பிரபுவின் கேரியரை மாற்றிய சூப்பர் ஹிட் மூவி! குடும்பங்கள் கொண்டாடிய சின்னதம்பி வெற்றியின் சீக்ரெட்!

1991-ல் வெளியான சின்னதம்பி திரைப்படம் பிரபுவின் திரைப்பயணத்தில் ஒரு மைல்கல். இளையராஜாவின் இசை, பிரபு-குஷ்புவின் நடிப்பு, பி.வாசுவின் உணர்வுப்பூர்வமான திரைக்கதை, கிளைமாக்ஸ் திருப்பம் ஆகியவை படத்தின் மாபெரும் வெற்றிக்கு முக்கிய காரணங்களாக அமைந்தன.

Image Credit : web/yputube

குடும்பங்கள் கொண்டாடிய திரைப்படம்!

1991-ம் ஆண்டு ஜூன் மாதம் திரையரங்குகளில் ஒரு புயல் வீசியது. அது சண்டைக் காட்சிகளோ, அதிரடி வசனங்களோ நிறைந்த புயல் அல்ல; ஒரு வெள்ளந்தி இளைஞனின் அன்பும், மனதை உருக்கும் இசையும் கலந்த 'சின்னதம்பி' புயல். நடிகர் பிரபுவின் திரைப்பயணத்தை 'சின்னதம்பிக்கு முன், பின்' என இரண்டாகப் பிரிக்கும் அளவுக்கு இந்தப் படம் மாபெரும் வெற்றியைப் பதிவு செய்தது. அப்படி என்னதான் இருந்தது இந்தப் படத்தில்? குடும்பங்கள் கொண்டாடிய அந்த வெற்றியின் 5 முக்கிய தூண்கள் இதோ:

Image Credit : our own

மனதை மயக்கிய இளையராஜாவின் இசை

"பாடல் நன்றாக இருந்தால் படம் பாதி வெற்றி" என்பார்கள். ஆனால், சின்னதம்பி படத்தின் பாடல்கள் படத்திற்கு 200% வெற்றியைத் தேடித்தந்தன. "நீ எங்கே என் அன்பே" பாடல் பட்டிதொட்டியெங்கும் ஒரு சோக அலையை உருவாக்கியது. அதேபோல் தொட்டின் மேலே பாடல் எல்லோரையும் தூங்க வைத்தது. "போவோமா ஊர்கோலம்" இன்றும் திருமண விழாக்களின் தேசிய கீதம். இளையராஜாவின் பின்னணி இசை, படம் பார்க்கும் ரசிகர்களின் உணர்வுகளோடு விளையாடியது என்றுதான் சொல்ல வேண்டும். 

Image Credit : youtube/web

பிரபுவின் 'வெள்ளந்தி' நடிப்பு

பிரபு என்றாலே மிடுக்கான தோற்றம், துடிப்பான நடிப்பு என்று இருந்த பிம்பத்தை இந்தப் படம் உடைத்தது. விவரம் தெரியாத, தாயின் சொல்லே மந்திரம் என வாழும் ஒரு அப்பாவி கிராமத்து இளைஞனாக பிரபு வாழ்ந்திருந்தார். அவரது குழந்தைத்தனமான சிரிப்பும், கிளைமாக்ஸ் காட்சியில் அவர் காட்டிய உணர்ச்சிகரமான நடிப்பும் ரசிகர்களைக் கண்கலங்க வைத்தன.

Image Credit : youtube/web

நந்தினியாக குஷ்புவின் 'க்ளாசிக்' அழகு

சின்னதம்பி படம் குஷ்புவுக்கு ஒரு மிகப்பெரிய அடையாளத்தைக் கொடுத்தது. கட்டுக்கோப்பான அண்ணன்களின் காவலில் வளரும் 'நந்தினி' கதாபாத்திரத்தில் குஷ்புவின் நடிப்பு மிக இயல்பாக இருந்தது. பிரபு - குஷ்பு இடையேயான அந்தச் சண்டைகளும், பின்னாளில் மலரும் காதலும் திரையில் ஒரு மேஜிக்கை உருவாக்கின.

Image Credit : Google

செண்டிமெண்ட் நிறைந்த திரைக்கதை

இயக்குநர் பி. வாசு, குடும்பப் பாசம் என்ற ஆயுதத்தை மிகச் சரியாகப் பயன்படுத்தியிருந்தார்.  மனோரமா மற்றும் பிரபு இடையிலான பிணைப்பு தாய்மார்களை மீண்டும் மீண்டும் தியேட்டருக்கு வரவழைத்தது. அதேபோல் ராதாரவி தலைமையிலான மூன்று அண்ணன்களின் மிரட்டலான அன்பும் ரசிக்கும்படி இருந்தது. இந்த எமோஷனல் காட்சிகள் பெண்களையும், பெரியவர்களையும் போட்டிபோண்டு கொண்டு திரையரங்கிற்கு வரவழைத்தன.

Image Credit : Asianet News

கிளைமாக்ஸ் திருப்பம்

சின்னதம்பி படத்தின் கிளைமாக்ஸ் அதுவரை வந்த சினிமாக்களிலிருந்து சற்றே மாறுபட்டது. தன் கழுத்தை அறுத்துக்கொண்டு பிரபு பாடும் அந்த இறுதிக்காட்சி, தியேட்டரில் இருந்தவர்களை இருக்கையின் நுனிக்கே கொண்டு வந்தது. அந்தத் தியாகமும், அதன் பின் நடக்கும் சுபமான முடிவும் ரசிகர்களுக்கு ஒரு திருப்தியான உணர்வைத் தந்தது.

Image Credit : youtube/web

காலங்கள் கடந்தும் பேசப்படும் சின்னதம்பி

வசூலில் பல கோடிகளைக் குவித்தது மட்டுமின்றி, தமிழகத்தின் பல திரையரங்குகளில் ஓராண்டுக்கும் மேலாக ஓடி சாதனை படைத்தது 'சின்னதம்பி'. ஒரு நல்ல கதையும், உணர்வுப்பூர்வமான இசையும் சேர்ந்தால் காலங்கள் கடந்தும் ஒரு படம் பேசப்படும் என்பதற்கு சின்னதம்பியே சாட்சி.