முதலாவது பார்வையற்றோர் மகளிர் டி20 உலகக் கோப்பை கிரிக்கெட் தொடரில், இந்திய அணி சாம்பியன் பட்டம் வென்று வரலாறு படைத்துள்ளது. பைனலில் நேபாளத்தை 7 விக்கெட் வித்தியாசத்தில் வீழ்த்திய இந்திய அணி, தொடர் முழுவதும் தோல்வியே சந்திக்காமல் மகுடம் சூடியது.
பார்வையற்றோருக்கான முதலாவது மகளிர் டி20 உலகக் கோப்பை கிரிக்கெட் தொடரில், இந்திய அணி நேபாளத்தை வீழ்த்தி சாம்பியன் பட்டம் வென்று வரலாறு படைத்துள்ளது. இலங்கையில் ஞாயிற்றுக்கிழமை நடைபெற்ற இறுதிப் போட்டியில் 7 விக்கெட் வித்தியாசத்தில் இந்தியா அபார வெற்றி பெற்றது.
இறுதிப் போட்டியில் இந்தியா ஆதிக்கம்
முதலில் பந்துவீசத் தீர்மானித்த இந்திய அணி, நேபாள அணியைக் கட்டுப்பாட்டிற்குள் வைத்திருந்தது. இந்திய பந்துவீச்சாளர்களின் நேர்த்தியான பந்துவீச்சால், நேபாள அணியால் 20 ஓவர்களில் 5 விக்கெட் இழப்பிற்கு 114 ரன்கள் மட்டுமே எடுக்க முடிந்தது.
115 ரன்கள் என்ற இலக்குடன் களமிறங்கிய இந்தியா, ஆரம்பம் முதலே அதிரடியாக விளையாடியது. முதல் 10 ஓவர்களிலேயே 100 ரன்களைக் கடந்து வெற்றியைக் கிட்டத்தட்ட உறுதி செய்தது.
Related Articles
தொடக்க வீராங்கனை பூலா சாரன் (Phula Saren) 27 பந்துகளில் 4 பவுண்டரிகளுடன் 44 ரன்கள் குவித்து ஆட்டமிழக்காமல் இருந்தார். இவரது சிறப்பான ஆட்டத்தால் 13-வது ஓவரிலேயே இந்தியா இலக்கை எட்டிப் பிடித்துக் கோப்பையைக் கைப்பற்றியது. பூலா சாரன் 'ஆட்டநாயகி' விருதையும் வென்றார். மற்றொரு வீராங்கனை கருணா 27 பந்துகளில் 42 ரன்கள் எடுத்து வெற்றிக்கு உதவினார்.
"ஆண்கள் அணியுடனும் மோதத் தயார்"
வெற்றி குறித்துப் பேசிய இந்திய அணி கேப்டன் தீபிகா டி.சி., "இந்த வெற்றி மிகவும் பெருமை அளிக்கிறது. இதற்காக அணி முழுவதும் கடுமையாக உழைத்தோம். இது ஒரு மிகப்பெரிய வெற்றி. எங்கள் அணி மிகவும் வலிமையானது; எங்களைக் கண்டு மற்ற அணிகள் பயப்படுகின்றன. நாங்கள் ஆண்கள் அணியுடன் விளையாடக் கூடத் தயாராக இருக்கிறோம்," என்று நம்பிக்கையுடன் தெரிவித்தார்.
தோல்வியே காணாத பயணம்
இந்த உலகக் கோப்பைத் தொடர் முழுவதும் இந்திய அணி ஒரு தோல்வியைக் கூடச் சந்திக்கவில்லை என்பது குறிப்பிடத்தக்கது.
லீக் சுற்றுகளில் இலங்கை, ஆஸ்திரேலியா மற்றும் பாகிஸ்தான் அணிகளை வீழ்த்தியது. (பாகிஸ்தானுக்கு எதிரான போட்டியில் 136 ரன்களை வெறும் 10.2 ஓவர்களில் எட்டிப் பிடித்தது).
அரையிறுதியில் ஆஸ்திரேலியாவை 9 விக்கெட் வித்தியாசத்தில் வீழ்த்தியது. தற்போது இறுதிப் போட்டியில் நேபாளத்தையும் வீழ்த்தி, தோல்வியே காணாத அணியாக மகுடம் சூடியுள்ளது.
