Dharman : இது ரஜினியா இல்ல பிரதீப்பா? என்னய்யா பண்ணிவச்சிருக்கீங்க? ட்ரோலில் சிக்கிய தலைவர் 173 பட போஸ்டர்

Thalaivar 173 Movie Title : கமல்ஹாசன் தயாரிப்பில் சூப்பர்ஸ்டார் ரஜினிகாந்த் நடிக்கும் தலைவர் 173 படத்தின் டைட்டில் குறித்த அறிவிப்பு வெளியாகி இணையத்தில் வைரலாகி வருகிறது.

Image Credit : X

Thalaivar 173 Movie Titled as Dharman

சூப்பர்ஸ்டார் ரஜினிகாந்த் நடிப்பில் கடைசியாக வெளிவந்த படம் கூலி. கடந்த ஆண்டு ரிலீஸ் ஆன அப்படம் கலவையான விமர்சனங்களை பெற்றது. இதையடுத்து அவர் ஜெயிலர் 2 படத்திலும் நடித்து முடித்துள்ளார். மேலும் ரஜினிகாந்தும், கமல்ஹாசனும் இணைந்து நெல்சன் திலீப்குமார் இயக்கத்தில் ஒருபடத்தில் நடிக்க உள்ளனர். இதுதவிர கமல்ஹாசன் தயாரிப்பில் ஒரு படத்தில் நடிக்க கமிட்டாகி உள்ளார் ரஜினி. பிரம்மாண்டமாக உருவாகும் அப்படத்திற்கு தற்காலிகமாக தலைவர் 173 என டைட்டில் வைக்கப்பட்டு இருந்தது.

Image Credit : X

இயக்குநர்கள் மாற்றம்

தலைவர் 173 திரைப்படத்தை முதன்முதலில் இயக்க கமிட்டானது சுந்தர் சி தான். கடந்த ஆண்டு நவம்பர் மாதத்தில் இப்படம் குறித்த அறிவிப்பும் வெளியானது. ஆனால் அறிவிப்பு வெளியான ஒரே வாரத்தில் அப்படத்தில் இருந்து விலகினார் சுந்தர் சி. கதையில் திருப்தி இல்லாததால், ரஜினி அப்படத்தில் நடிக்க மறுத்ததாக பேச்சு அடிபட்டது. பின்னர் டான் பட இயக்குநர் சிபி சக்கரவர்த்தி, தலைவர் 173 படத்தை இயக்குவார் என அதிகாரப்பூர்வமாக அறிவிக்கப்பட்டது. அதற்கான ஆரம்பக்கட்ட வேலைகளும் முழுவீச்சில் நடைபெற்று வந்தனர்.

Image Credit : X

அஷ்வத் மாரிமுத்து இயக்குகிறார்

ஆனால் சில மாதங்களில் சிபி சக்கரவர்த்தியும் அப்படத்தில் இருந்து விலகிவிட்டார். இதனால் தலைவர் 173 படம் டிராப் என பேச்சு அடிபட்டது. ஆனால் அதற்கெல்லாம் முற்றுப்புள்ளி வைக்கும் விதமாக தற்போது தலைவர் 173 படத்தின் டைட்டில் உடன் அதை இயக்க உள்ள இயக்குநர் பற்றிய அறிவிப்பும் வெளியாகி உள்ளது. அதன்படி தலைவர் 173 திரைப்படத்தை அஷ்வத் மாரிமுத்து இயக்க உள்ளதாக அறிவிக்கப்பட்டு உள்ளது. இவர் இதற்கு முன்னர் ஓ மை கடவுளே, பிரதீப் ரங்கநாதனின் டிராகன் போன்ற படங்களை இயக்கி இருக்கிறார்.

Image Credit : X

டைட்டில் என்ன?

இந்த நிலையில், ரஜினிகாந்த் நடிப்பில் அவர் முதன்முறையாக இயக்க உள்ள படத்திற்கு தர்மன் என டைட்டில் வைக்கப்பட்டு உள்ளது. அப்படத்தை கமல்ஹாசனின் ராஜ்கமல் பிலிம்ஸ் நிறுவனம் தயாரிக்க, அனிருத் இசையமைக்கிறார். இப்படத்தின் ஸ்டண்ட் பணிகளை அன்பறிவு மேற்கொள்ள உள்ளனர். மேலும் இப்படத்தில் சிம்ரன், ராஷி கண்ணா, யோகிபாபு என மிகப்பெரிய நட்சத்திர பட்டாளமே இப்படத்தில் நடிக்கிறது. இப்படத்திற்கு நிக்கேத் பொம்மி ஒளிப்பதிவு செய்ய உள்ளார். பிரதீப் ராகவ் இப்படத்தின் படத்தொகுப்பு பணிகளை மேற்கொள்ள உள்ளார்.

Image Credit : X

ட்ரோலில் சிக்கிய போஸ்டர்

தர்மன் படத்தின் டைட்டில் உடன் அதன் பர்ஸ்ட் லுக் போஸ்டரும் அறிவிக்கப்பட்டு உள்ளது. ரஜினிகாந்த் சிகப்பு நிற சட்டை மற்றும் ஃபேண்ட் உடன் காட்சியளிக்கிறார். அதில் அவரது உடலுக்கும் தலைக்கும் சம்பந்தமே இல்லாதது போல இருப்பதாக நெட்டிசன்கள் சாடுகின்றனர். ஒரு சிலரோ இது ரஜினியா இல்லை பிரதீப்பா என கேட்டு வருகின்றனர். மேலும் சிலர் இது ஒரிஜினல் போட்டோவா இல்லை ஏஐ போட்டோவா என கேள்வி எழுப்பி வருகின்றனர்.