AC maintenance tips கோடைகாலத்தில் ஏசியை பயன்படுத்தும் முன் செய்ய வேண்டிய 5 முக்கிய பராமரிப்பு குறிப்புகளை அறிந்து மின் கட்டணத்தை சேமியுங்கள். மறக்காம செஞ்சிடுங்க!
கோடைக்காலம் வந்துவிட்டாலே நம் அனைவரின் வீடுகளிலும் ஏசியின் தேவை அதிகரித்துவிடும். மாதக்கணக்கில் பயன்படுத்தாமல் இருந்த ஏசியை, வெயில் காலம் வந்தவுடன் உடனடியாக ஆன் செய்வது நல்லதல்ல. அவ்வாறு செய்வதன் மூலம் இயந்திர பழுது, அதிக மின்சார கட்டணம் போன்ற பிரச்சினைகளை நீங்கள் சந்திக்க நேரிடும். எனவே, கோடைகாலத்தில் ஏசியை சீராக இயக்குவதற்கு முன் கவனிக்க வேண்டிய 5 முக்கிய விஷயங்களை இங்கே பார்க்கலாம்.
ஏசி ஃபில்டர்களை சுத்தம் செய்யவும் அல்லது மாற்றவும்
ஏசியை பயன்படுத்தாத போது அதன் ஃபில்டர்களில் அதிகப்படியான தூசிகள் சேர்ந்திருக்கும். இந்த அழுக்கு ஃபில்டர்களை அப்படியே பயன்படுத்தினால், ஏசி அதிகம் உழைக்க வேண்டியிருக்கும், குளிர்ச்சியும் குறையும். எனவே, ஃபில்டரை கழற்றி தண்ணீரில் நன்கு கழுவி உலர வைத்து மீண்டும் பொருத்துங்கள். ஃபில்டர் சேதமடைந்திருந்தால் புதியதை மாற்றுவது சிறந்த காற்றோட்டத்திற்கும், மின் கட்டணத்தை குறைக்கவும் உதவும்.
வெளிப்புற யூனிட்டில் கவனம் செலுத்துங்கள்
ஏசியின் வெளிப்புற யூனிட்டில் காய்ந்த இலைகள், தூசிகள் மற்றும் குப்பைகள் சேர அதிக வாய்ப்புள்ளது. இந்த குப்பைகளை அகற்றி, வெளிப்புற யூனிட்டிற்கு செல்லும் காற்றோட்டம் எதாவதொரு பொருளால் தடைபடாமல் இருப்பதை உறுதி செய்து கொள்ளுங்கள். இது கம்ப்ரசரின் மீது விழும் கூடுதல் அழுத்தத்தை குறைத்து ஏசியின் வாழ்நாளை நீட்டிக்க பெரிதும் உதவும்.
Related Articles
வயர்கள் மற்றும் மின் இணைப்புகளை சரிபார்க்கவும்
ஏசியை இயக்குவதற்கு முன்பு பிளக்குகள், சாக்கெட்டுகள் மற்றும் வயர்களை கவனமாக பரிசோதிக்கவும். நீங்கள் ஸ்டெபிலைசர் பயன்படுத்துகிறீர்கள் என்றால் அதையும் சரிபார்க்க வேண்டும். வயர்கள் அறுந்திருந்தாலோ அல்லது தளர்வாக இருந்தாலோ ஷார்ட் சர்க்யூட் ஏற்பட வாய்ப்புள்ளது. ஏதேனும் பழுது இருப்பதை நீங்கள் கண்டால் உடனடியாக ஒரு தொழில்முறை டெக்னீஷியனை அழைக்கவும்.
கூலிங் மற்றும் தெர்மோஸ்டாட்டை பரிசோதிக்கவும்
ஏசியை ஆன் செய்து அதன் குளிர்ச்சி மற்றும் ஒட்டுமொத்த செயல்பாட்டை கவனிக்கவும். தேவையற்ற சத்தங்கள் அல்லது தண்ணீர் கசிவு உள்ளதா என பார்க்கவும். தெர்மோஸ்டாட்டை 24 டிகிரி செல்சியஸில் வைப்பது உங்கள் மின் கட்டணத்தை கட்டுக்குள் வைக்க உதவும் சிறந்த வெப்பநிலையாகும். குளிர்ச்சி குறைவாக இருந்தால், கேஸ் குறைபாடு அல்லது வேறு ஏதேனும் உட்புற பிரச்சினை இருக்கலாம்.
முழுமையான பராமரிப்பிற்கு நிபுணரை அழைக்கவும்
நீங்கள் வீட்டிலேயே அடிப்படை பராமரிப்பு வேலைகளை செய்தாலும், வருடாந்திர ஆழமான பராமரிப்பிற்கு (Deep Cleaning) ஒரு நிபுணரை அழைப்பது மிகவும் அவசியமாகும். அவர்கள் கேஸ் அளவை சரிபார்த்து, காயில்களை சுத்தம் செய்து, கம்ப்ரசர் மற்றும் வடிகால் குழாய்கள் சீராக செயல்படுவதை உறுதி செய்வார்கள். இது கோடைக்காலத்தில் எதிர்பாராத ஏசி பழுதுகளை தவிர்க்க உதவும்.
