டாய்லெட்டில் செல்போன் யூஸ் பண்ணுற ஆளா நீங்க? உங்கள் கையில் இருக்கும் செல்போனே எமன்!
கழிவறையில் செல்போன் பயன்படுத்துவது மூலநோய் அபாயத்தை 46% அதிகரிக்கிறது என்கிறது புதிய ஆய்வு. இதன் இணைப்பு என்ன, உங்களை எப்படி பாதுகாப்பது?
கழிவறையில் செல்போன்: புதிய ஆய்வு சொல்வது என்ன?
கழிவறையில் அமர்ந்து செல்போன் பயன்படுத்துவது பலருக்கும் இருக்கும் பழக்கம். ஆனால், இது எவ்வளவு ஆபத்தானது என்பது உங்களுக்குத் தெரியுமா? அமெரிக்காவில் நடத்தப்பட்ட புதிய ஆய்வு ஒன்று, கழிவறையில் செல்போன் பயன்படுத்துபவர்களுக்கு மூலநோய் (Piles / Hemorrhoids) ஏற்படும் வாய்ப்பு 46 சதவீதம் அதிகம் என்று எச்சரிக்கிறது.
மூலநோய் என்றால் என்ன?
மூலநோய் என்பது மலக்குடல் பகுதியில் உள்ள ரத்த நாளங்கள் வீங்கி, வலி மற்றும் ரத்தப்போக்கை ஏற்படுத்தும் ஒரு பொதுவான பிரச்சனை. பொதுவாக, ஆரோக்கியமான அனைவருக்கும் மலக்குடல் பகுதியில் ரத்த நாளங்கள் இருக்கும். ஆனால், அவை வீக்கமடையும் போதுதான் வலி மற்றும் சிரமத்தை ஏற்படுத்துகிறது.
45 வயதுக்கு மேற்பட்டவர்கள்
இந்த பிரச்சனை, 45 வயதுக்கு மேற்பட்டவர்கள், கர்ப்பிணிகள், அதிக உடல் எடை கொண்டவர்கள், நாள்பட்ட மலச்சிக்கல் அல்லது வயிற்றுப்போக்கு உள்ளவர்களுக்கு அதிகமாக ஏற்படுகிறது. நீண்ட நேரம் கழிவறையில் அமர்வதும் ஒரு முக்கிய காரணம்.
செல்போனுக்கும் மூலநோய்க்கும் என்ன தொடர்பு?
கழிவறையில் செல்போன் பயன்படுத்துவதால், நாம் நீண்ட நேரம் அமர்ந்திருக்கிறோம். ஆய்வுப்படி, செல்போன் பயன்படுத்தும் 37.3% பேர் 5 நிமிடங்களுக்கும் அதிகமாக கழிவறையில் செலவிடுகின்றனர். இதுவே, செல்போன் பயன்படுத்தாதவர்களில் 7% பேருக்கு மட்டுமே இந்த நிலை உள்ளது.
கழிவறையில் நீண்ட நேரம் அமர்ந்திருப்பது
கழிவறையில் நீண்ட நேரம் அமர்ந்திருப்பது, இடுப்புப் பகுதி தசைகள் மற்றும் ரத்த நாளங்கள் மீது அதிக அழுத்தத்தை ஏற்படுத்துகிறது. இது, மலக்குடல் பகுதியில் ரத்தம் தேங்க வழிவகுத்து, மூலநோய் உருவாக காரணமாகிறது.
ஆய்வின் முக்கிய கண்டுபிடிப்புகள்
இந்த ஆய்வில், 45 வயதுக்கு மேற்பட்ட 125 பேர் கலந்துகொண்டனர். இவர்களில் 66% பேர் கழிவறையில் செல்போன் பயன்படுத்துபவர்கள். அவர்கள் செய்தி படிப்பது, சமூக வலைதளங்களை பயன்படுத்துவது போன்ற செயல்களில் ஈடுபட்டனர்.
கழிவறையில் செல்போன் பயன்படுத்தியவர்களுக்கு, பயன்படுத்தாதவர்களை விட 46% அதிக மூலநோய் அபாயம் இருப்பது உறுதி செய்யப்பட்டது. இந்த ஆய்வு, மலம் கழிப்பதில் சிரமம் (straining) இருப்பதை விட, கழிவறையில் செலவிடும் நேரமே மூலநோய்க்கான முக்கிய காரணி என்று கூறுகிறது.
வேறு ஆய்வுகள் என்ன சொல்கின்றன?
இந்த ஆய்வு மட்டுமல்ல, 2020-ல் துருக்கி மற்றும் இத்தாலியில் நடத்தப்பட்ட ஆய்வுகளும் இந்த முடிவை உறுதிப்படுத்துகின்றன. கழிவறையில் 5 நிமிடங்களுக்கு மேல் அமர்ந்திருப்பது மூலநோய் அபாயத்தை அதிகரிக்கும் என்றும், மூலநோய் உள்ளவர்கள் நீண்ட நேரம் கழிவறையில் அமர்ந்தால் அவர்களின் நிலை மேலும் மோசமாகும் என்றும் அந்த ஆய்வுகள் தெரிவிக்கின்றன.
மூலநோயிலிருந்து தப்பிப்பது எப்படி?
மூலநோயைத் தடுக்க, நார்ச்சத்து அதிகம் உள்ள உணவுகளை உட்கொள்வது, போதுமான தண்ணீர் குடிப்பது, மற்றும் கழிவறையில் நீண்ட நேரம் அமர்வதைத் தவிர்ப்பது அவசியம். செல்போனை கழிவறைக்கு வெளியே விட்டுச் செல்வது மூலநோய் அபாயத்தைக் குறைப்பதோடு, கிருமிகள் உங்கள் போனில் பரவுவதையும் தடுக்கும்.
மூலநோய் அறிகுறிகளான மலம் கழிக்கும்போது ரத்தம் வருதல், வலி, அல்லது கட்டி போன்ற உணர்வு ஏற்பட்டால், உடனடியாக மருத்துவரை அணுகுவது நல்லது.
ஸ்மார்ட்போன்கள் மற்றும் AI முதல் சைபர் பாதுகாப்பு, அறிவியல் முன்னேற்றங்கள் வரை — சமீபத்திய தொழில்நுட்ப (Technology News in Tamil) அப்டேட்களை தொடர்ச்சியாக பெறுங்கள். டிஜிட்டல் டிரெண்ட்ஸ் குறித்து நிபுணர்களின் கருத்துகள், விரிவான தகவல்கள் மற்றும் பிரேக்கிங் நியூஸை வழங்கும் ஒரே தளம் ஏஷ்யாநெட் தமிழ் நியூஸ்.புதிய கேஜெட் ரிலீஸ் ஆனதா? புதிய ஸ்டார்ட்அப்புகள் வந்தவையா? எதிர்காலத்தை மாற்றக்கூடிய எந்த டெக் பாலிஸி வந்துள்ளது? இவை அனைத்திற்கும் சிறு சிறு தகவல்கள் இங்கு கிடைக்கும். டெக் விளக்கக் குறிப்புகள் மற்றும் கேஜெட் டெமோ வீடியோக்களையும் நீங்கள் பார்க்கலாம்.
