சிலருக்கு பிரியாணி பிடிக்கும். ஆனால் அதில் சேர்க்கப்படும் சிக்கன், மட்டன், காய்கறிகள் போன்றவை பிடிக்காது. இன்னும் சில சைவ பிரியர்களுக்கு கூட பிரியாணி சாப்பிட வேண்டும் என ஆசை வரும். அப்படிப்பட்டவர்களுக்கு ஏற்ற உணவு தான் இந்த பிளைன் குஸ்கா. பிரியாணியை விட அட்டகாசமான சுவையில் பிளைன் குஸ்கா செய்யும் முறையை தெரிந்து கொள்ளலாம்.
பிரியாணி என்றாலே பலருக்கும் அசைவத் துண்டுகள் தான் நினைவுக்கு வரும். ஆனால், எந்த விதமான இறைச்சியோ அல்லது காய்கறிகளோ சேர்க்காமல், அதே பிரியாணி வாசனையுடனும் அசாத்திய சுவையுடனும் செய்யப்படுவது தான் 'பிளைன் குஸ்கா'. பேச்சுலர்கள் முதல் இல்லத்தரசிகள் வரை அனைவரும் மிக எளிதாக, குறைந்த நேரத்தில் செய்யக்கூடிய ஒரு மேஜிக் ரெசிபி இது. ஹோட்டல்களில் விற்கப்படும் குஸ்காவை விட, வீட்டில் தூய்மையாகவும் சுவையாகவும் எப்படிச் செய்வது என்பதை பார்க்கலாம்.
பாசுமதி அரிசியின் பக்குவம் குஸ்கா உதிர் உதிராக வர அரிசியை ஊற வைக்கும் பக்குவம் மிக முக்கியம். பாசுமதி அரிசியை இரண்டு முறை மெதுவாகக் களைந்துவிட்டு, சரியாக 20 முதல் 25 நிமிடங்கள் மட்டுமே ஊறவைக்க வேண்டும். அதற்கு மேல் ஊறினால் அரிசி உடைந்து விடும். அரிசியை வேக வைக்க பயன்படுத்தும் தண்ணீரின் அளவு 1 கப் அரிசிக்கு, ஒன்றரை (1.5) கப் தண்ணீர் என்ற விகிதத்தில் இருக்க வேண்டும்.
வாசனைப் பொருட்களின் ரகசியம் குஸ்காவிற்கு அசல் பிரியாணி வாசனையைத் தருவது நாம் சேர்க்கும் தாளிப்புப் பொருட்கள் தான். குக்கரில் நெய் மற்றும் ரீஃபைண்ட் ஆயில் சமஅளவில் ஊற்றி சூடானதும், கல்பாசி, மராட்டி மொக்கு, சுருள் பட்டை, ஏலக்காய், கிராம்பு மற்றும் பிரிஞ்சி இலை சேர்க்க வேண்டும். இதில் 'கல்பாசி' சேர்ப்பது தான் ஹோட்டல் சுவையின் ரகசியமாகும்.
Related Articles
வெங்காயம் வதங்கும் விதம் நீளமாக நறுக்கிய பெரிய வெங்காயத்தை எண்ணெயில் சேர்க்க வேண்டும். வெங்காயம் லேசாக நிறம் மாறுவது போதாது; அது நல்ல பொன்னிறமாக (Golden brown) சுருண்டு வதங்க வேண்டும். வெங்காயம் எந்தளவுக்கு வதங்குகிறதோ, அந்தளவுக்கு குஸ்காவின் நிறமும் சுவையும் கூடும். இதனுடன் புதிய இஞ்சி-பூண்டு விழுது சேர்த்து பச்சை வாசனை போகும் வரை வதக்கவும்.
தக்காளி மற்றும் புதினா கலவை அடுத்ததாக நறுக்கிய தக்காளி, காரத்திற்கு ஏற்ப கீறிய பச்சை மிளகாய், ஒரு கைப்பிடி ஃபிரஷான புதினா மற்றும் கொத்தமல்லித் தழையைச் சேர்க்க வேண்டும். தக்காளி நன்றாகக் குழைந்து, தொக்கு பதத்திற்கு வர வேண்டும். தக்காளி அதிகமாகிவிட்டால் குஸ்கா, தக்காளி சாதம் போல் மாறிவிடும் என்பதால் அளவாகப் பயன்படுத்துவது நல்லது.
மசாலா மற்றும் கெட்டித் தயிர் தக்காளி வதங்கியதும் தனி மிளகாய்த்தூள் மற்றும் பிரியாணி மசாலா தூள் சேர்க்கவும். மசாலாவின் காரத்தை சமன் செய்யவும், சாதம் மென்மையாக இருக்கவும் 2 டேபிள் ஸ்பூன் புளிக்காத கெட்டித் தயிர் சேர்த்து, எண்ணெய் பிரிந்து வரும் வரை மிதமான தீயில் வதக்க வேண்டும்.
தம் போடும் சரியான பக்குவம் அளந்து வைத்துள்ள தண்ணீர் மற்றும் தேவையான உப்பு சேர்த்து கொதிக்கவிடவும். தண்ணீர் தளபுளவென கொதிக்கும் போது, ஊறவைத்த அரிசியைச் சேர்த்து, அரை எலுமிச்சம்பழச் சாறு பிழியவும். தண்ணீர் மற்றும் அரிசி சமமட்டத்திற்கு வந்ததும் (70% வெந்ததும்), மூடி போட்டு மிதமான தீயில் 10 நிமிடங்கள் 'தம்' போட வேண்டும்.
டிப்ஸ்: தம் வைப்பதற்கு முன் மேலே ஒரு ஸ்பூன் நெய் மற்றும் வறுத்த முந்திரி சேர்த்தால், பிரியாணியை விட சுவையான குஸ்கா கமகமவென தயாராகிவிடும்!
