்ளார். அதே போல் இப்படத்தில் மனோபாலாவும் முக்கிய கதாபாத்திரத்தில் நடித்துள்ளார்.

படத்தின் மொத்த பணிகளையும் முடிந்து 'இந்தியன் 2' ரிலீசுக்கு தயாராகி உள்ளது. இன்று மாலை 6 மணிக்கு இப்படத்தின் ட்ரைலர் வெளியாகும் என அறிவிக்கப்பட்ட நிலையில்... ஒரு மணிநேரம் தாமதமாக அதாவது சரியாக 7 மணிக்கு தான் 'இந்தியன் 2' ட்ரைலர் வெளியானது. ட்ரைலரிலேயே தன்னுடைய மாஸை கமல்ஹாசன் வெளிப்படுத்தியதால், இப்படத்தின் மீதான எதிர்பார்ப்பும் கூடியுள்ளது.

இந்த ட்ரைலரில் நடிகர் சித்தார்த் ஒரு காட்சியில் பேசும் போது...  'சிஸ்டம் சரியில்லைனு வாய் கிழிய பேசுவோம். ஆனா அதை தடுக்க ஒரு துரும்பை கூட கிள்ளிப்போடுறது இல்ல' என கூறியதை சுட்டி காட்டி, சிஸ்டம் சரி இல்லை என பேசி... அரசியலுக்கு வருவதாக அறிவித்து கடைசி நேரத்தில் ஜகா வாங்கிய ரஜினியை தான் குறி வைத்து பேசியுள்ளார் என்பதை தெரிவிக்கும் விதத்தில், அந்த வசனத்தை பதிவிட்டு தலைவர் தாக்கப்பட்டார் என எக்ஸ் தலைப்பதில் கூறியுள்ளார். இந்த பதிவு தற்போது வைரலாகி வருகிறது.