முதல் நாளை விட இரண்டாம் நாளில் அதிக வசூல்... பாக்ஸ் ஆபிஸில் அதகளம் செய்யும் திருச்சிற்றம்பலம்

Thiruchitrambalam : மித்ரன் ஆர் ஜவகர் இயக்கத்தில் தனுஷ் நடித்துள்ள திருச்சிற்றம்பலம் படத்தின் இரண்டாம் நாள் வசூல் நிலவரம் வெளியாகி உள்ளது.

மித்ரன் ஆர் ஜவகர் இயக்கத்தில் தனுஷ் நடித்த படம் திருச்சிற்றம்பலம். சன் பிக்சர்ஸ் தயாரித்துள்ள இப்படத்தில் நித்யா மேனன், பாரதிராஜா, பிரியா பவானி சங்கர், பிரகாஷ் ராஜ், ராஷி கண்ணா என மிகப்பெரிய நட்சத்திர பட்டாளமே இணைந்து நடித்திருந்தது. அனிருத் இசையமைத்திருந்த இப்படத்திற்கு ஓம்பிரகாஷ் ஒளிப்பதிவு செய்திருந்தார்.

இப்படத்தில் நடிகர் தனுஷ் உணவு டெலிவரி செய்யும் நபராக நடித்திருந்தார். இப்படம் மிகுந்த எதிர்பார்ப்புக்கு மத்தியில் நேற்று முன் தினம் ரிலீஸ் ஆனது. தமிழகத்தில் இப்படத்தை உதயநிதியின் ரெட் ஜெயண்ட் மூவிஸ் நிறுவனம் வெளியிட்டது. சுமார் 400 திரையரங்குகளுக்கு மேல் ரிலீசான இப்படத்திற்கு முதல் நாளில் இருந்தே அமோக வரவேற்பு கிடைத்து வருகிறது.

இதையும் படியுங்கள்... அந்த இடத்தில் புதிதாக டாட்டூ போட்டுக்கொண்ட நயன்தாரா - அதற்கு என்ன அர்த்தம் தெரியுமா?

அதன்படி இப்படம் முதல் நாளில் மட்டும் ரூ.9 கோடிக்கு மேல் வசூலித்திருந்தது. அதிகாலை 4 மணி காட்சி இல்லாமலேயே இந்த அளவுக்கு வசூலித்தது பெரிய பலமாக பார்க்கப்பட்டது. அதேபோல் இரண்டாம் நாளான நேற்று விடுமுறை தினம் என்பதனால் இப்படத்தின் வசூல் மேலும் அதிகரிக்கக்கூடும் என எதிர்பார்க்கபபட்டது.

அதன்படியே நேற்றும் பாக்ஸ் ஆபிஸில் பட்டைய கிளப்பி உள்ளது இப்படம். அதன்படி இரண்டாவது நாளில் இப்படம் ரூ.10 கோடி வசூலித்துள்ளதாக தகவல் வெளியாகி உள்ளது. இதன்மூலம் இரண்டே நாட்களில் இப்படம் ரூ.19 கோடி வசூலித்து உள்ளது. இன்றும், நாளையும் விடுமுறை நாட்கள் என்பதால் இப்படம் மேலும் வசூலிக்கும் என எதிர்பார்க்கப்படுகிறது.

இதையும் படியுங்கள்... கிருஷ்ண ஜெயந்தி வாழ்த்துகளோடு... தன்னுடைய 4 மாத மகனின் புகைப்படத்தை பகிர்ந்த காஜல் அகர்வால்.!