முதல் முறையாக 9ஆவது வரிசையில் களமிறங்கிய தோனி – கோல்டன் டக் அவுட்!

பஞ்சாப் கிங்ஸ் அணிக்கு எதிரான 53ஆவது லீக் போட்டியில் முதலில் பேட்டிங் செய்த சென்னை சூப்பர் கிங்ஸ் அணியில் எம்.எஸ்.தோனி முதல் முறையாக 9ஆவது வரிசையில் களமிறங்கியுள்ளார்.

Punjab Kings vs Chennai Super Kings, 53rd Match

வருடத்திற்கு ஒரு முறை தான் தோனியின் தரிசனம் கிடைக்கிறது. அதுவும், ஐபிஎல் கிரிக்கெட் தொடர் மூலமாகத்தான் கிடைக்கிறது. அப்படி கிடைக்கும் தோனியின் தரிசனத்தை பார்ப்பதற்கு கோடிக்கணக்கான ரசிகர்கள் தவமிருக்கிறனர். அப்படியிருக்கும் நிலையில், தோனியின் ஒவ்வொரு அசையும் ஏராளமானோர் ரசிக்கின்றனர்.

இந்த நிலையில் தற்போது நடைபெற்று வரும் பஞ்சாப் கிங்ஸ் அணிக்கு எதிரன 53ஆவது லீக் போட்டியில் அடுத்தடுத்து விக்கெட்டுகளை இழந்து தடுமாறிய போது, 17ஆவது ஓவரில் தோனி களமிறங்குவார் என்று எதிர்பார்க்கப்பட்ட நிலையில் ஷர்துல் தாக்கூர் களமிறங்கினார். அவர் 17 ரன்களில் ஆட்டமிழந்த போது, தோனி 9ஆவது வரிசையில் களமிறங்கினார்.

இதன் மூலமாக முதல் முறையாக தோனி 9ஆவது வரிசையில் களமிறங்கியுள்ளார். இதற்கு முன்னதாக ஒரு விக்கெட் கீப்பராக 9ஆவது வரிசையில் களமிறங்கியவர்களின் பட்டியலில் மகேஷ் ராவத் (ஆர்ஆர், 2008 -2009) 6 முறை 9ஆவது வரிசையில் களமிறங்கியுள்ளார்.

MS Dhoni Golden Duck Out

பினால் ஷா (மும்பை இந்தியன்ஸ், 2009) 2 முறையும், உதய் கவுல் (பஞ்சாப் கிங்ஸ், 2008) ஒரு முறையும், விருத்திமான் சகா (சன்ரைசர்ஸ் ஹைதராபாத், 2021) ஒரு முறையும், எம்.எஸ்.தோனி (சென்னை சூப்பர் கிங்ஸ், 2025) ஒரு முறையும் களமிறங்கியுள்ளனர்.

Punjab Kings vs Chennai Super Kings, 53rd Match

கடந்த 2023 மற்றும் 2024 ஆம் ஆண்டுகளில் தோனி 8 இன்னிங்ஸ்களில் 8ஆவது வரிசையில் களமிறங்கி விளையாடியுள்ளார் என்பது குறிப்பிடத்தக்கது. இந்தப் போட்டியில் முதலில் பேட்டிங் செய்த சென்னை சூப்பர் கிங்ஸ் அணியானது 20 ஓவர்களில் 9 விக்கெட்டுகளை இழந்து 167 ரன்கள் எடுத்துள்ளது.

சிஎஸ்கே அணியில் ருதுராஜ் கெய்க்வாட் மற்றும் அஜிங்க்யா ரஹானே இருவரும் தொடக்க வீரர்களாக களமிறங்கினர். இதில், ரஹானே 9 ரன்களில் ஆட்டமிழந்தார். அதன் பிறகு வந்த டேரில் மிட்செல் மற்றும் கெய்க்வாட் இருவரும் ஓரளவு தாக்குபிடித்து ரன்கள் எடுத்தனர். எனினும் கெய்க்வாட் 32 ரன்களில் ராகுல் சாஹர் பந்தில் ஆட்டமிழந்தார். அடுத்த பந்திலேயே ஆறுச்சாமி ஷிவம் துபே கோல்டன் டக் முறையில் ஆட்டமிழந்தார்.

