90 நாட்கள் பேட்டரி பேக்கப், தேவைக்கேற்ப வடிவம் மாறும்: லாஜிடெக் ‘பெப்பிள் அப்’ மவுஸ் அறிமுகம்!

லாஜிடெக் நிறுவனம் வடிவம் மாறும் அமைப்பு மற்றும் 90 நாட்கள் பேட்டரி பேக்கப் வசதி கொண்ட புதிய 'பெப்பிள் அப்' வயர்லெஸ் மவுஸை அறிமுகப்படுத்தியுள்ளது. இதன் விலை மற்றும் சிறப்பம்சங்கள் பற்றி விரிவாகப் பார்ப்போம்.

Image Credit : Logitech

பெப்பிள் அப் வயர்லெஸ் மவுஸ் - 90 நாட்கள் பேட்டரி பேக்கப்

பிரபல கணினி உபகரண தயாரிப்பு நிறுவனமான லாஜிடெக், தனது புதிய ஸ்லிம் ரக வயர்லெஸ் மவுஸான 'பெப்பிள் அப்' (Logitech Pebble Up) சாதனத்தைச் சர்வதேச சந்தையில் அறிமுகப்படுத்தியுள்ளது. பயனர்களின் தேவைக்கேற்ப தட்டையாகவோ (Flat) அல்லது கைகளுக்குப் பிடிமானமாக இருக்கும் வகையில் சற்று உயர்ந்த அமைப்பிலோ (Fold-up grip) தனது வடிவத்தை மாற்றிக்கொள்ளும் தனித்துவமான கட்டமைப்பை இந்த மவுஸ் கொண்டுள்ளது. கடந்த 2023-ல் அறிமுகமான 'பெப்பிள் மவுஸ் 2 M350s' சாதனத்தின் தொடர்ச்சியாக இது களமிறக்கப்பட்டுள்ளது.

Image Credit : Logitech

வடிவமைப்பு & தோற்றம்

பயணங்களின்போது எளிதில் எடுத்துச் செல்லும் வகையில் வடிவமைக்கப்பட்டுள்ள இந்த சாதனம் 105.8 x 59.6 x 30 மி.மீ அளவும், வெறும் 79 கிராம் எடையும் கொண்டது. இதன் முந்தைய மாடலான M350s (76 கிராம்) உடன் ஒப்பிடும்போது, கூடுதல் பிடிமான அமைப்பைக் கொண்டிருந்தாலும் எடையில் பெரிய வித்தியாசம் இல்லை.

சுற்றுச்சூழலுக்கு உகந்த மறுசுழற்சி செய்யப்பட்ட பிளாஸ்டிக்கைக் கொண்டு தயாரிக்கப்பட்டுள்ள இந்த மவுஸ், ரோஸ் பிங்க் (43% மறுசுழற்சி பிளாஸ்டிக்), பேர்ல் ஒயிட் (43%) மற்றும் கிராஃபைட் கிரே (56%) ஆகிய 3 கவர்ச்சிகரமான வண்ணங்களில் விற்பனைக்கு வருகிறது.

Image Credit : Logitech

சென்சார் & பட்டன் வசதிகள்

இதில் 4,200 CPI ரெசல்யூஷன் கொண்ட ஆப்டிகல் சென்சார் பொருத்தப்பட்டுள்ளது. பயனர்கள் தங்கள் வசதிக்கேற்ப இதன் DPI அளவை 400 முதல் 4,000 வரை மாற்றியமைத்துக் கொள்ளலாம்.

லெஃப்ட் கிளிக், ரைட் கிளிக், ஸ்க்ரோல் வீல் பட்டன் மற்றும் ஒரு பிரத்யேக DPI பட்டன் என மொத்தம் 4 பொத்தான்கள் இதில் இடம்பெற்றுள்ளன. 'Logi Options+' செயலி வாயிலாக ஸ்க்ரோல் வீல் மற்றும் DPI பொத்தான்களின் செயல்பாடுகளை நமக்குத் தேவையான ஷார்ட்கட்களாக மாற்றிக்கொள்ள முடியும். மேலும், இந்தச் செயலியானது சைகை வழிச் செயல்பாடுகள் (Gesture function) மற்றும் ஏ.ஐ (AI) கருவிகளுக்கான ஆதரவையும் வழங்குகிறது.

Image Credit : Logitech

பேட்டரி ஆயுள் & இணைப்புத் திறன்

முந்தைய மாடல்களில் வழக்கமான 'AA' பேட்டரி பயன்படுத்தப்பட்ட நிலையில், புதிய பெப்பிள் அப் மாடலில் 290 mAh திறன் கொண்ட ரீசார்ஜ் செய்யக்கூடிய லித்தியம் பாலிமர் பேட்டரி கொடுக்கப்பட்டுள்ளது. ஒரு முறை முழுமையாக சார்ஜ் செய்தால் தொடர்ந்து 90 நாட்கள் வரை பயன்படுத்த முடியும் என நிறுவனம் உறுதியளிக்கிறது.

இணைப்புத் தேவைகளுக்காக புளூடூத் லோ எனர்ஜி (Bluetooth Low Energy) மற்றும் 'Logi Bolt' USB ரிசீவர் ஆகிய இரண்டு வசதிகளும் வழங்கப்பட்டுள்ளன. 'Logi Easy-Switch' அம்சம் மூலம் ஒரே நேரத்தில் 3 சாதனங்களை இணைத்து, அவற்றுக்கு இடையே எளிதாக மாறிக் கொள்ள முடியும். இது 10 மீட்டர் தூரம் வரையிலான வயர்லெஸ் வரம்பைக் கொண்டுள்ளது.

Image Credit : Logitech

இயங்குதள ஆதரவு & விலை

இந்த மவுஸ் விண்டோஸ் (Windows) மற்றும் மேக் (macOS) இயங்குதளங்களில் முழுமையான தனிப்பயனாக்குதல் வசதியுடன் இயங்கும். ஐபேட்ஓஎஸ் (iPadOS), லினக்ஸ் (Linux), குரோம்ஓஎஸ் (ChromeOS) மற்றும் ஆண்ட்ராய்டு (Android) தளங்களில் அடிப்படை மவுஸ் பயன்பாட்டை மட்டும் ஆதரிக்கும். ஒரு வருட வரையறுக்கப்பட்ட ஹார்டுவேர் உத்தரவாதத்துடன் (Warranty) வரும் இந்த லாஜிடெக் பெப்பிள் அப் மவுஸின் விலை சீனச் சந்தையில் 250 யுவான் (இந்திய மதிப்பில் சுமார் ரூ.3,100 / $37) என நிர்ணயிக்கப்பட்டுள்ளது.