இதே போன்று மிட்செல் 30 ரன்கள் எடுத்த நிலையில், ஹர்ஷல் படேல் பந்தில் ஆட்டமிழந்தார். மொயீன் அலி 17, மிட்செல் சான்ட்னர் 11, ஷர்துல் தாக்கூர் 17 என்று சொற்ப ரன்களில் ஆட்டமிழந்தனர். கடைசியாக வந்த தோனி கோல்டன் டக் முறையில் ஹர்ஷல் படேல் பந்தில் கிளீன் போல்டானார். இறுதியாக கடைசி ஓவரில் ரவீந்திர ஜடேஜா தனது விக்கெட்டை இழந்தார். அவர் 26 பந்துகளில் 3 பவுண்டரி, 2 சிக்ஸர் உள்பட 43 ரன்களில் ஆட்டமிழந்தார்.

இறுதியாக ரிச்சர்டு கிளீசன் 2 ரன்கள் எடுக்க 20 ஓவர்களில் 9 விக்கெட்டுகளை இழந்த சிஎஸ்கே 167 ரன்கள் எடுத்துள்ளது. பவுலிங்கைப் பொறுத்த வரையில் பஞ்சாப் அணியில் ராகுல் சாஹர் மற்றும் ஹர்ஷல் படேல் தலா 3 விக்கெட்டுகள் கைப்பற்றினர். அர்ஷ்தீப் சிங் 2 விக்கெட்டும், சாம் கரண் ஒரு விக்கெட்டும் கைப்பற்றினர்.

பஞ்சாப் கிங்ஸ்:

ஜானி பேர்ஸ்டோவ், ரிலீ ரோஸோவ், ஷஷாங்க் சிங், சாம் கரண் (கேப்டன்), ஜித்தேஷ் சர்மா (விக்கெட் கீப்பர்), அஷுதோஷ் சர்மா, ஹர்ப்ரீத் பிரார், ஹர்ஷல் படேல், ராகுல் சாஹர், கஜிசோ ரபாடா, அர்ஷ்தீப் சிங்.

சென்னை சூப்பர் கிங்ஸ்:

ருதுராஜ் கெய்க்வாட் (கேப்டன்), அஜிங்க்யா ரஹானே, டேரில் மிட்செல், ஷிவம் துபே, மொயீன் அலி, ரவீந்திர ஜடேஜா, எம்.எஸ்.தோனி (விக்கெட் கீப்பர்), மிட்செல் சாண்ட்னர், ஷர்துல் தாக்கூர், ரிச்சர்டு கிளீசன், துஷார் தேஷ்பாண்டே.

இதற்கு முன்னதாக இரு அணிகளும் மோதிய 29 போட்டிகளில் பஞ்சாப் கிங்ஸ் 13 போட்டியிலும், சென்னை சூப்பர் கிங்ஸ் 15 போட்டியிலும் வெற்றி பெற்றுள்ளன. ஒரு போட்டி டையில் முடிந்துள்ளது. தரம்சாலாவில் நடைபெற்ற 2 போட்டிகளில் இரு அணிகளும் தலா ஒரு போட்டியில் வெற்றி பெற்றுள்ளன. ஒட்டுமொத்தமாக தரம்சாலாவில் நடைபெற்ற 11 போட்டிகளில் பஞ்சாப் கிங்ஸ் 5ல் வெற்றியும், 4ல் தோல்வியும் அடைந்துள்ளது.

இந்த சீசனில் இதுவரையில் விளையாடிய 10 போட்டிகளில் சிஎஸ்கே 5 போட்டியில் வெற்றியும், 5 போட்டிகளில் தோல்வியும் அடைந்து புள்ளிப்பட்டியலில் 5ஆவது இடத்தில் உள்ளது. பஞ்சாப் கிங்ஸ் விளையாடிய 10 போட்டிகளில் 4ல் வெற்றியும், 6ல் தோல்வியும் அடைந்து புள்ளிப்பட்டியலில் 8ஆவது இடத்தில் உள்ளது.